திருப்புனவாயில்

                       

௨ 

சுந்தரமூர்த்தி சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திருப்புனவாயில்
ஊர் /வேறு பெயர்	விருத்தகாசி, இந்திரபுரம், வஜ்ராவனம், தட்சிண சிதம்பரம்.
நாடு	பாண்டிய நாடு
ॐசுவாமி	விருத்தபுரீஸ்வரர், பழம் பதி நாதர்
ॐஅம்பிகை	பெரியநாயகி
பாடியவர்கள்	திருஞானசம்பந்தர் (1),         மின்னியல் செஞ்சடை   (3-11)        சுந்தரர் (1)         சித்தம் நீநினை (7-50)
ஸ்தல மரம்	புன்னை, மகிழம்,
தீர்த்தம்	இந்திர தீர்த்தம்  உட்பட 10தீர்த்தங்கள்  (பிரம தீர்த்தம், சக்கர தீர்த்தம், சூரிய தீர்த்தம், லட்சுமி தீர்த்தம் சதிர தீர்த்தம், பாம்பாறு, வருண தீர்த்தம், கல்யாண தீர்த்தம், சிவகங்கை)
பண்	பழம் பஞ்சுரம்
குறிப்புகள்	பாண்டிய நாட்டு தலங்கள் அனைத்தும் இங்குள்ளதாக ஐதீகம்.  இங்குள்ள நடராஜ சபை சிவஞான சபை என போற்றப் படுகிறது  14 சிவலிங்கங்கள் உள்ளது சிறப்பு  திருமால், பிரம்மன், இந்திரன் சூரியன் சந்திரன், எமன், ஐராவதம்,வசிஷ்டர், அகத்தியர் ஆகியோர் வழிபட்ட தலம்,
பதிக பலன்	குற்றம் நீங்க
வரிசை எண்.	50                                                              7/14

திருச்சிற்றம்பலம்

சித்தம் நீநினை என்னொடு சூளறும் வைகலும்
மத்த யானையின் ஈர் உரி போர்த்த மணாளன் ஊர்
பத்தர் தாம்பலர் பாடிநின்று  ஆடும் பழம்பதி
பொத்தில் ஆந்தைகள் பாட்டு அறாப்புன வாயிலே.  1  

கருது நீமனம் என்னொடு சூளறும் வைகலும்
எருது மேற்கொளும் எம்பெருமாற்கு இடம் ஆவது
மருத வானவர் வைகும் இடம்மற வேடுவர்
பொருது சாத்தொடு பூசல் அறாப்புன வாயிலே.  2  

தொக்காய் மனம் என்னொடு சூளறும் வைகலும்
நக்கான் நமை ஆளுடையான் நவி லும் இடம்
அக்கோடு அரவு  ஆர்த்த பிரான் அடிக்கு அன்பராய்ப்
புக்கார் அவர் போற்றொழியாப்புன வாயிலே.  3  

வற்கென் றிருத்திகண்டாய் மனம் என்னொடு சூளறும்வைகலும்  
பொற்குன்றஞ் சேர்ந்ததோர் காக்கைபொன்னாம் அதுவேபுகல்
கற்குன்றும் ஊறும் கடுவெளியும் கடற் கானல்வாய்ப்
புற்கென்று தோன்றிடும் எம்பெருமான் புனவாயிலே.  4  

நில்லாய் மனம் என்னொடு சூளறும் வைகலும்
நல்லான் நமை யாளுடையான்நவிலும் இடம்
வில்லாய்க் கணை வேட்டுவர் ஆட்ட வெருண்டுபோய்ப்
புல்வாய்க் கணம் புக்கொளிக்கும்புன வாயிலே.  5  

மறவல் நீமனம் என்னொடு சூளறும் வைகலும்
உறவும் ஊழியும் ஆய பெம்மாற்கு இட மாவது
பிறவு கள்ளியின் நீள்கவட்டேறித்தன் பேடையைப்
புறவங் கூப்பிடப் பொன்புனம்சூழ்புன வாயிலே.  6  

ஏசற்று நீநினை யென்னொடுசூளறும் வைகலும்
பாசற் றவர் பாடிநின்று ஆடும் பழம்பதி
தேசத்து அடியவர் வந்திரு போதும் வணங்கிடப்
பூசல் துடி பூசல் அறாப் புன வாயிலே.  7  

கொள்ளி வாயின கூரெயிற்று ஏனம் கிழிக்கவே
தெள்ளி மாமணி தீவிழிக்கும் இடம் செந்தறை
கள்ளி வற்றிப் புல் தீந்துவெங்கானங் கழிக்கவே
புள்ளி மான் இனம் புக்கொளிக்கும் புன வாயிலே.  8  

எற்றே நினை என்னொடுஞ்சூளறும் வைகலும்
மற்றேதும் வேண்டா வல்வினை ஆயின மாய்ந்தறக்கு 
அற்றூறு கார்க் காட்டிடைமேய்ந்தகார்க் கோழிபோய்ப்
புற்று ஏறிக் 'கூகூ' எனஅழைக்கும்புன வாயிலே.  9  

பொடியாடு மேனியன் பொன்புனஞ் சூழ்புன வாயிலை
அடியார் அடியன் நாவல் ஊரன் உரைத்தன
மடியாது கற்று இவை ஏத்த வல்லார்வினை மாய்ந்துபோய்க்
குடியாகப் பாடிநின்று ஆடவல்லார்க்கு இல்லை குற்றமே.

        

திருச்சிற்றம்பலம்