திருமந்திரம் 1-10 நல்குரவு

          

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	10
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	10. நல்குரவு
பிற குறிப்புகள்	வறுமை

திருச்சிற்றம்பலம்

புடைவை கிழிந்தது போயிற்று வாழ்க்கை

அடையப்பட் டார்களும் அன்பு இலர் ஆனார்

கொடை இல்லை கோள் இல்லை கொண்டாட்டம் இல்லை

நடை இல்லை நாட்டில் இயங்குகின் றார்கட்கே.  1  

பொய்க்குழி தூர்ப்பான் புலரி புலருதென்று

அக்குழி தூர்க்கும் அரும்பண்டம் தேடுவீர்

எக்குழி தூர்த்தும் இறைவனை ஏத்துமின்

அக்குழி தூரும் அழுக்கு அற்ற போதே.  2  

கற்குழி தூரக் கனகமும் தேடுவர்

அக்குழி தூர்க்கை யாவர்க்கும் அரியது

அக்குழி தூர்க்கும் அறிவை அறிந்தபின்

அக்குழி தூரும் அழுக்கு அற்ற வாறே.  3  

தொடர்ந்து  எழு சுற்றம் வினையினும் தீய

கடந்தது ஓர் ஆவி கழிவதன் முன்னே

உடந்து ஒரு காலத்து உணர்விளக்கு ஏற்றித்

தொடர்ந்துநின்று அவ்வழி தூர்க்கலும் ஆமே.  4  

அறுத்தன ஆறினும் ஆனினம் மேவி

அறுத்தனர் ஐவரும் எண்ணிலி துன்பம்

ஒறுத்தன வல்வினை ஒன்றல்ல வாழ்வை

வெறுத்தனன் ஈசனை வேண்டிநின் றேனே.  5

திருச்சிற்றம்பலம்