திருப் புனவாயில்

                        

௨ 

திருஞானசம்பந்தர் சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	திருப்புனவாயில்
ஊர் /வேறு பெயர்	விருத்தகாசி, இந்திரபுரம், வஜ்ராவனம், தட்சிண சிதம்பரம்.
நாடு	பாண்டிய நாடு
ॐசுவாமி	விருத்தபுரீஸ்வரர், பழம் பதி நாதர்
ॐஅம்பிகை	பெரியநாயகி
பாடியவர்கள்	திருஞானசம்பந்தர் (1),         மின்னியல் செஞ்சடை   (3-11)        சுந்தரர் (1)         சித்தம் நீநினை (7-50)
ஸ்தல மரம்	புன்னை, மகிழம்,
தீர்த்தம்	இந்திர தீர்த்தம்  உட்பட 10தீர்த்தங்கள்  (பிரம தீர்த்தம், சக்கர தீர்த்தம், சூரிய தீர்த்தம், லட்சுமி தீர்த்தம் சதிர தீர்த்தம், பாம்பாறு, வருண தீர்த்தம், கல்யாண தீர்த்தம், சிவகங்கை)
பண்	பழம் பஞ்சுரம்
குறிப்புகள்	பாண்டிய நாட்டு தலங்கள் அனைத்தும் இங்குள்ளதாக ஐதீகம்.  இங்குள்ள நடராஜ சபை சிவஞான சபை என போற்றப் படுகிறது  14 சிவலிங்கங்கள் உள்ளது சிறப்பு  திருமால், பிரம்மன், இந்திரன் சூரியன் சந்திரன், எமன், ஐராவதம்,வசிஷ்டர், அகத்தியர் ஆகியோர் வழிபட்ட தலம்,
பதிக பலன்	இறையருள் பெற
வரிசை எண்.	11                                                                7/14

திருச்சிற்றம்பலம்

மின்னியல் செஞ்சடை வெண்பிறையன்விரி நூலினன்
பன்னிய நான்மறை பாடி ஆடிப்பல ஊர்கள்போய்
அன்னம்அன் னந்நடை யாளொடும் அமரும் இடம்
புன்னைநன் மாமலர் பொன் உதிர்க்கும்புன வாயிலே. 1  

விண்டவர் தம்புரம் மூன்று எரித்துவிடை ஏறிப்போய்
வண்டம ருங்குழல் மங்கையொடும்மகிழ்ந்தான் இடம்
கண்டலும் ஞாழலும் நின்றுபெருங்கடற் கானல்வாய்ப்
புண்டரீ கம்மலர்ப் பொய்கைசூழ்ந்தபுன வாயிலே.  2  

விடையுடை வெல்கொடி யேந்தினா னும்விறற் பாரிடம்
புடைபட வாடிய வேடத்தானும் புன வாயிலில்
தொடைநவில் கொன்றையந் தாரினானும் சுடர் வெண்மழுப்
படைவலன் ஏந்திய பால்நெய் ஆடும் பரமன் அன்றே.  3  

சங்கவெண் தோடு அணி காதினானும் சடை தாழவே
அங்கை இலங்கு அழல் ஏந்தினானும் அழ காகவே
பொங்கர வம்மணி மார்பினானும்புன வாயிலில்
பைங்கண்வெள் ளேற்று அண்ணலாகி நின்ற பரமேட்டியே.   4

கலிபடு தண்கடல் நஞ்சம் உண்டகறைக் கண்டனும்
புலியதள் பாம்பரைச் சுற்றினானும்புன வாயிலில்
ஒலிதரு தண்புன லோடு  எருக்கும் மத மத்தமும்
மெலிதரு வெண்பிறை சூடிநின்றவிடை ஊர்தியே.  5  

வாருறு மென்முலை மங்கைபாடநடமாடிப்போய்க்
காருறு கொன்றைவெண் திங்களானும்கனல் வாயதோர்
போருறு வெண்மழு ஏந்தினானும்புன வாயிலில்
சீருறு செல்வமல்க அவ்விருந்த சிவ லோகனே.  6  

பெருங்கடல் நஞ்சு அமுது உண்டு உகந்துபெருங்காட்டிடைத்
திருந்திள மென்முலைத் தேவிபாடந் நடமாடிப் போய்ப்
பொருந்தலர் தம்புரம் மூன்றும் எய்துபுன வாயிலில்
இருந்தவன் தன்கழல் ஏத்துவார்கட்கு இடர் இல்லையே.  7  

மனமிகு வேலன் அவ்வாளரக்கன் வலி ஒல்கிட
வனமிகு மால்வரையால் அடர்த்தான் இடம் அன்னிய
இனமிகு தொல்புகழ் பாடல் ஆடல் எழில் மல்கிய
புனமிகு கொன்றையந் தென்றல் ஆர்ந்தபுன வாயிலே.  8  

திருவளர் தாமரை மேவினானும் திகழ் பாற்கடல்
கருநிற வண்ணனும்  காண்பரிய கட வுள் இடம்
நரல்சுரி சங்கொடும் இப்பியுந்து இந்நலம் மல்கிய
பொருகடல் வெண் திரை வந்து எறியும்புன வாயிலே.  9  

போதி எனப் பெயர் ஆயினாரும் பொறியில் சமண்
சாதி உரைப்பன கொண்டு அயர்ந்து தளர்வு எய்தன்மின்
போது அவிழ் தண்பொழில் மல்குமந்தண்புன வாயிலில்
வேதனை நாள்தொறும் ஏத்துவார் மேல்வினை வீடுமே.  10 

பொற்றொடியாள் உமை பங்கன்மேவும்புன வாயிலைக்
கற்றவர் தாம் தொழுது ஏத்த நின்ற கடற் காழியான்
நற்றமிழ் ஞானசம் பந்தன்சொன்னதமிழ் நன்மையால்
அற்றமில் பாடல்பத்து ஏத்தவல்லார் அருள் சேர்வரே.

        

திருச்சிற்றம்பலம்