3.3 திருவிசைப்பா - கருவூர்த் தேவர்

               

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திருக்கீழ்க் கோட்டூர் மணியம்பலம்
ஊர்	மணியம்பலம்
நாடு	சோழ நாடு காவிரி (தெ)
ॐசுவாமி	அமுதலிங்கேஸ்வரர்
ॐஅம்பிகை	அமுதாம்பிகை
பாடியவர்கள்	கருவூர்த் தேவர் (1),         தளிரொளி மணிப்பூம் (9-3.3)
ஸ்தல மரம்	வன்னி
தீர்த்தம்	இந்திரா  தீர்த்தம், முனி தீர்த்தம்
பண்	பஞ்சமம்
குறிப்புகள்	தலைவியின் கூற்றாக அமைந்தது
பதிக பலன்	செல்வ வளம் பெருகும்
வரிசை எண்.	3.3                                                    01/63

திருச்சிற்றம்பலம்

தளிர் ஒளி மணிப்பூம் பதஞ்சிலம்பு அலம்பச்
          சடைவிரித்து அலை ஏறி  கங்கைத்
தெளிரொளி மணிநீர்த் திவலைமுத்து அரும்பித்
          திருமுகம் மலர்ந்துசொட்டு அட்டக்
கிளரொளி மணிவண்டு அறைபொழிற் பழனம்
          கெழுவுகம் பலைசெய்கீழ்க் கோட்டூர்
வளரொளி மணியம் பலத்துள் நின்று ஆடும்
          மைந்தன்என் மனங்கலந் தானே.  1  

துண்டவெண் பிறையும் படர்சடை மொழுப்பும்
          சுழியமும் சூலமும் நீல
கண்டமும் குழையும் பவளவாய் இதழும்
          கண்ணுதல் திலகமும் காட்டிக்
கெண்டையும் கயலும் உகளுநீர்ப் பழனம்
          கெழுவுகம் பலைசெய்கீழ்க் கோட்டூர்
வண்டறை மணியம் பலத்துள்நின்று ஆடும்
          மைந்தன்என் மனங்கலந் தானே.  2  

திருநுதல் விழியும் பவளவாய் இதழும்
          திலகமும் உடையவன் சடைமேல்
புரிதரு மலரின் தாதுநின்று ஊதப்
          போய்வருந் தும்பிகாள் ! இங்கே
கிரிதவழ் முகிலின் கீழ்த்தவழ் மாடம்
          கெழுவுகம் பலைசெய்கீழ்க் கோட்டூர்
வருதிறல் மணியம் பலவனைக் கண்டு என்
          மனத்தையும் கொண்டுபோ துமினே.  3  

தெள்ளுநீ றவன்நீறு என்னுடல் விரும்பும்
          செவியவன் அறிவுநூல் கேட்கும்
மெள்ளவே அவன்பேர் விளம்பும்வாய் கண்கள்
          விமானமேநோக்கி வெவ் வுயிர்க்கும்
கிள்ளைபூம் பொதும்பிற் கொஞ்சிமாம் பொழிற்கே
          கெழுவுகம் பலைசெய்கீழ்க் கோட்டூர்
வள்ளலே மணியம் பலத்துள்நின்று ஆடும்
          மைந்தனே !என்னும்என் மனனே.  4  

தோழி !யாம்செய்த தொழில்என் எம்பெருமான்
          துணைமலர்ச் சேவடி காண்பான்
ஊழிதோர் ஊழி உணர்ந்து உளம் கசிந்து
          நெக்குநைந்து உளம் கரைந்து உருகும்
கேழலும் புள்ளும் ஆகிநின்று இருவர்
          கெழுவுகம் பலைசெய்கீழ்க் கோட்டூர்
வாழிய மணியம் பலவனைக் காண்பான்
          மயங்கவும் மால் எழி யோமே.  5  

என்செய்கோம் தோழி ! தோழி நீ துணையாய்
          இரவுபோம் பகல்வரு மாகில்
அஞ்சலோ என்னான் ஆழியும் திரையும்
          அலமரு மாறுகண்டு அயர்வன்
கிஞ்சுக மணிவாய் அரிவையர் தெருவில்
          கெழுவுகம் பலைசெய்கீழ்க் கோட்டூர்
மஞ்சணி மணியம் பலவ 'ஓ' என்று
          மயங்குவன் மாலையம் பொழுதே.  6  

தழைதவழ் மொழுப்பும் தவளநீற்று ஒளியும்
          சங்கமும் சகடையின் முழக்கும்
குழைதவழ் செவியும் குளிர்சடைத் தெண்டும்
          குண்டையும் குழாங்கொடு தோன்றும்
கிழைதவழ் கனகம் பொழியநீர்ப் பழனம்
          கெழுவுகம் பலைசெய்கீழ்க் கோட்டூர்
மழைதவழ் மணியம் பலத்துள்நின்று ஆடும்
          மைந்தர்தம் வாழ்வுபோன் றனவே.  7  

தன்னக மழலைச் சிலம்பொடு சதங்கை
          தமருகம் திருவடி திருநீறு
இன்னகை மழலை கங்கைகோங்கு இதழி
          இளம்பிறை குழைவளர் இளமான்
கின்னரம் முழவம் மழலையாழ் வீணை
          கெழுவுகம் பலைசெய்கீழ்க் கோட்டூர்
மன்னவன் மணியம் பலத்துள்நின்று ஆடும்
          மைந்தன்என் மனத்துள்வைத் தனனே.  8  

யாதுநீ நினைவது எவரையாம் உடையது
          எவர்களும் யாவையும் தானாய்ப்
பாதுகை மழலைச் சிலம்பொடு புகுந்து என்
          பனிமலர்க் கண்ணுள்நின்று அகலான்
கேதகை நிழலைக் குருகு என மருவிக்
          கெண்டைகள் வெருவுகீழ்க் கோட்டூர்
மாதவன் மணியம் பலத்துள்நின்று ஆடும்
          மைந்தன்என் மனம்புகுந் தானே.  9  

அந்திபோல் உருவும் அந்தியிற் பிறைசேர்
          அழகிய சடையும்வெண் ணீறும்
சிந்தையால் நினையில் சிந்தையும் காணேன்;
          செய்வது என் தெளிபுனல் அலங்கல்
கெந்தியா வுகளும் கெண்டைபுண் டரீகம்
          கிழிக்கும்தண் பணைசெய்கீழ்க் கோட்டூர்
வந்தநாள் மணியம் பலத்துள்நின்று ஆடும்
          மைந்தனே அறியும்என் மனமே.  10  

கித்திநின்று ஆடும் அரிவையர் தெருவில்
          கெழுவுகம் பலைசெய்க்கீழ்க் கோட்டூர்
மத்தனை மணியம் பலத்துள்நின்று ஆடும்
          மைந்தனை ஆரணம் பிதற்றும்
பித்தனேன் மொழிந்த மணிநெடு மாலை
          பெரியவர்க்கு அகல் இரு விசும்பில்
முத்தியாம் என்றே உலகர்ஏத்து வரேல்
          முகமலர்ந்து எதிர்கொளும் திருவே.

திருச்சிற்றம்பலம்