3. 2 திருவிசைப்பா - கருவூர்த் தேவர்

              

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திருக்களந்தை ஆதித்தேச்சரம்
ஊர்	களப்பால்
நாடு	சோழ நாடு காவிரி (வ)
ॐசுவாமி	ஆதித்தேச்சரர், அழகிய நாதசுவாமி.
ॐஅம்பிகை	பிரபாநாயகி, பண்ணேர் மொழியாள்.
பாடியவர்கள்	கருவூர்த் தேவர் (1),         கலைகள் தம் பொருளும் (9-3.2)
ஸ்தல மரம்	கிளுவை
தீர்த்தம்	சிவ தீர்த்தம்
பண்	புறநீர்மை
குறிப்புகள்	கூற்றுவ நாயனாரின் மூலத்திருவுருவம் கோவிலில் உள்ளது கூட்ட்ருவ நாயனார்  இக்கோயில் விசயாலய சோழனின்      மகன் ஆதித்தசோழன் கட்டுவித்தது முள்ளியாற்றின் கரையில் அமைந்த தலம்.
பதிக பலன்	அஞ்ஞானம் விலகும்
வரிசை எண்.	3.1                                                    01/63

திருச்சிற்றம்பலம்

கலைகள்தம் பொருளும் அறிவுமாய் என்னைக்
          கற்பினில் பெற்றெடுத்து எனக்கே
முலைகள்தந்து அருளும் தாயினும் நல்ல
          முக்கணான் உறைவிடம் போலும்
மலைகுடைந்து அனைய நெடுநிலை மாட
          மருங்கு எலாம் மறையவர் முறை ஓத்து
அலைகடல் முழங்கும் அந்தணீர்க் களந்தை
          அணிதிகழ் ஆதித்தேச் சரமே.  1  

சந்தன களபம் துதைந்தநன் மேனித்
          தவளவெண் பொடிமுழு தாடும்
செந்தழல் உருவில் பொலிந்துநோக் குடைய
          திருநுதல் அவர்க்கு இடம் போலும்
இந்தன விலங்கல் எறிபுனந் தீப்பட்டு
          எரிவது ஒத்து எழுநிலை மாடம்
அந்தணர் அழல் ஓம்பு அலைபுனற் களந்தை
          அணிதிகழ் ஆதித்தேச் சரமே.  2  

கரியரே இடந்தான் செய்யரே ஒருபால்
          கழுத்தில் ஓர் தனிவடஞ் சேர்த்தி
முரிவரே முனிவர் தம்மொடு ஆல் நிழற்கீழ்
          முறைதெரிந்து ஓர் உடம்பினராம்
இருவரே முக்கண் நாற்பெருந் தடந்தோள்
          இறைவரே மறைகளும் தேட
அரியரே ஆகில் அவரிடம் களந்தை
          அணிதிகழ் ஆதித்தேச் சரமே.  3  

பழையராம் தொண்டர்க்கு எளியரே மிண்டர்க்கு
          அரியரே பாவியேன் செய்யும்
பிழை எலாம் பொறுத்து என் பிணிபொறுத்து அருளாப்
          பிச்சரே நச்சரா மிளிரும்
குழையராய் வந்து எம் குடிமுழு தாளும்
          குழகரே ஒழுகுநீர்க் கங்கை
அழகரே ஆகில் அவரிடம் களந்தை
          அணிதிகழ் ஆதித்தேச் சரமே.  4  

பவளமே மகுடம் பவளமே திருவாய்
          பவளமே திரு உடம்பு அதனில்
தவளமே களபம் தவளமே புரிநூல்
          தவளமே முறுவல்ஆ டரவம்
துவளுமே கலையும் துகிலுமே ஒருபால்
          துடியிடை இடமருங்கு ஒருத்தி
அவளுமே ஆகில் அவரிடம் களந்தை
          அணிதிகழ் ஆதித்தேச் சரமே.  5  

நீலமே கண்டம் பவளமே திருவாய்
          நித்திலம் நிரைத்து இலங்கினவே
போலுமே முறுவல் நிறையஆ னந்தம்
          பொழியுமே திருமுகம் ஒருவர்
கோலமே 'அச்சோ' அழகிதே என்று
          குழைவரே கண்டவர் உண்டது
ஆலமே ஆகில் அவரிடம் களந்தை
          அணிதிகழ் ஆதித்தேச் சரமே !  6  

திக்கடா நினைந்து நெஞ்சு இடிந்து உருகும்
          திறத்தவர் புறத்திருந்து அலச
மைக்கடா அனைய என்னையாள் விரும்பி
          மற்றொரு பிறவியில் பிறந்து
பொய்க்கடா வண்ணம் காத்து எனக்கு அருளே
          புரியவும் வல்லரே எல்லே
அக்கடா ஆகில் அவரிடம் களந்தை
          அணிதிகழ் ஆதித்தேச் சரமே.  7  

மெய்யரே மெய்யர்க்கு இடுதிரு வான
          விளக்கரே எழுதுகோல் வளையாள் 
மையரே வையம் பலிதிரிந்து உறையும்
          மயானரே உளம் கலந்து இருந்தும்
பொய்யரே பொய்யர்க்கு அடுத்தவான் பளிங்கின்
          பொருள்வழி இருள்கிழித் எழுந்த
ஐயரே ஆகில் அவரிடம்  களந்தை
          அணிதிகழ் ஆதித்தேச் சரமே.  8  

குமுதமே திருவாய் குவளையே களமும்
          குழையதே இருசெவி ஒருபால்
விமலமே கலையும் உடையரே சடைமேல்
          மிளிருமே பொறிவரி நாகம்
கமலமே வதனம் கமலமே நயனம்
          கனகமே திருவடி நிலைநீர்
அமலமே ஆகில் அவரிடம் களந்தை
          அணிதிகழ் ஆதித்தேச் சரமே.  9  

நீர் அணங்கு அசும்பு கழனிசூழ் களந்தை
          நிறைபுகழ் ஆதித்தேச் சரத்து
நாரணன் பரவும் திருவடி நிலைமேல்
          நலமலி கலைபயில் கருவூர்
ஆரணம் மொழிந்த பவளவாய் சுரந்த
          அமுதம்ஊ றியதமிழ் மாலை
ஏரணங்கு இருநான்கு இரண்டு இவை வல்லோர்
          இருள்கிழித்து எழுந்தசிந் தையரே.

திருச்சிற்றம்பலம்

.