திரு வெண்பாக்கம்

                      

௨ 

சுந்தரமூர்த்தி  சுவாமிகள் அருளிச்செய்த
ஏழாம் திருமுறை

தகவல் பலகை	விவரம்
தலம்	திரு வெண்பாக்கம்
ஊர்
நாடு	தொண்டை நாடு
ॐசுவாமி	வெண்பாக்க நாதர்
ॐஅம்பிகை	கனிவாய் மொழி
பாடியவர்கள்	சுந்தரர் (1)          பிழை உளன  (7-89)
ஸ்தல மரம்
தீர்த்தம்
பண்	சீகாமரம்
குறிப்புகள்	சுந்தரருக்கு ஊன்று கோல் அளித்த தலம்  உளம் போகீர் என்று இறைவன் அருளிய தலம்.
பதிக பலன்	வலிய வினைகள் வந்து சேராது.
வரிசை எண்.	89                                                         17/32

திருச்சிற்றம்பலம்

          

பிழை உளன பொறுத்திடுவர்
          என்று அடியேன் பிழைத்தக்கால்
பழி அதனைப் பாராதே
          படலம் என் கண் மறைப்பித்தாய்
குழை விரவு வடிகாதா 
          கோயிலுளாயே என்ன
உழை உடையான் உள்ளிருந்து
          "உளோம் போகீர்" என்றானே.     1  

இடை அறியேன் தலை அறியேன்
          எம்பெருமான் சரணம் என்பேன்
நடை உடையன் நம் அடியான்
          என்று அவற்றைப் பாராதே
விடை உடையான் விடநாகன்
          வெண்ணீற்றன் புலியின் தோல்
உடை உடையான் எனை உடையான்
          "உளோம் போகீர்" என்றானே.     2  

செய்வினை ஒன்று அறியாதேன்
          திருவடியே சரண் என்று
பொய் அடியேன் பிழைத்திடினும்
          பொறுத்திடநீ வேண்டாவோ
பையரவா இங்கிருந்தாயோ
          என்னப் பரிந்து என்னை
உய்யஅருள் செய்யவல்லான்
          "உளோம் போகீர்" என்றானே.    3  

கம்பமரும்  கரி உரியன்
          கறைமிடற்றன் காபாலி
செம்பவளத் திரு உருவன்
          சேய் இழையோடு உடனாகி
நம்பி இங்கே இருந்தீரே
          என்றுநான் கேட்டலுமே
உம்பர்தனித் துணை எனக்கு
          "உளோம் போகீர்" என்றானே.     4  

பொன் இலங்கு நறுங்கொன்றை
          புரிசடைமேல்  பொலிந்து இலங்க
மின் இலங்கு நுண் இடையாள்
          பாகமா எருது ஏறித்
துன்னி இரு பால்அடியார்
          தொழுது ஏத்த அடியேனும்
உன்னதமாய்க் கேட்டலுமே
          "உளோம் போகீர்" என்றானே.     5  

கண்ணுதலால் காமனையும்
          காய்ந்ததிறல் கங்கைமலர்
தெண்ணிலவு செஞ்சடைமேல்
          தீமலர்ந்த கொன்றையினான்
கண்மணியை மறைப்பித்தாய்
          இங்கிருந்தாயோ என்ன
ஒண்ணுதலி பெருமானார்
          "உளோம் போகீர்" என்றானே.     6  

பார் நிலவு மறையோரும்
          பத்தர்களும் பணிசெய்யத்
தார் நிலவு நறுங்கொன்றைச்
          சடையனார் தாங்கரிய
கார்நிலவு மணிமிடற்றீர்
          இங்கு இருந்தீரே என்ன
ஊர் அரவம் அரைக்கு அசைத்தான்
          "உளோம் போகீர்" என்றானே.     7  

வார் இடங்கொள் வனமுலையாள்
          தன்னோடு மயானத்துப்
பார் இடங்கள் பலசூழப்
          பயின்று ஆடும் பரமேட்டி
கார் இடம் கொள் கண்டத்தன்
          கருதும் இடம்  திருஒற்றியூர் 
இடம் கொண்டு இருந்தபிரான்
          "உளோம் போகீர்" என்றானே.     8  

பொன் நவிலும்  கொன்றையினாய்
          போய் மகிழ்க் கீழ் இரு என்று
சொன்ன எனைக் காணாமே
          சூளறவு மகிழ்க்கீழே
என்ன வல்ல பெருமானே
          இங்கிருந்தா யோ என்ன
ஒன்னலரைக் கண்டார் போல்
          "உளோம் போகீர்" என்றானே.     9  

மான் திகழும் சங்கிலியைத்
          தந்துவரு பயன்கள் எல்லாம்
தோன்ற அருள் செய்து அளித்தாய்
          என்று உரைக்க உலகம் எலாம்
ஈன்றவனே வெண்கோயில்
          இங்கிருந்தாயோ என்ன
ஊன்றுவதோர் கோல் அருளி
          "உளோம் போகீர்" என்றானே.    10  

ஏராரும் பொழில் நிலவு
          வெண்பாக்கம் இடம் கொண்ட
காராறும் மிடாற்றானைக்
          காதலித்திட்டு அன்பினொடும்
சீராரும் திருவாரூர்ச்
          சிவன்பேர்சென் னியில்வைத்த
ஆரூரன் தமிழ்வல்லார்க்கு 
          அடையா வல்வினை தானே..

திருச்சிற்றம்பலம்