3.4 திருவிசைப்பா - கருவூர்த் தேவர்

                

௨ 

கருவூர்த் தேவர்      -  அருளிச்செய்த
திருவிசைப்பா - ஒன்பதாம் திருமுறை

தகவல் பலகை	விவரம்
தலம்	திருமுகத்தலை
ஊர்	பன்னகபரணர் கோவில்
நாடு	நடு நாடு
ॐசுவாமி	பன்னகபரணர்
ॐஅம்பிகை	சாந்த நாயகி
பாடியவர்கள்	கருவூர்த் தேவர் (1),         புவன நாயகா  (9-3.4)
ஸ்தல மரம்	அகில், பின்னை
தீர்த்தம்	சிவ தீர்த்தம்
பண்	பஞ்சமம்
குறிப்புகள்	லிங்கத்தின் முகம் வஸ்திரத்தால் மறைக்கப்பட்டிருப்பதால், முழுமையாகக் காண இயலாது.
பதிக பலன்	சிவகதி பெறுவர்.
வரிசை எண்.	3.1                                                    01/63

திருச்சிற்றம்பலம்

புவனநா யகனே ! அகவுயிர்க்கு அமுதே
          பூரணா ! ஆரணம் பொழியும்
பவளவாய் மணியே ! பணிசெய்வார்க்கு இரங்கும்
          பசுபதீ ! பன்னகா பரணா !
அவனிஞா யிறுபோன்று அருள்புரிந்து அடியேன்
          அகத்திலும் முகத்தலை மூதூர்த்
தவளமா மணிப்பூங் கோயிலும் அமர்ந்தாய்
          தனியனேன் தனிமைநீங் குதற்கே.  1  

புழுங்குதீ வினையேன் வினைகெடப் புகுந்து
          புணர்பொருள் உணர்வுநூல் வகையால்
வழங்குதேன் பொழியும் பவளவாய் முக்கண்
          வளரொளி மணிநெடுங் குன்றே
முழங்குதீம் புனல்பாய்ந்து இளவரால் உகளும்
          முகத்தலை அகத்தமர்ந்து அடியேன்
விழுங்குதீங் கனியாய் இனியஆ னந்த
          வெள்ளமாய் உள்ளம் ஆயினையே.  2  

கன் எனகா உள்ளக் கள்வனேன் நின்கண்
          கசிவிலேன் கண்ணில்நீர் சொரியேன்
முன்னகா ஒழியேன் ஆயினும் செழுநீர்
          முகத்தலை அகத்தமர்ந்து உறையும்
பன்னகா பரணா பவளவாய் மணியே !
          பாவியேன் ஆவியுள் புகுந்தது
என்ன காரணம்நீ ஏழைநாய் அடியேற்கு
          எளிமையோ பெருமை ஆவதுவே.  3  

கேடிலா மெய்ந்நூல் கெழுமியும் செழுநீர்க்
          கிடையனாருடையஎன் நெஞ்சில்
பாடிலா மணியே மணியுமிழ்ந்து ஒளிரும்
          பரமனே ! பன்னகா பரணா !
மேடெலாம் செந்நெல் பசுங்கதிர் விளைந்து
          மிகத்திகழ் முகத்தலை மூதூர்
நீடினாய் எனினும் உட்புகுந்து அடியேன்
          நெஞ்செலாம் நிறைந்துநின் றாயே !  4  

அக்கனா அனைய செல்வமே சிந்தித்து
          ஐவரோடு என்னொடும் விளைந்த
இக்கலாம் முழுதும் ஒழியவந்து உள்புக்கு
          என்னைஆள் ஆண்டநாய கனே !
முக்கண்நா யகனே முழுதுலகு இறைஞ்ச
          முகத்தலை அகத்தமர்ந்து அடியேன்
பக்கல்ஆ னந்தம் இடையறா வண்ணம்
          பண்ணினாய் பவளவாய் மொழிந்தே.  5  

புனல்பட உருகி மண்டழல் வெதும்பிப்
          பூம்புனல் பொதிந்து உயிர் அளிக்கும்
வினைபடு நிறைபோல் நிறைந்தவே தகத்து என்
          மனம்நெக மகிழ்ந்தபே ரொளியே
முனைபடு மதில்மூன்று எரித்தநா யகனே !
          முகத்தலை அகத்தமர்ந்து அடியேன்
வினைபடும் உடல்நீ புகுந்துநின் றமையால்
          விழுமிய விமானம் ஆயினதே.  6  

விரியநீர் ஆலக் கருமையும் சாந்தின்
          வெண்மையும் செந்நிறத்து ஒளியும்
கரியும் நீறாடும் கனலும் ஒத்து ஒளிரும்
          கழுத்தில் ஓர் தனிவடங் கட்டி
முரியுமாறு எல்லாம் முரிந்தழ கியையாய்
          முகத்தலை அகத்தமர்ந் தாயைப்
பிரியுமாறு உளதே பேய்களோம் செய்த
          பிழைபொறுத்து ஆண்டபே ரொளியே.  7  

என்னை உன் பாத பங்கயம் பணிவித்து
          என்பு எலாம் உருகநீ எளிவந்து
உன்னை என்பால்வைத்து எங்கும் எஞ் ஞான்றும்
          ஒழிவற நிறைந்தஒண் சுடரே !
முன்னைஎன் பாசம் முழுவதும் அகல
          முகத்தலை அகத்தமர்ந்து எனக்கே
கன்னலும் பாலும் தேனும்ஆ ரமுதும்
          கனியுமாய் இனியை ஆயினையே.  8  

அம்பரா அனலா; அனிலமே புவிநீ
          அம்புவே இந்துவே இரவி
உம்பரால் ஒன்றும் அறிவொணா அணுவாய்
          ஒழிவற நிறைந்தஒண் சுடரே
மொய்ம்பராய் நலஞ்சொல் மூதறி வாளர்
          முகத்தலை அகத்தமர்ந்து எனக்கே
எம்பிரானாகி ஆண்டநீ மீண்டே
          எந்தையும் தாயுமா யினையே.  9  

மூலமாய் முடிவாய் முடிவிலா முதலாய்
          முகத்தலை அகத்தமர்ந்து இனிய
பாலுமாய், அமுதாம் பன்னகா பரணன்
          பனிமலர்த் திருவடி இணைமேல்
ஆலையம் பாகின் அனையசொற் கருவூர்
          அமுதுறழ் தீந்தமிழ் மாலை
சீலமாப் பாடும் அடியவர் எல்லாம்
          சிவபதம் குறுகிநின் றாரே.

திருச்சிற்றம்பலம்