பொது

     

௨ 

திரு நாவுக்கரசு  சுவாமிகள்   அருளிச்செய்த
ஆறாம் திருமுறை 

தகவல் பலகை	விவரம்
தலம்	பொது
பாடியவர்கள்	அப்பர் (1)        அப்பன் நீ அம்மை நீ (6-95)
பண்	திருத்தாண்டகம்
குறிப்புகள்	இது தனித் திருத்தாண்டகம் என போற்றப் படுகிறது.  அன்றாட வழிபாட்டில் ஓத வேண்டிய திருப்பதிகம்.
பதிக பலன்	மன அமைதி கிடைக்கும்.
வரிசை எண்.	95

திருச்சிற்றம்பலம்          

அப்பன் நீ அம்மை நீ ஐய னும் நீ
அன்புடைய மாமனும் மாமி யும்நீ
ஒப்புடைய மாதரும் ஒண்பொரு ளும் நீ
ஒருகுலமும் சுற்றமும் ஓர் ஊரும்நீ
துய்ப்பனவும் உய்ப்பனவும் தோற்று வாய்நீ
துணையா என் நெஞ்சந் துறப்பிப் பாய்நீ
இப்பொன் நீ  இம்மணி நீ இம் முத்தும் நீ
இறைவன்நீ ஏறு ஊர்ந்த செல்வன் நீயே.  1  

வெம்பவரு கிற்பதன்று கூற்றம் நம்மேல்
வெய்ய வினைப்பகையும் பைய நையும்
எம்பரிவு தீர்ந்தோம் இடுக்கண் இல்லோம்
எங்கெழிலென் ஞாயிற்று ஓளியோம் அல்லோம்
அம்பவளச் செஞ்சடைமேல் ஆறு சூடி
அனல் ஆடி ஆன் அஞ்சும் ஆட்டு உகந்த
செம்பவள வண்ணர்செங் குன்ற வண்ணர்
செவ்வான வண்ணர் என் சிந்தை யாரே.  2  

ஆட்டுவித்தால் ஆர் ஒருவர் ஆடா தாரே
அடக்குவித்தால் ஆர் ஒருவர் அடங்கா தாரே
ஓட்டுவித்தால் ஆர் ஒருவர் ஓடா தாரே
உருகுவித்தால் ஆர் ஒருவர் உருகா தாரே
பாட்டுவித்தால் ஆர் ஒருவர் பாடா தாரே
பணிவித்தால் ஆர் ஒருவர் பணியா தாரே
காட்டுவித்தால் ஆர் ஒருவர் காணா தாரே
காண்பார் ஆர் கண்ணுதலாய் காட்டாக் காலே.  3  

நற்பதத்தார் நற்பதமே ஞான மூர்த்தி
நலம் சுடரே நால்வேதத்து அப்பால் நின்ற
சொற்பதத்தார் சொற்பதமும் கடந்து நின்ற
சொலற்கு அரிய சூழலாய் இதுவுன் தன்மை
நிற்பதொத்து நிலையிலா நெஞ்சம் தன்னுள்
நிலாவாத புலால் உடம்பே புகுந்து நின்ற
கற்பகமே யான் உன்னை விடுவேன் அல்லேன்
கனகமா மணிநிறத்து எம்  கடவுளானே.  4  

திருக்கோயில் இல்லாத திருவி லூரும்
திருவெண்ணீறு அணியாத திருவி லூரும்
பருக்கோடிப் பத்திமையால்  பாடா  ஊரும்
பாங்கினொடு பலதளிகள் இல்லா ஊரும்
விருப்போடு வெண்சங்கம் ஊதா வூரும்
விதானமும் வெண்கொடியும்  இல்லா ஊரும்
அருப்போடு மலர்பறித்திட் டு உண்ணா ஊரும்
அவை எல்லாம் ஊரல்ல அடவி காடே.  5  

திருநாமம் அஞ்செழுத்தும்  செப்பா ராகில்
தீவண்ணர் திறம் ஒருகால் பேசார் ஆகில்
ஒருகாலும் திருக்கோயில் சூழார் ஆகில்
உண்பதன்முன் மலர்பறித்திட்டு உண்ணார் ஆகில்
அருநோய்கள் கெட வெண்ணீறு அணியார்  ஆகில்
அளியற்றார் பிறந்தவாறே ஏதோ என்னில்
பெருநோய்கள் மிகநலியப் பெயர்த்தும் செத்துப்
பிறப்பதற்கே தொழிலாகி இறக்கின் றாரே.  6  

நின்னாவார் பிறர் இன்றி நீயே ஆனாய்
நினைப்பார்கள் மனத்துக்கு ஓர் வித்தும் ஆனாய்
 மன் ஆனாய் மன்னவர்க்கு ஓர் அரமுதம் ஆனாய்
மறைநான்கும் ஆனாய் ஆறு அங்கம் ஆனாய்
பொன் ஆனாய் மணி ஆனாய் போகம் ஆனாய்
பூமிமேல் புகழ்தக்க பொருளே உன்னை
என்னானாய் என்னானாய் என்னின் அல்லால்
ஏழையேன் என்சொல்லி ஏத்து கேனே.  7  

அத்தாவுன் அடியேனை அன்பால் ஆர்த்தாய்
அருள்நோக்கில் தீர்த்த நீராட்டிக் கொண்டாய்
எத்தனையும் அரியைநீ எளியை ஆனாய்
எனை ஆண்டு கொண்டு இரங்கியே என்று கொண்டாய்
பித்தனேன் பேதையேன் பேயேன் நாயேன்
பிழைத்தனகள் அத்தனையும் பொறுத்தாய் அன்றே
இத்தனையும் எம் பரமோ ஐய ஐயோ
எம்பெருமான் திருக்கருணை இருந்த வாறே.  8  

குலம்பொல்லேன் குணம்பொல்லேன் குறியும் பொல்லேன்
குற்றமே பெரிது உடையேன் கோல மாய
நலம்பொல்லேன் நான்பொல்லேன் ஞானி அல்லேன்
நல்லாரோடு இசைந்திலேன் நடுவே நின்ற
விலங்கு அல்லேன் விலங்கு அல்லாது ஒழிந்தேன் அல்லேன்
வெறுப்பனவும் மிகப்பெரிதும் பேச வல்லேன்
இலம்பொல்லேன் இரப்பதே ஈய மாட்டேன்
என்செய்வான் தோன்றினேன் ஏழை யேனே.  9  

சங்கநிதி பதுமநிதி இரண்டுந் தந்து
தரணியொடு வான் ஆளத் தருவ ரேனும்
மங்குவார் அவர்செல்வம் மதிப்போம் அல்லோம்
மாதேவர்க்கு ஏகாந்தர் அல்லார் ஆகில்
அங்கம் எலாம்  குறைந்து அழுகு தொழுநோ யராய்
ஆ உரித்துத் தின்று உழலும் புலைய ரேனும்
கங்கைவார் சடைக்கரந்தார்க்கு அன்பர் ஆகில்
அவர்கண்டீர் நாம்வணங்கும்  கடவு ளாரே.  10 

திருச்சிற்றம்பலம்