திரு கானப்பேர்

                  

௨ 

திருஞானசம்பந்தர்சுவாமிகள் அருளிச்செய்த
மூன்றாம்  திருமுறை

தகவல் பலகை	விவரம்
தலம்	திருக்கானப்பேர்
ஊர் /வேறு பெயர்	காளையார் கோவில், சோதிவனம்,  மனதார வனம் , தக்ஷினகாளிபுரம், பூலோக கயிலாயம்
நாடு	பாண்டிய நாடு
ॐசுவாமி	காளீஸ்வரர், சோமேசர்
ॐஅம்பிகை	சொர்ண வல்லி
பாடியவர்கள்	திருஞானசம்பந்தர் (1),         பிடிஎலாம் பின் செலப்  (3-26)  சுந்தரர் (1)         தொண்டர் அடி தொழும் (7-86)
ஸ்தல மரம்	மந்தாரை
தீர்த்தம்	கஜ புஷ்கரணி, காளி தீர்த்தம்
பண்	கொல்லி
குறிப்புகள்	கானபேராயில் என்பது சங்க கால பெயர்  ஐராவதம் வழிபட்ட தலம்  ஈசன் காளை வடிவில் சுந்தரர் முன் தோன்றி, யாம் இருப்பது  "கானப்பேர்" என சொல்லி மறைந்த தலம்.
பதிக பலன்	தீவினை நீங்கும்.
வரிசை எண்.	26                                                                    10/14

திருச்சிற்றம்பலம்

பிடியெலாம் பின்செலப்பெருங்கைமா மலர்தழீஇ
விடியலே தடமூழ்கி விதியினால் வழிபடும்
கடியுலாம் பூம்பொழிற்கானப்பேர் அண்ணல்நின்
அடியலால் அடைசரண்உடையரோ அடியரே.  1  

நுண்ணிடைப் பேரல்குல்நூபுரம் மெல் அடிப்
பெண்ணின் நல்லாளையோர் பாகமாப் பேணினான்
கண்ணுடை நெற்றியான் கருதிய கானப்பேர்
விண்ணிடை வேட்கையார் விரும்புதல் கருமமே.  2  

வாவிவாய்த் தங்கிய நுண்சிறை வண்டினம்
காவிவாய்ப் பண்செயும் கானப்பேர் அண்ணலை
நாவி வாய்ச்சாந்துளும் பூவுளும் ஞானநீர்
தூவிவாய்ப் பெய்து நின்று ஆட்டுவார் தொண்டரே.  3  

நிறையுடை நெஞ்சுளும் நீருளும் பூவுளும்
பறையுடை முழவுளும் பலியுளும் பாட்டுளும்
கறையுடை மிடற்று அண்ணல் கருதிய கானப்பேர்
குறையுடையவர்க்கு அலாற் களைகிலார் குற்றமே.  4  

ஏனப்பூண் மார்பின்மேல் என்புபூண்டு ஈறிலா
ஞானப்பேராயிரம் பேரினான் நண்ணிய
கானப்பே ரூர்தொழுங்காதலார் தீதிலர்
வானப்பே ரூர்புகும் வண்ணமும் வல்லரே.  5  

பள்ளமே படர்சடைப்பாற்படப் பாய்ந்தநீர்
வெள்ளமே தாங்கினான் வெண்மதி சூடினான்
கள்ளமே செய்கிலார் கருதிய கானப்பேர்
உள்ளமே கோயிலா உள்கும் என் உள்ளமே.  6  

மானமா மடப்பிடிவன்கையால் அலகிடக்
கானமார் கடகரிவழிபடும் கானப்பேர்
ஊனமாம் உடம்பினில் உறுபிணி கெடஎண்ணின்
ஞானமா மலர்கொடு நணுகுதல் நன்மையே.  7  

வாளினான் வேலினான் மால்வரை எடுத்ததிண்
தோளினான் நெடுமுடி தொலையவே ஊன்றிய
தாளினான் கானப்பேர்தலையினால் வணங்குவார்
நாளும்நாள் உயர்வதோர் நன்மையைப் பெறுவரே.  8  

சிலையினால் முப்புரம் தீயெழச் செற்றவன்
நிலையிலா இருவரை நிலைமை கண்டு ஓங்கினான்
கலையினார் புறவில்தேன் கமழ்தரு கானப்பேர்
தலையினால் வணங்குவார் தவம் உடை யார்களே.  9  

உறித்தலைச் சுரையொடு குண்டிகை பிடித்து உச்சி
பறித்தலும் போர்த்தலும் பயனிலை பாவிகாள்
மறித்தலை மடப்பிடிவளர் இளங் கொழுங்கொடி
கறித்தெழு கானப்பேர் கைதொழல் கருமமே.  10  

காட்டகத்து ஆடலான் கருதிய கானப்பேர்
கோட்டகத்து இளவரால் குதிகொளும் காழியான்
நாட்டகத்து ஓங்குசீர் ஞானசம் பந்தன
பாட்டகத்து இவை வலார்க்கு இல்லையாம் பாவமே.

திருச்சிற்றம்பலம்