திருநள்ளாறு

               

௨ 

சுந்தரமூர்த்தி   சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருநள்ளாறு
ஊர்/வேறுபெயர்
நாடு	காவிரி தென்கரை
ॐசுவாமி	தர்ப்பாரண்யேஸ்வரர், நள்ளாற்று ஈசர்
ॐஅம்பிகை	போகமார்த்த பூண்முலையாள்
பாடியவர்கள்	திருஞானசம்பந்தர்(4)         பாடக மெல்லடி (1:07)         போகமார்த்த பூண் முலையாள் (1:49)         ஏடு மலி கொன்ற(2:33)         தளிரிள வளர் ஒளி  (3:87) திருநாவுக்கரசர்(2)         உள்ளாறாததோர் புண்டரிகத்திரள் (5:68)         ஆதிகண்ணான் முகத்தில் (6:20) சுந்தரர்(1)         செம்பொன் மேனி வெண்நீறு (7:68)
ஸ்தல மரம்	தருப்பை
தீர்த்தம்	நள தீர்த்தம்
பண்	தக்கேசி
குறிப்புகள்	நளச் சக்கரவர்த்திக்கு சனி பகவானால் வந்த துன்பம் நீக்கிய தலம் சப்த விடங்க தலங்களுள் ஒன்று  பச்சைப் பதிகம் பெற்ற சிறப்புடையது
	muththமுத்திப்பேறு கிட்டும்
வரிசை எண்.	68                                                                    52/127

திருச்சிற்றம்பலம்

செம்பொன் மேனிவெண் நீறு அணி வானைக்
          கரிய கண்டனை மால்அயன் காணாச்
சம்பு வைத்து அழல் அங்கையி னானைச்
          சாம வேதனைத் தன் ஒப்பிலானைக்
கும்ப மாகரி யின் உரி யானைக்
          கோவின் மேல்வருங் கோவினை எங்கள்
நம்ப னைநள் ளாறனை அமுதை
          நாயி னேன்மறந்து என்நினைக் கேனே.  1  

விரைசெய் மாமலர்க் கொன்றையி னானை
        வேத கீதனை மிகச்சிறந் து உருகிப்
பரசு வார்வினைப் பற்று அறுப்பானைப்
      பாலொடு ஆன் அஞ்சும் ஆடவல் லானைக்
குரைக டல்வரை ஏழு உலகுடைய
      கோனை ஞானக் கொழுந்தினைத் தொல்லை
நரைவிடை யுடைநள் ளாறனை அமுதை
      நாயி னேன்மறந்து என்நினைக் கேனே.  2  

பூவில் வாசத்தைப் பொன்னினை மணியைப்
      புவியைக் காற்றினைப் புனல்அனல் வெளியைச்
சேவின் மேல்வரும் செல்வனைச் சிவனைத்
      தேவ தேவனைத் தித்திக்குந் தேனைக்
காவி யங்கண்ணிப் பங்கனைக் கங்கைச்
      சடைய னைக்கா மரத்திசை பாட
நாவில் ஊறும்நள் ளாறனை அமுதை
      நாயி னேன்மறந்து என்நினைக் கேனே.  3  

தஞ்சம் என்றுதன் தாளது அடைந்த
      பாலன் மேல்வந்த காலனை உருள
நெஞ்சில் ஓர்உதை கொண்ட பிரானை
      நினைப்ப வர்மனம் நீங்ககில் லானை
விஞ்சை வானவர் தானவர் கூடிக்
      கடைந்த வேலையுள் மிக்குக் எழுந்து எரியும்
நஞ்சம் உண்டநள் ளாறனை அமுதை
      நாயி னேன்மறந்து என்நினைக் கேனே.  4  

மங்கை பங்கனை மாசிலா மணியை
      வான நாடனை ஏனமோடு அன்னம்
எங்கு நாடியுங் காண்பரி யானை
      ஏழை யேற்குக் எளி வந்தபி ரானை
அங்கம் நான்மறை யால்நிறை கின்ற
      அந்த ணாளர் அடியது போற்றும்
நங்கள் கோனைநள் ளாறனை அமுதை
      நாயி னேன்மறந்து என்நினைக் கேனே.  5  

கற்ப கத்தினைக் கனகமால் வரையைக்
      காம கோபனைக் கண்ணுத லானைச்
சொற்ப தப்பொருள் இருள் அறுத்து அருளும்
      தூய சோதியை வெண்ணெய் நல்லூரில்
அற்பு தப்பழ ஆவணம்காட்டி
      அடிய னாஎன்னை ஆளது கொண்ட
நற்ப தத்தைநள் ளாறனை அமுதை
      நாயி னேன்மறந்து என்நினைக் கேனே.  6  

மறவ னைஅன்று பன்றிப்பின் சென்ற
      மாய னைநால்வர்க்கு ஆலின்கீழ் உரைத்த
அறவ னைஅம ரர்க்கு அரி யானை
      அமரர் சேனைக்கு நாயக னான
"குறவர் மங்கைதன் கேள்வனைப் பெற்ற"
      கோனை நான்செய்த குற்றங்கள் பொறுக்கும்
நறைவி ரியும்நள் ளாறனை அமுதை
      நாயி னேன்மறந்து என்நினைக் கேனே.  7  

மாதி னுக்கு உடம்பு இடம் கொடுத் தானை
      மணியி னைப்பணி வார்வினை கெடுக்கும்
வேத னைவேத வேள்வியர் வணங்கும்
      விமல னை அடி யேற்கு எளி வந்த
தூதனைத் தன்னைத் தோழமை அருளித்
      தொண்ட னேன்செய்த துரிசுகள் பொறுக்கும்
நாத னைநள் ளாறனை அமுதை
      நாயி னேன்மறந்து என்நினைக் கேனே.  8  

இலங்கை வேந்தன் எழில்திகழ் கயிலை
      எடுப்ப ஆங்கு இம வான் மகள் அஞ்சத்
துலங்கு நீண்முடி ஒருபதும் தோள்கள்
      இருப தும் நெரித்து இன்னிசை கேட்டு
வலங்கை வாளொடு நாமமுங் கொடுத்த
      வள்ள லைப்பிள்ளை மாமதிச் சடைமேல்
நலங்கொள் சோதிநள் ளாறனை அமுதை
      நாயி னேன்மறந்து என்நினைக் கேனே.  9  

செறிந்த சோலைகள் சூழ்ந்தநள் ளாற்று எம் 
      சிவனை நாவலூர்ச் சிங்கடி தந்தை
மறந்து நான்மற்று நினைப்பது ஏது என்று
      வனப்ப கை அப்பன் ஊரன் வன்தொண்டன்
சிறந்த மாலைகள் அஞ்சினோடு அஞ்சும்
      சிந்தையுள் உருகிச் செப்ப வல்லார்க்கு 
இறந்து போக்கில்லை வரவில்லை யாகி
      இன்பவெள் ளத்துள் இருப்பர்கள் இனிதே.

திருச்சிற்றம்பலம்