திருமந்திரம் - 1.22 கல்லாமை

                     

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	22
தந்திரம்	முதல் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	22. கல்லாமை
பிற குறிப்புகள்	சிவானுபவம் பெறாமை

திருச்சிற்றம்பலம்

                  

கல்லா தவரும் கருத்து அறி காட்சியை

வல்லார் எனில்அருட் கண்ணான் மதித்துளோர்

கல்லாதார் உண்மை பற்றா நிற்பர் கற்றோரும்

கல்லாதார் இன்பம் காணுகி லாரே.  1  

வல்லார்கள் என்றும் வழி ஒன்றி வாழ்கின்றார்

அல்லாதவர்கள் அறிவு பலஎன்பார்

எல்லா இடத்தும் உளன்எங்கள் தம் இறை

கல்லா தவர்கள் கலப்பு அறி யாரே.  2  

நில்லா நிலையை நிலையாக நெஞ்சத்து

நில்லாக் குரம்பை நிலை என்று உணர்வீர்காள்

எல்லா உயிர்க்கும் இறைவனே ஆயினும்

கல்லாதார் நெஞ்சத்துக் காணஒண் ணாதே.  3  

கில்லேன் வினைத்துய ராக்கும் அயல் ஆனேன்

கல்லேன் அரநெறி அறியாத் தகைமையின்

வல்லேன் வழங்கும் பொருளே மனத்தினுள்

கல்லேன் கழியநின்று ஆடவல் லேனே.  4  

நில்லாது சீவன் நிலை அன்று எனஎண்ணி

வல்லார் அறத்தும் தவத்துளும் ஆயினார்

கல்லா மனித்தர் கயவர் உலகினில்

பொல்லா வினைத்துயர் போகம்செய் வாரே.  5  

விண்ணினின் உள்ளே விளைந்த விளங்கனி

கண்ணினின் உள்ளே கலந்துஅங் கிருந்தது

மண்ணினின் உள்ளே மதித்து மதித்துநின்று 

எண்ணி எழுதி இளைத்துவிட் டாரே.  6  

கணக்கு அறிந்தார்க்கு அன்றிக் காணஒண் ணாதது

கணக்கு அறிந்தார்க்கு அன்றிக் கைகூடா காட்சி

கணக்கு அறிந்து உண்மையைக் கண்டுஅண்ட நிற்கும்

கணக்கு அறிந்தார் கல்வி கற்று அறிந்தாரே.  7  

கல்லாத மூடரைக் காணவும் ஆகாது

கல்லாத மூடர்சொல் கேட்கக் கடன்அன்று

கல்லாத மூடர்க்குக் கல்லாதார் நல்லராம்

கல்லாத மூடர் கருத்தறி யாரே.  8  

கற்றும் சிவஞானம் இல்லாக் கலதிகள்

சுற்றமும் வீடார் துரிசுஅறார் மூடர்கள்

மற்றும் பலதிசை காணார் மதியிலோர்

கற்று அன்பில் நிற்போர் கணக்கு அறிந் தார்களே.  9  

ஆதிப் பிரான்அம ரர்க்கும் பரஞ்சுடர்

சோதி அடியார் தொடரும் பெருந்தெய்வம்

ஓதி உணரவல் லோம்என்பர் உள்நின்ற

சோதி நடத்தும் தொடர்வு அறி யாரே.  10 

திருச்சிற்றம்பலம்