பொது - அப்பர்

                          

௨ 

திருநாவுக்கரசர் சுவாமிகள் அருளிச்செய்த
ஐந்தாம்  திருமுறை

தகவல் பலகை	விவரம்
தலம்	பொது
பாடியவர்கள்	அப்பர்(1)         வேத நாயகன் (5-100)
பண்	திருக்குறுந்தொகை
குறிப்புகள்	இது ஆதிபுராண திருக்குறுந்தொகை என போற்றப் படுகிறது.  இந்த பதிகம் சிவ பெருமானின் முதன்மை தன்மையை விரித்து உரைக்கிறது
பதிக பலன்	அருள் பெற
வரிசை எண்.	100

திருச்சிற்றம்பலம்

வேத நாயகன் வேதியர் நாயகன் 
மாதின் நாயகன் மாதவர் நாயகன் 
ஆதி நாயகன் ஆதிரை நாயகன் 
பூத நாயகன் புண்ணிய மூர்த்தியே.  1  

செத்துச் செத்துப்பிறப்பதே தேவு என்று 
பத்தி செய்மனப் பாறைகட்கு ஏறுமோ 
அத்தன் என்று அரியோடு பிரமனும்
துத்தியம் செய நின்றநற் சோதியே.  2  

நூறு கோடி பிரமர்கள் நொந்தினார் 
ஆறு கோடிநாராயணர் அங்ஙனே 
ஏறு கங்கை மணல் எண்ணில் இந்திரர் 
ஈறு இலாதவன் ஈசன் ஒருவனே.  3  

வாது செய்து மயங்கு மனத்தராய் 
ஏது சொல்லுவீர் ஆகிலும் ஏழைகாள் 
யாதோர் தேவர் எனப்படுவார்க்கு எல்லாம் 
மாதேவன் அலால் தேவர் மற்று இல்லையே.  4  

கூவல் ஆமை குரை கடல் ஆமையைக் 
கூவலோடு ஒக்குமோ கடல் என்றல்போல்
பாவ காரிகள் பார்ப்பரிது என்பரால்
தேவ தேவன் சிவன்பெருந் தன்மையே.  5  

பேய் வனத்து அமர்வானைப் பிரார்த்தித்தார்க்கு 
ஈவ னை இமையோர் முடி தன் அடிச் 
சாய் வனைச் சலவார்கள் தமக்குடல்
சீவ னைச் சிவனைச் சிந்தி யார்களே.  6  

எரி பெருக்குவர் அவ் எரி ஈசனது  
உருவ ருக்கம் அதாவது உணர்கிலார் 
அரி அயற்கு அரியானை அயர்த்துப்போய் 
நரிவி ருத்தம் அதாகுவர் நாடரே  7  

அருக்கன் பாதம் வணங்குவர் அந்தியில் 
அருக்க னாவான்அரன் உருவு அல்லனோ 
இருக்கு நான்மறை ஈசனையே தொழும்
கருத்தினை நினையார் கன்மனவரே.  8  

தாயி னும்நல்ல சங்கர னுக்க்கு அன்பர் 
ஆய உள்ளத்து அமுது அருந் தப்பெறார் 
பேயர் பேய் முலை உண்டு உயிர் போக்கிய 
மாயன் மாயத்துப்பட்ட மனத்தரே.  9  

அரக்கன் வல்லரட்டு ஆங்கு ஒழித்தார் அருள் 
பெருக்கச் செய்த பிரான்பெருந் தன்மையை 
அருத்தி செய்து அறியப் பெறு கின்றிலர் 
கருத்தில் ஆக்கய வக்கணத் தோர்களே.

திருச்சிற்றம்பலம்