திரு எருக்கத்தம்புலியூர்

                        

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திரு எருக்கத்தம் புலியூர்
ஊர் /வேறு பெயர்	இராஜேந்திர பட்டினம்
நாடு	நடு நாடு
ॐசுவாமி	நீலகண்டேசர்
ॐஅம்பிகை	நீலமலர்க் கண்ணி, நீலோற்பலாம்பாள்
பாடியவர்கள்	திருஞானசம்பந்தர் (1),         படையார் தரு பூத  (1-89)
ஸ்தல மரம்	வெள்ளெருக்கு
தீர்த்தம்	நீலோற்பல தீர்த்தம்
பண்	குறிஞ்சி
குறிப்புகள்	திருநீலகண்ட யாழ்ப்பாண நாயனார் திரு அவதார தலம்  புலிக்கால் முனிவராகிய வியாக்ரபாதர் பூசித்த தலங்கள் ஐந்தில் ஒன்று  உருத்திரசன்மர் ஈசனை வழிபாட்டு வாய் பேச முடியாத நிலை நீங்க பெற்ற தலம்
பதிக பலன்	சிவ பதவி கிடைக்கும்.
வரிசை எண்.	89                                                                 4/22

திருச்சிற்றம்பலம்

படையார் தருபூதப் பகடார் உரிபோர்வை
உடையான் உமையோடும் உடனாய் இடுகங்கைச்
சடையான் எருக்கத்தம் புலியூர்த் தகுகோயில்
விடையான் அடி ஏத்த மேவா வினைதானே.  1  

இலையார் தருசூலப் படை எம் பெருமானாய்
நிலையார் மதில்மூன்று நீறாய் விழவெய்த
சிலையான் எருக்கத்தம் புலியூர்த் திகழ்கோயில்
கலையான் அடி ஏத்தக் கருதா வினைதானே.  2  

விண்ணோர் பெருமானே விகிர்தா விடையூர்தீ
பெண்ணாண் அலியாகும் பித்தா பிறைசூடீ
எண்ணார் எருக்கத்தம் புலியூர் உறைகின்ற
அண்ணா எனவல்லார்க்கு அடையா வினைதானே.  3  

அரையார் தருநாகம் அணிவான் அலர்மாலை
விரையார் தருகொன்றை உடையான் விடைஏறி
வரையான் எருக்கத்தம் புலியூர் மகிழ்கின்ற
திரையார் சடையானைச் சேரத் திருவாமே.  4  

வீறார் முலையாளைப் பாகம் மிகவைத்துச்
சீறா வருகாலன் சினத்தை அழிவித்தான்
ஏறான் எருக்கத்தம் புலியூர் இறையானை
வேறா நினைவாரை விரும்பா வினைதானே.  5  

நகுவெண் தலை ஏந்தி நானா விதம்பாடிப்
புகுவாம் அயம்பெய்யப் புலித்தோல் பியற்கிட்டுத்
தகுவான் எருக்கத்தம் புலியூர்த் தகைந்து அங்கே
தொகுவான் கழல் ஏத்தத் தொடரா வினைதானே.  6  

இப்பதிகத்தில் 7-ஆம் பாடல் கிடைக்கப்பெறவில்லை.  7  

ஆவா எனஅரக்கன் அலற அடர்த்திட்டுத்
தேவா எனஅருளார் செல்வம் கொடுத்திட்ட
கோவே எருக்கத்தம் புலியூர் மிகுகோயில்
தேவே என அல்லல் தீர்தல் திடமாமே.  8  

மறையான் நெடுமால்காண் பரியான் மழு ஏந்தி
நிறையா மதிசூடி நிகழ்முத் தின்தொத்தே
இறையான் எருக்கத்தம் புலியூர் இடம் கொண்ட
கறையார்மிடற்றானைக் கருதக் கெடும்வினையே.  9  

புத்தர் அருகர்தம் பொய்கள் புறம்போக்கிச்
சுத்தி தரித்துறையுஞ் சோதி உமையோடும்
நித்தன் எருக்கத்தம் புலியூர் நிகழ்வாய
அத்தன் அறவன்தன் அடியே அடைவோமே.  10  

ஏரார் எருக்கத்தம் புலியூர் உறைவானைச்
சீரார் திகழ்காழித் திருவார் சம்பந்தன்   
ஆரா அருந்தமிழ் மாலை யிவைவல்லார் 
பாரார்  அவர் ஏத்தப் பதிவான் உறைவாரே.

திருச்சிற்றம்பலம்