திருவாடானை

                    

௨ 

திருஞானசம்பந்தர்சுவாமிகள் அருளிச்செய்த
இரண்டாம்  திருமுறை

தகவல் பலகை	விவரம்
தலம்	திருவாடானை
ஊர் /வேறு பெயர்	பாரிஜாத வனம், வன்னி வனம் வில்வவனம், ஆதிரநேஸ்வரம், மார்க்கண்டேயபுரம்
நாடு	பாண்டிய நாடு
ॐசுவாமி	ஆதிரநேஸ்வரர்
ॐஅம்பிகை	அன்பாயிரவல்லி
பாடியவர்கள்	திருஞானசம்பந்தர் (1),         மாதோர் கூறு உகந்து (2-112)
ஸ்தல மரம்	வில்வம்
தீர்த்தம்	மார்கண்டேய தீர்த்தம்
பண்	நட்ட ராகம்
குறிப்புகள்	துருவாச முனிவரால் சாபம் பெற்ற வாருணி, சாப விமோசனம் பெற்ற தலம். ஆடுத்தலையும் யானை உடலும் என சாபம் பெற்றதால் இது திரு ஆடு ஆணை என போற்றப் படுகிறது
பதிக பலன்	நோய் நீங்கும்.
வரிசை எண்.	112                                                                9/14

திருச்சிற்றம்பலம்

மாதோர் கூறு உகந்து ஏறு அது ஏறிய
ஆதி யான் உறை ஆடானை
போதி னால் புனைந்து ஏத்துவார் தமை
வாதி யா வினை மாயுமே.  1  

வாடல் வெண் தலை அங்கை ஏந்திநின்று 
ஆட லான் உறை ஆடானை
தோடு லாமலர் தூவிக் கைதொழ
வீடும் நுங்கள் வினைகளே.  2  

மங்கை கூறினன் மான் மறி உடை
அங்கை யான் உறை ஆடானை
தங்கை யால்தொழுது ஏத்த வல்லவர்
மங்கு நோய்பிணி மாயுமே.  3  

சுண்ண நீறு அணி மார்பில் தோல்புனை
அண்ண லான் உறை ஆடானை
வண்ண மாமலர் தூவிக் கைதொழ
எண்ணு வார் இடர் ஏகுமே.  4  

கொய் அணிம் மலர்க் கொன்றை சூடிய
ஐயன் மேவிய ஆடானை
கைய ணிம் மலரால் வணங்கிட
வெய்ய வல்வினை வீடுமே.  5  

வான் இளம்மதி மல்கு வார்சடை
ஆன் அஞ்சு ஆடலன் ஆடானை
தேன்  அணிம்மலர் சேர்த்த முன்செய்த
ஊன் உள்ள ஒழியுமே.  6  

துலங்கு வெண்மழு ஏந்திச் சூழ்சடை
அலங்க லான் உறை ஆடானை
நலங்கொள் மாமலர் தூவி நாள் தொறும்
வலங்கொள் வார்வினை மாயுமே.  7  

வெந்த நீறு அணி மார்பில் தோல்புனை
அந்த மில் அவன் ஆடானை
கந்த மாமலர் தூவிக் கைதொழும்
சிந்தை யார்வினை தேயுமே.  8  

மறைவ லாரொடு வான வர்தொழுது 
அறையும் தண்புனல் ஆடானை
உறையும் ஈசனை ஏத்தத் தீவினை
பறையும் நல்வினை பற்றுமே.  9  

மாய னும் மலரானும் கைதொழ
ஆய அந்தணன் ஆடானை
தூய மாமலர் தூவிக் கைதொழத்
தீய வல்வினை தீருமே.  10  

வீடி னார்மலி வேங்க டத்து நின்று 
ஆட லான் உறை ஆடானை
நாடி ஞானசம்பந்தன் செந்தமிழ்
பாட நோய்பிணி பாறுமே.

        

திருச்சிற்றம்பலம்