திரு மாந்துறை

௨ 

திருஞானசம்பந்தர்சுவாமிகள்   அருளிச்செய்த
இரண்டாம்  திருமுறை 

தகவல் பலகை	விவரம்
தலம்	திரு மாந்துறை
பிற பெயர்கள்	ஆம்ர வனம், பிரம்மானந்த புரம், மிருகண்டீஸ்வரம்
நாடு	சோழ நாடு (வ)
ॐசுவாமி	ஆம்ரவநேஸ்வரர்
ॐஅம்பிகை	அழகம்மை, பாலாம்பிகை
பாடியவர்கள்	சம்பந்தர் (1)         செம்பொன் ஆர் தரு (2-110)
ஸ்தல மரம்	மாமரம்
தீர்த்தம்	காயத்திரி நதி
பண்	நட்டராகம்
குறிப்புகள்	சூரியன் சந்திரன், இந்திரன் வழிபட்டது வழிபட்டது  மருதவானவர், மிருகண்டு முனிவர் வழிபட்டது.  இது வடகரை மாந்துறை,  தென்கரை மாந்துறை வேறு, கும்பகோணம் அருகில் உள்ளது.
பதிக பலன்	துன்பமும் இல்லை. பாவமும் இல்லை.
வரிசை எண்.	110                                                      58/63

திருச்சிற்றம்பலம்          

செம்பொ னார்தரு வேங்கையும்
          ஞாழலும் செருந்தி செண்பகம் ஆனைக்
கொம்பும் ஆரமும் மாதவி
          சுரபுனை குருந்தலர் பரந்துந்தி
அம்பொன் நேர்வரு காவிரி
          வடகரை மாந்துறை உறைகின்ற
எம்பிரான் இமை யோர் தொழு
          பைங்கழல் ஏத்துதல் செய்வோமே.  1  

விளவு தேனொடு சாதியின்
          பலங்களும் வேய்மணி நிரந்துந்தி
அளவி நீர்வரு காவிரி
          வடகரை மாந்துறை உறைவானத்
துளவ மால் மகனை ஐங்கணைக்
          காமனைச் சுடவிழித்தவன் நெற்றி
அளக வாள் நுதல் அரிவைதன்
          பங்கனை அன்றி மற்று அறியோமே.  2  

கோடு தேன்சொரி குன்றிடைப்
          பூகமுங் கூந்தலின் குலைவாரி
ஓடு நீர்வரு காவிரி வடகரை
          மாந்துறை உறைநம்பன்
வாடினார் தலையில் பலி
          கொள்பவன் வானவர் மகிழ்ந்து ஏத்தும்
கேடி லாமணி யைத்தொழல்
          அல்லது கெழுமுதல் அறியோமே.  3  

இலவ ஞாழலும் ஈஞ்சொடு
          சுரபுன்னை இளமருது இலவங்கம்
கலவி நீர்வரு காவிரி
          வடகரை மாந்துறை உறைகண்டன்
அலைகொள் வார்புனல் அம்புலி
          மத்தமும் ஆடரவுடன்வைத்த
மலையை வானவர் கொழுந்தினை
          அல்லது வணங்குதல் அறியோமே.  4  

கோங்கு செண்பகம் குருந்தொடு
          பாதிரி குரவிடை மலர் உந்தி
ஓங்கி நீர்வரு காவிரி
          வடகரை மாந்துறை உறைவானைப்
பாங்கி னால் இடும் தூபமும்
          தீபமும் பாட்ட விம்மலர் சேர்த்தித்
தாங்குவார் அவர் நாமங்கள்
          நாவினில் தலைப்படும் தவத்தோரே.  5  

பெருகு சந்தனம் கார் அகில்
          பீலியும் பெருமரம் நிமிர்ந்துந்திப்
பொருது காவிரி வடகரை
          மாந்துறைப் புனிதன் எம் பெருமானைப்
பரிவி னால் இருந்து இரவியும்
          மதியமும் பார்மன்னர் பணிந்து ஏத்த
மருத வானவர் வழிபடு
          மலரடி வணங்குதல் செய்வோமே.  6  

நறவ மல்லிகை முல்லையும்
          மௌவலும் நாண்மலர்அவைவாரி
இறவில் வந்தெறி காவிரி
          வடகரை மாந்துறை இறைஅன்று அங்கு 
அறவ னாகிய கூற்றினைச்
          சாடிய அந்தணன் வரைவில்லால்
நிறைய வாங்கி வலித்தெயில்
      எய்தவன் நிரைகழல் பணிவோமே.  7  

மந்த மார்பொழில் மாங்கனி
          மாந்திட மந்திகள் மாணிக்கம்
உந்தி நீர்வரு காவிரி
          வடகரை மாந்துறை உறைவானை
நிந்தி யா எடுத்து ஆர்த்தவல்
          லரக்கனை நெரித்திடு விரலானைச்
சிந்தி யாமனத் தார் அவர்
          சேர்வது தீநெறி யதுதானே.  8  

நீல மாமணி நித்திலத்
          தொத்தொடு நிரைமலர் நிரந்துந்தி
ஆலி யாவரு காவிரி
          வடகரை மாந்துறை அமர்வானை
மாலு நான்முகன் தேடியும்
          காண்கிலா மலரடி இணைநாளும்
கோலம் ஏத்தி நின்று ஆடுமின்
          பாடுமின் கூற்றுவன் நலியானே.  9  

நின்று உணும் சமண் தேரரும்
          நிலையிலர் நெடுங்கழை நறவேலம்
நன்று மாங்கனி கதலியின்
          பலங்களும் நாணலின் நுரைவாரி
ஒன்றி நேர்வரு காவிரி
          வடகரை மாந்துறை ஒருகாலம்
அன்றி உள் அழிந்து எழும்பரிசு 
          அழகிது அதுஅவர்க்கு இடமாமே.  10  

வரைவ ளங்கவர் காவிரி
          வடகரை மாந்துறை உறைவானைச்
சிரபு ரம்பதி உடையவன்
          கவுணியன் செழுமறை நிறைநாவன்
அரவு எனும்பணி வல்லவன்
          ஞானசம் பந்தன்அன் புறுமாலை
பரவி டுந்தொழில் வல்லவர்
          அல்லலும் பாவமும் இலர்தாமே.

திருச்சிற்றம்பலம்