திரு ஆப்பனூர்

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திரு ஆப்பனூர்
ஊர் /வேறு பெயர்	நெல்லை/ வேணுவனம், சாலிநகர், ஆப்புடையார் கோவில்
நாடு	பாண்டிய நாடு
ॐசுவாமி	ஆப்புடையார், அன்ன விநோதர்
ॐஅம்பிகை	சுகந்த குந்தளாம்பிகை
பாடியவர்கள்	திருஞானசம்பந்தர் (1)         முற்றும் சடை முடிமேல் (1-88)
ஸ்தல மரம்	அரச மரம்
தீர்த்தம்	இடப தீர்த்தம், வைகை
பண்	குறிஞ்சி
குறிப்புகள்	ஆற்று மணலை அன்னமாக மாற்றிய தலம்.
பதிக பலன்	மன தடுமாற்றம் விலகும். மூட்டு வலி பிரச்சனை உள்ளவர்கள் படனம் செய்து நிவர்த்தி பெறலாம்.
வரிசை எண்.	88                                                                2/14

திருச்சிற்றம்பலம்

முற்றும்  சடைமுடிமேல்  

        முதிரா இளம்பிறையன்
ஒற்றைப் படஅரவம்  அதுகொண்டு 

        அரைக்கு அணிந்தான்
செற்றமில் சீரானைத் 

        திருஆப்பனூரானைப்
பற்று மனமுடையார் 

        வினைபற்று அறுப்பாரே.  1  

குரவங் கமழ்குழலாள் 

        குடிகொண்டு நின்றுவிண்ணோர்
விரவும் திருமேனி 

        விளங்கும் வளை எயிற்றின்
அரவம் அணிந்தானை 

        அணி ஆப்பனூரானைப்
பரவு மனமுடையார் 

        வினைபற்று அறுப்பாரே.  2  

முருகு விரிகுழலார் 

        மனங்கொள் அநங்கனைமுன்
பெரிது முனிந்து  உகந்தான் 

        பெருமான் பெருங்காட்டின்
அரவம் அணிந்தானை 

        அணி ஆப்பனூரானைப்
பரவு மனமுடையார் 

        வினைபற்று அறுப்பாரே.  3  

பிணியும் பிறப்பு அறுப்பான் 

        பெருமான் பெருங்காட்டில்
துணியின் உடைதாழச் 

        சுடர் ஏந்தி ஆடுவான்
அணியும் புனலானை 

        அணி ஆப்பனூரானைப்
பணியும் மனமுடையார் 

        வினைபற்று அறுப்பாரே. 4  

தகரம் அணி அருவித்

        தடமால் வரைசிலையா
நகரம் ஒருமூன்றும் 

        நலங்குன்ற வென்று உகந்தான்
அகர முதலானை 

        அணி ஆப்பனூரானைப்
பகரு மனம் உடையார் 

        வினைபற்று அறுப்பாரே.  5  

ஓடும் திரிபுரங்கள் 

        உடனே உலந்து அவியக்
காடது இடமாகக் கனல்

        கொண்டு நின்று இரவில்
ஆடுந் தொழிலானை 

        அணி ஆப்பனூரானைப்
பாடு மனம் உடையார் 

        வினைபற்று அறுப்பாரே.  6  

இயலும் விடைஏறி 

        எரிகொள் மழுவீசிக்
கயலின்  இணைக்கண்ணாள் 

        ஒருபால் கலந்து ஆட
இயலும் இசையானை 

        எழில் ஆப்ப னூரானைப்
பயிலு மனமுடையார் 

        வினைபற்று அறுப்பாரே.  7  

கருக்கு மணிமிடறன் 

        கதநாகக் கச்சையினான்
உருக்கும் அடியவரை 

        ஒளிவெண் பிறைசூடி
அரக்கன் திறல் அழித்தான் 

        அணி ஆப்பனூரானைப்
பருக்கு மனம் உடையார் 

        வினைபற்று அறுப்பாரே.  8  

கண்ணன் கடிக்கமல 

        மலர்மேல் இனிது உறையும்
அண்ணற்கு அளப்பரிதாய் நின்று 

        அங்குக் அடியார்மேல்
எண்ணில் வினைகளைவான் 

        எழில் ஆப்பனூரானைப்
பண்ணின் இசைபகர்வார் 

        வினைபற்று அறுப்பாரே.  9  

செய்ய கலிங்கத்தார் 

        சிறுதட்டு உடையார்கள்
பொய்யர் புறங்கூறப் 

        புரிந்த அடியாரை
ஐயம் அகற்றுவான் 

        அணி ஆப்பனூரானைப்
பைய நினைந்து எழுவார் 

        வினைபற்று அறுப்பாரே.  10  

அந்தண் புனல்வைகை 

        அணி ஆப்பனூர்மேய
சந்த மலர்க்கொன்றை 

        சடைமேல் உடையானை
நந்தி அடிபரவும் 

        நலஞான சம்பந்தன்
சந்தம் இவைவல்லார் 

        தடுமாற்று அறுப்பாரே.

    

திருச்சிற்றம்பலம்