பொது

      

௨ 

திரு நாவுக்கரசு  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	பொது
பாடியவர்கள்	அப்பர் (1)        ஆமயந்தீர்த்து அடியேன்  (6-96)
பண்	திருத்தாண்டகம்
குறிப்புகள்
பதிக பலன்	சிக்கல்/பிரச்சனை விலகும்.
வரிசை எண்.	96

திருச்சிற்றம்பலம்          

ஆமயந்தீர்த்து அடியேனை ஆளாக் கொண்டார்
அதிகைவீ ரட்டானம் ஆட்சி கொண்டார்
தாமரையோன் சிரம் அரிந்து கையில் கொண்டார்
தலையதனிற் பலிகொண்டார் நிறைவாந் தன்மை
வாமனனார் மாகாயத்து உதிரம் கொண்டார்
மான் இடம் கொண் டார் வலங்கை மழுவாள் கொண்டார்
காமனையும் உடல்கொண்டார் கண்ணால் நோக்கிக்
கண்ணப்பர் பணியும் கொள் கபாலி யாரே.  1  

முப்புரிநூல் வரைமார்பில் முயங்கக் கொண்டார்
முதுகேழல் முளைமருப்பும் கொண்டார் பூணாச்
செப்புருவ முலைமலையாள் பாகம் கொண்டார்
செம்மேனி வெண் நீறு திகழக் கொண்டார்
துப்புரவார் சுரிசங்கின் தோடு கொண்டார்
சுடர்முடிசூழ்ம் தடி அமரர் தொழவும் கொண்டார்
அப்பலிகொண் டாயிழையார் அன்பும் கொண்டார்
அடியேனை ஆளுடைய அடிக ளாரே.  2  

முடிகொண்டார் முளை இள வெண் திங்க ளோடு
மூசும் இள நாகம் உடனாகக் கொண்டார்
அடிகொண்டார் சிலம்பு அலம்பு கழலும் ஆர்ப்ப
அடங்காத முயலகனை அடிக்கீழ்க் கொண்டார்
வடிகொண்டார்ந்து இலங்கு மழு வலங்கைக் கொண்டார்
மாலையிடப் பாகத்தே மருவக் கொண்டார்
துடிகொண்டார் கங்காளந் தோள்மேல் கொண்டார்
சூலைதீர்த்து அடியேனை ஆட்கொண் டாரே.  3  

பொக்கணமும் புலித்தோலும் புயத்தில் கொண்டார்
பூதப் படைகள்புடை சூழக் கொண்டார்
அக்கினொடு பட அரவம் அரைமேல் கொண்டார்
அனைத்து உலகும் படைத்த அவையும் அடங்கக் கொண்டார்
கொக்கிறகும் கூவிளமும் கொண்டை கொண்டார்
கொடியானை அடல் ஆழிக்கு இரையாக் கொண்டார்
செக்கர்நிறத் திருமேனி திகழக் கொண்டார்
செடியேனை ஆட்கொண்ட சிவனார் தாமே.  4  

அந்தகனை அயிற்சூலத்து அழுத்திக் கொண்டார்
அருமறையைத் தேர்க்குதிரை ஆக்கிக் கொண்டார்
சுந்தரனைத் துணைக்கவரி வீசக் கொண்டார்
சுடுகாடு நடமாடும் இடமாக் கொண்டார்
மந்தரநற் பொருசிலையா வளைத்துக் கொண்டார்
மாகாளன் வாசல் காப் கக் கொண்டார்
தந்திரமந் திரத்தராய அருளிக் கொண்டார்
சமண்தீர்த்து என்தன் தன்னை ஆட் கொண்டார் தாமே.  5 

 பாரிடங்கள் பலகருவி பயிலக் கொண்டார்
பவள நிறம்கொண்டார் பளிங்கும் கொண்டார்
நீரடங்கு சடைமுடிமேல் நிலாவும் கொண்டார்
நீலநிறம் கோலநிறை மிடற்றில் கொண்டார்
வாரடங்கு வனமுலையார் மைய லாகி
வந்திட்ட பலிகொண்டார் வளையும் கொண்டார்
ஊர் அடங்க ஒற்றிநகர் பற்றிக் கொண்டார்
உடல் உறுநோய் தீர்த்து என்னை ஆட்கொண் டாரே.  6 

 அணிதில்லை அம்பலம் ஆடரங்காக் கொண்டார்
ஆலால அருநஞ்சம் அமுதாக் கொண்டார்
கணிவளர்தார்ப் பொன் இதழிக் கமழ்தார் கொண்டார்
காதலார் கோடிகலந் திருக்கை கொண்டார்
மணிபணத்த அரவம் தோள் வளையாக் கொண்டார்
மால்விடைமேல் நெடுவீதி போதக் கொண்டார்
துணி புலித்தோல் ஆனை ஆடை உடையாக் கொண்டார்
சூலங்கைக் கொண்டார்தொண்டு எனைக்கொண் டாரே.  7 

 படமூக்கப் பாம்பணையானோடு வானோன்
பங்கயன் என்று  அங்கவரைப் படைத்துக் கொண்டார்
குடமூக்கில் கீழ்க்கோட்டங் கோயில் கொண்டார்
கூற்று உதைத்து ஓர் வேதியனை உய்யக் கொண்டார்
நெடுமூக்கில் கரியின் உரி மூடிக் கொண்டார்
நினையாத பாவிகளை நீங்கக் கொண்டார்
இடமாக்கி இடைமருதுங் கொண்டார் பண்டே
என்னை இந்நாளாட்கொண்ட இறைவர் தாமே.  8 

 எச்சன் நிணைத் தலைகொண்டார் பகன்கண் கொண்டார்
இரவிகளில் ஒருவன் பல் இறுத்துக் கொண்டார்
மெச்சன்வியாத் திரன் தலையும் வேறாக் கொண்டார்
விறல் அங்கி கரம்கொண்டார் வேள்வி காத்து
உச்சநமன் தாள் அறுத்தார் சந்திரனை உதைத்தார்
உணர்விலாத் தக்கன் தன் வேள்வி எல்லாம்
அச்சம் எழ அழித்துக்கொண்டு அருளும் செய்தார்
அடியேனை ஆட்கொண்ட அமலர் தாமே.  9  

சடை ஒன்றில் கங்கையையும் தரித்துக் கொண்டார்
சாமத்தின் இசைவீணை தடவிக் கொண்டார்
உடை ஒன்றில் புள்ளியுழைத் தோலும் கொண்டார்
உள்குவார் உள்ளத்தை ஒருக்கிக் கொண்டார்
கடைமுன்றிற் பலிகொண்டார் கனலும் கொண்டார்
காபால வேடம் கருதிக் கொண்டார்
விடை ஒன்றிக் கொடி அதனில் மேவக் கொண்டார்
வெந்துயரம் தீர்த்து என்னை ஆட்கொண் டாரே.  10  

குராமலரோடு அரா மதியம் சடைமேற் கொண்டார்
குடமுழ நந்தீசனை வாசகனாக் கொண்டார்
சிராமலைதம் சேர்விடமாத் திருந்தக் கொண்டார்
தென்றல்நெடுந் தேரோனைப் பொன்றக் கொண்டார்
பராபரன் என்பது தமது பேராக் கொண்டார்
பருப்பதம் கைக்கொண்டார் பயங்கள் பண்ணி
இராவணன் என்றவனைப் பேர் இயம்பக் கொண்டார்
இடர் உறுநோய் தீர்த்து என்னை ஆட்கொண் டாரே.  11 

திருச்சிற்றம்பலம்