திரு கச்சி மேற்றளி

௨ 

சுந்தரமூர்த்தி  சுவாமிகள் அருளிச்செய்த
ஏழாம்  திருமுறை 

தகவல் பலகை	விவரம்
தலம்	திரு கச்சிமேற்றளி
ஊர்
நாடு	தொண்டை நாடு
ॐசுவாமி	திரு மேற்றளி நாதர்
ॐஅம்பிகை	திரு மேற்றளி நாயகி
பாடியவர்கள்	அப்பர் (1)         மாறியது பாடி (4-43) சுந்தரர்   (1)         நொந்தா ஒண் சுடரே (7-21)
ஸ்தல மரம்
தீர்த்தம்
பண்	நட்டராகம்
குறிப்புகள்	காஞ்சிபுரம் பிள்ளையார் பாளையம் என்னும் பகுதியில் உள்ளது  திருமால் பூசித்த தலம்.
பதிக பலன்	சிவலோக பதவி கிடைக்கும்.
வரிசை எண்.	21                                                       2/32

திருச்சிற்றம்பலம்          

நொந்தா ஒண்சுடரே
          நுனையே நினைந்து இருந்தேன்
வந்தாய் போய் அறியாய்
          மனமே புகுந்துநின்ற
சிந்தாய் எந்தைபிரான்
          திருமேற் றளி உறையும்
எந்தாய் உன்னை அல்லால்
          இனி ஏத்த மாட்டேனே.  1  

ஆட்டான் பட்டமையால்
          அடியார்க்குத் தொண்டுபட்டுக்
கேட்டேன் கேட்பதெல்லாம்
          பிறவாமை கேட்டு ஒழிந்தேன்
சேட்டார் மாளிகைசூழ்
          திருமேற் றளி உறையும்
மாட்டே உன்னை அல்லால்
          மகிழ்ந்து ஏத்த மாட்டேனே.  2  

மோறாந்து ஓர் ஒருகால்
          நினையாது இருந்தாலும்
வேறா வந்து என் உள்ளம்
          புகவல்ல மெய்ப்பொருளே
சேறார் தண்கழனித்
          திருமேற் றளி உறையும்
ஏறே உன்னை அல்லால்
          இனி ஏத்த மாட்டேனே.  3  

உற்றார் சுற்றம் எனும்
          அதுவிட்டு நுன் அடைந்தேன்
எற்றால் என் குறை என்
          இடரைத் துறந்து ஒழிந்தேன்
செற்றாய் மும்மதிலும்
          திருமேற் றளி உறையும்
பற்றே நுன்னை அல்லால்
          பணிந்து ஏத்த மாட்டேனே.  4  

எம்மான் எம்மனை என்று
          அவரிட்று இறந்து ஒழிந்தார்
மெய்ம்மால் ஆயின தீர்த்து
          அருள்செய்யும் மெய்ப்பொருளே
கைம்மா ஈருரியாய்
          கனமேற் றளி உறையும்
பெம்மான் உன்னை அல்லால்
          பெரிது ஏத்த மாட்டேனே.  5  

நானேல் உன்னடியே
          நினைந்தேன் நினைதலுமே
ஊனேர் இவ் உடலம்
          புகுந்தாய் என் ஒண்சுடரே
தேனே இன் அமுதே
          திருமேற் றளி உறையும்
கோனே உன்னை அல்லால்
          குளிர்ந்து ஏத்த மாட்டேனே.  6  

கையார் வெஞ்சிலை நான்
          அதன் மேற் சரங்கோத்தே
எய்தாய் மும்மதிலும்
          எரி உண்ண எம்பெருமான்
செய்தாய்  பைங்கமலத்
          திருமேற் றளி உறையும்
ஐயா உன்னை அல்லால்
          அறிந்து ஏத்த மாட்டேனே.  7  

விரையார் கொன்றையினாய்
          விமலாஇனி உன்னை அல்லால்
உரையேன் ஆவதனால்
          உடலில்லுயிர் உள் அளவும்
திரையார் தண்கழனித்
          திருமேற் றளி உறையும்
அரையா உன்னை அல்லால்
          அறிந்து ஏத்த மாட்டேனே.  8  

நிலையாய் நின்னடியே
          நினைந்தேன் நினைதலுமே
தலைவா நின்னினையப்
          பணித்தாய் சலம் ஒழிந்தேன்
சிலையார் மாமதில்சூழ்
          திருமேற் றளி உறையும்
மலையே உன்னை அல்லால்
          மகிழ்ந்து ஏத்த மாட்டேனே.  9  

பாரூர் பல்லவனூர்
          மதிற்காஞ்சி மாநகர்வாய்ச்
சீரூ ரும்புறவில்
          திருமேற் றளிச் சிவனை
ஆரூ ரன் அடியான்
          அடித்தொண்டன் ஆரூரன்சொன்ன
சீரூர் பாடல்வல்லார்
          சிவலோகம் சேர்வாரே.

திருச்சிற்றம்பலம்