திருமந்திரம் - 1.21 கேள்வி கேட்டமைதல்

                    

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	21
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	21. கேள்வி கேட்டு அமைதல்
பிற குறிப்புகள்	கேட்க தக்கன கேட்டல்

திருச்சிற்றம்பலம்

                  

அறம் கேட்டும் அந்தணர் வாய்மொழி கேட்டும்

மறம் கேட்டும் வானவர் மந்திரம் கேட்டும்

புறம்கேட்டும் பொன் உரை மேனிஎம் ஈசன்

திறம்  கேட்டும் பெற்ற சிவகதி தானே.  1  

தேவர் பிரானைத் திவ்விய மூர்த்தியை

யாவர் ஒருவர் அறிவார் அறிந்தபின்

ஓதுமின் கேள்மின் உணர்மின் உணர்ந்தபின்

ஓதி உணர்ந்தவர் ஓங்கி நின்றாரே.  2  

மயன்பணி கேட்பது மாநந்தி வேண்டின்

அயன்பணி கேட்பது அரன்பணி யாலே

சிவன்பணி கேட்பவர் தேவரும் ஆவர்

பயன்பணி கேட்பது பற்றது ஆமே.  3  

பெருமான் இவன் என்று பேசி இருக்கும்

திருமானிடர் பின்னைத் தேவரும் ஆவர்

வருமா தவர்க்கு மகிழ்ந்து அருள் செய்யும்

அருமா தவத்து எங்கள் ஆதிப் பிரானே.  4  

ஈசன் அருளும் இறப்பும் பிறப்பையும்

பேசி இருந்து பிதற்றி மகிழ்வு எய்தி

நேசமும் ஆகும் நிகழ் ஒளியாய்நின்று

வாச மலர்க்கந்தம் மன்னிநின் றானே.  5  

விழுப்பமும் கேள்வியும் மெய்நின்ற ஞானத்து

ஒழுக்கமும் சிந்தை உணர்கின்ற போது

வழுக்கி விடாவிடில் வானவர் கோனும்

இழுக்கு இன்றி எண்ணிலி காலம் அது ஆமே.  6  

சிறியார் மணற்சோற்றில் தேக்கிடு மாபோல்

செறிவால் அனுபோகம் சித்திக்கும் என்னில்

குறியாதது ஒன்றைக் குறியாதார் தம்மை

அறியாது இருந்தார் அவராவர் அன்றே.  7  

உறுதுணை யாவது உயிரும் உடம்பும்

உறுதுணை யாவது உலகு உறு கேள்வி

செறிதுணை யாவது சிவனடிச் சிந்தை

பெறுதுணை கேட்கிற் பிறப்பில்லை தானே.  8  

புகழ நின்றார்க்கும் புராணன்எம் ஈசன்

இகழ நின் றார்க்கும் இடும்பைக்கு இடமாம்

மகிழ நின்று ஆதியை ஓதி உணராக்

கழியநின் றார்க்கு ஒரு கற்பசு ஆமே.  9  

வைத்து உணர்ந்தான் மனத்தொடும் வாய் பேசி

ஒத்து உணர்ந்தான் உரு ஒன்றொடு ஒன்று ஒவ்வாது

அச்சுஉழன்று ஆணி கலங்கினும் ஆதியை

நச்சு உணர்ந்தார்க்கே நணுகலும் ஆமே.  10 

திருச்சிற்றம்பலம்