திரு பரங்குன்றம்

 

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திருப்பரங்குன்றம்
ஊர் /வேறு பெயர்
நாடு	பாண்டிய நாடு
ॐசுவாமி	பரங்கிரிநாதர், சத்தியகிரீஸ்வரர்
ॐஅம்பிகை	ஆவுடை நாயகி
பாடியவர்கள்	திருஞானசம்பந்தர் (1)         நீடலர் சோதி  (1-100) சுந்தரர் (1)         கோத்திட்டையும் (7-02)
ஸ்தல மரம்	கிளுவை மரம்
தீர்த்தம்	லட்சுமி தீர்த்தம், சரவண பொய்கை
பண்	குறிஞ்சி
குறிப்புகள்	முருகப் பெருமானின் அறுபடை வீடுகளில் ஒன்று  நக்கீரர் வாழ்ந்த திருத்தலம்  சிபி சக்கரவர்த்தி, பிரமன், நக்கீரர் வழிபட்ட தலம்
பதிக பலன்	திருவருள் பெறுவர்
வரிசை எண்.	100                                                                3/14

திருச்சிற்றம்பலம்

நீடலர்சோதி வெண்பிறையோடு நிரைகொன்றை

சூடலன்அந்திச் சுடர் எரி ஏந்திச் சுடுகானில்

ஆடலன்அஞ்சொல் அணி இழையாளை ஒருபாகம்

பாடலன்மேய நன்னகர்போலும் பரங்குன்றே.  1  

அங்கம் ஒறு ஆறும் அருமறைநான்கும் அருள்செய்து

பொங்குவெண் நூலும் பொடி அணிமார்பிற் பொலிவித்துத்

திங்களும் பாம்புந் திகழ் சடைவைத்தோர் தேன்மொழி

பங்கினன்மேய நன்னகர்போலும் பரங்குன்றே.  2  

நீரிடம் கொண்ட நிமிர்சடைதன்மேல் நிரைகொன்றை

சீரிடம் கொண்ட எம் இறைபோலும் சேய்தாய

ஓர் உடம்பு உள்ளே உமை ஒருபாகம் உடனாகிப்

பாரிடம்பாட இனிது உறைகோயில் பரங்குன்றே.  3 

வளர்பூங் கோங்கம் மாதவியோடு மல்லிகைக்

குளிர் பூஞ்சாரல் வண்டறைசோலைப் பரங்குன்றம்

தளிர்போல்மேனித் தையல்நல்லாளோடு ஒருபாகம்

நளிர்பூங்கொன்றை சூடினன்மேய நகர்தானே.  4 

பொன்னியல்கொன்றை பொறிகிளர்நாகம் புரிசடைத்

துன்னியசோதி ஆகியஈசன் தொல் மறை

பன்னியபாடல் ஆடலன்மேய பரங்குன்றை

உன்னிய சிந்தை உடையவர்க்கு இல்லை உறுநோயே.  5 

கடைநெடுமாடக் கடி அரண் மூன்றும்  கனல்மூழ்கத்

தொடைநவில்கின்ற வில்லினன்அந்திச் சுடுகானில்

புடைநவில்பூதம் பாடநின்று ஆடும் பொருசூலப்

படைநவில்வான் தன் நன்னகர்போலும் பரங்குன்றே.  6 

அயில் உடைவேலோர் அனல்புல்குகையின் அம்பு ஒன்றால்

எயில்பட எய்த எம் இறை மேய இடம்போலும்

மயில்பெடைபுல்கி  மாநடம் ஆடும் வளர்சோலைப்

பயில் பெடைவண்டு பாடல் அறாத பரங்குன்றே.  7  

மைத்தகுமேனி வாளரக்கன் தன் மகுடங்கள்

பத்தினதிண்தோள் இருபதும் செற்றான் பரங்குன்றைச்

சித்தம் அது ஒன்றிச் செய்கழல் உன்னிச் சிவன் என்று

நித்தலும் ஏத்தத் தொல்வினை நம்மேல் நில்லாவே.  8 

முந்தி இவ்வையந் தாவியமாலும் மொய் ஒளி

உந்தியில்வந்து இங்கு அருமறை ஈந்த உரவோனும்

சிந்தையினாலும்  தெரிவு அரிதாகித் திகழ்சோதி

பந்தியல்அங்கை மங்கை ஓர் பங்கன் பரங்குன்றே.  9

குண்டாய் முற்று திரிவார் கூறை மெய் போர்த்து

மிண்டாய் மிண்டர் பேசியபேச்சு மெய் அல்ல

பண்டால்நீழல் மேவியஈசன் பரங்குன்றைத்

தொண்டால் ஏத்தத் தொல்வினைநம்மேல் நில்லாவே.  10

தடமலிபொய்கைச் சண்பைமன் ஞான சம்பந்தன்

படமலிநாகம் அரைக்கு அசைத்தான் தன் பரங்குன்றைத்

தொடைமலிபாடல் பத்தும்வல்லார்தம் துயர்போகி

விடமலிகண்டன் அருள்பெறுந்தன்மை மிக்கோரே.

    

திருச்சிற்றம்பலம்