திருக்குற்றாலம்

                  

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திரு குற்றாலம்
ஊர் /வேறு பெயர்	திரிகூட மலை , திரிகூடாசலம்,
நாடு	பாண்டிய நாடு
ॐசுவாமி	குற்றாலநாதர், திரிகூடாசலேஸ்வரர்
ॐஅம்பிகை	குழல் வாய் மொழி அம்மை, வேணு வாக்குவாகிணி
பாடியவர்கள்	திருஞானசம்பந்தர் (1)         வம்பார் குன்றம்  (1-099)
ஸ்தல மரம்	குறும்பலா
தீர்த்தம்	வட அருவி
பண்	குறிஞ்சி
குறிப்புகள்	நடராச பெருமான் நடனம் புரியும் பஞ்ச சபையில் இது சித்திர சபை  அகத்திய முனிவர் வழிபட்ட தலம்
பதிக பலன்	பாவம் விலகும்.
வரிசை எண்.	99                                                                 13/14

திருச்சிற்றம்பலம்

வம்பார் குன்றம் நீடு 
        உயர்சாரல் வளர்வேங்கைக்
கொம்பார் சோலைக் கோல 
        வண்டு யாழ் செய் குற்றாலம்
அம்பால் நெய்யோடு ஆடல் 
        அமர்ந்தான் அலர்கொன்றை
நம்பால்  மேய 
        நன்னகர் போலும் நமரங்காள்.  1

  
பொடிகள் பூசித் தொண்டர்பின் 
        செல்லப் புகழ்விம்மக்
கொடிகளோடும் நாள் 
        விழமல்கு குற்றாலம்
கடிகொள் கொன்றை 
        கூவிள மாலை காதல்செய்
அடிகள் மேய 
        நன்னகர் போலும் மடியீர்காள்.  2  

செல்வம் மல்கு செண்பகம் 
        வேங்கை சென்று ஏறிக்
கொல்லை முல்லை 
        மெல்லரும் ஈனும் குற்றாலம்
வில்லின் ஒல்க மும்மதில் 
    எய்து வினைபோக
நல்கு நம்பான் 
        நன்னகர் போலும் நமரங்காள்.  3  

பக்கம் வாழைப் 
        பாய்கனி யோடு பலவின்றேன்
கொக்கின் கோட்டுப் 
        பைங்கனி தூங்கும் குற்றாலம்
அக்கும் பாம்பும் 
        ஆமையும் பூண்டோர் அனல் ஏந்தும்
நக்கன் மேய 
        நன்னகர் போலும் நமரங்காள்.  4  

மலையார் சாரல் 
        மகவுடன் வந்த மடமந்தி
குலையார் வாழைத் 
        தீங்கனி மாந்தும் குற்றாலம்
இலையார் சூலம் 
        ஏந்திய கையான் எயில் எய்த
சிலையான் மேய 
        நன்னகர் போலும் சிறுதொண்டீர்.  5  

மைம்மா நீலக் 
        கண்ணியர் சாரல் மணிவாரிக்
கொய்ம்மா ஏனல் 
        உண்கிளி  ஒப்பும் குற்றாலம்
கைம்மா வேழத்து  
        ஈர் உரி போர்த்த கடவுள் எம்
பெம்மான் மேய 
        நன்னகர் போலும் பெரியீர்காள்.  6  

நீல நெய்தல் தண்
        சுனை சூழ்ந்த நீள்சோலைக்
கோல மஞ்ஞை 
        பேடையொ ஆடும் குற்றாலம்
காலன் தன்னைக் 
        காலால் காய்ந்த கடவுள் எம்
சூல பாணி 
        நன்னகர் போலும் தொழுவீர்காள்.  7  

போதும் பொன்னும் 
        உந்தி அருவி புடைசூழக்
கூதன் மாரி நுண்துளி 
        தூங்கும் குற்றாலம்
மூதூர் இலங்கை 
        முட்டிய கோனை முறைசெய்த
நாதன் மேய 
        நன்னகர் போலும் நமரங்காள்.  8  

அரவின் வாயின் முள் 
        எயிறு ஏய்ப்ப அரும்பீன்று
குரவம் பாவை 
        முருகமர் சோலைக் குற்றாலம்
பிரமன் னோடு மால் 
        அறியாத பெருமை எம்
பரமன் மேய 
        நன்னகர் போலும் பணிவீர்காள்.  9  

பெருந்தண் சாரல் வாழ் 
        சிறை வண்டு பெடைபுல்கிக்
குருந்தம் ஏறிச் 
        செவ்வழி பாடும் குற்றாலம்
இருந்து உண் தேரும் 
        நின்று உண் சமணும் எடுத்தார்ப்ப
அருந்தண் மேய 
        நன்னகர் போலும் அடியீர்காள்.  10  

மாடவீதி வருபுனல் 
        காழி யார் மன்னன்
கோடல் ஈன்று கொழு 
        முனை கூம்பும் குற்றாலம்
நாட வல்ல 
        நற்றமிழ் ஞான சம்பந்தன்
பாடல் பத்தும் 
        பாட நம் பாவம் பறையுமே.
        

திருச்சிற்றம்பலம்