திரு கச்சி ஏகம்பம்

 

௨ 

திருஞானசம்பந்தர்  சுவாமிகள் அருளிச்செய்த
முதலாம்   திருமுறை 

தகவல் பலகை	விவரம்
தலம்	திரு கச்சி ஏகம்பம்
ஊர்	காஞ்சிபுரம், காமபீடம், மும்மூர்த்தி வாசம், சிவபுரம், விண்டுபுரம், தபோமயம், துண்டீரபுரம், பிரமபுரம், பூலோக கயிலாயம், தேவபுரம், சகலசித்திபுரம், புவனசாரம், ஆதிபீடம், கன்னிகாப்பு, கலிசித்து, கச்சி
நாடு	தொண்டை நாடு
ॐசுவாமி	ஏகாம்பர நாதர், திருவேகம்பர்
ॐஅம்பிகை	ஏலவார் குழலி, காமாட்சி அம்மை
பாடியவர்கள்	சம்பந்தர் (4)         வெந்த வெண் பொடி பூசு  (1-133)         மறையானை மாசிலா (2-12)         கருவா கச்சி திருவேகம்பம் (3-41)         பாயுமால் விடை (3-114) அப்பர் (7)         கரவாடும் வன்னம்(4-07)         நம்பனை நகர மூன்றும் (4-44)          ஓதுவித்தாய் முன் (4-99)         பண்டு செய்த பழ வினை (5-047)         பூ மேலானும் பூமகள் (5-48)         கூற்றுவன் காண் கூற்றுவனை (6-64)         உரித்தவன் காண் உரக்களிற்றை (6-65) சுந்தரர்   (1)         ஆலம் தான் உகந்து அமுது (7-61)
ஸ்தல மரம்	மாமரம்
தீர்த்தம்	கம்பாநதி, சர்வ தீர்த்தம், சிவகங்கை
பண்	மேகராக குறிஞ்சி
குறிப்புகள்	காமாட்சி அம்மை 32 அறங்கள் செய்த தலம்  பஞ்ச பூத தலங்களில் ஒன்று (மண்) கந்தபுராணம் பாடிய கச்சியப்ப சிவாச்சாரியார் வாழ்ந்த தலம்  திருக்குறள் உரை ஆசிரியர் பரிமேலழகர் வாழ்ந்த தலம்  ஐயடிகள் காடவர்கோன், சாக்கிய நாயனார், திருக்குறிப்புத் தொண்டர் பேறு பெற்ற தலம்  சுந்தரமூர்த்தி சுவாமிகள் இடக் கண் பெற்ற தலம்  வேதம் மாமரமாக - தல மரமாக விளங்குவது.  இங்குள்ள மாமரம் சுமார் 3500 ஆண்டுகள் பழமையானது  கம்பாநதி பூமிக்கடியில் கண்களுக்கு புலப்படாதவாறு ஓடுவதாக வரலாறு  நல்ல கம்பன், கள்ளக் கம்பன், வெள்ளக் கம்பன் ஆகிய மூர்த்தங்கள் உள்ள திருத்தலம். முத்தி பேறு தரவல்ல தளமாக போற்றப் படுகிறது .
பதிக பலன்	வளம் ஓங்கி புகழுடன் வாழ்வர்.
வரிசை எண்.	31                                                       1/32

திருச்சிற்றம்பலம்          

வெந்தவெண் பொடிப்பூசு மார்பின்விரி 
          நூல் ஒருபால் பொருந்தக்
கந்தமல்கு குழலியோடும் கடிபொழில்
          கச்சி தன்னுள்
அந்தமில் குணத்தார் அவர் போற்ற 
          அணங்கினொடு ஆடல்புரி
எந்தை மேவிய ஏகம்பம் தொழுது 
          ஏத்த இடர் கெடுமே.  1  

வரம் திகழும் அவுணர் மாநகர்
          மூன்றுடன்மாய்ந்து அவியச்
சரந்துரந் தெரிசெய்த தாழ்சடைச் 
          சங்கரன் மேய இடம்
குருந்தம் மல்லிகை கோங்கு மாதவி  
          நல்ல குரா மரவம்
திருந்து பைம்பொழில் கச்சி ஏகம்பம்
          சேர இடர் கெடுமே.  2  

வண்ணவெண் பொடிப்பூசு மார்பின் 
          வரி அரவம் புனைந்து
பெண் அமர்ந்து எரி ஆடல் பேணிய 
          பிஞ்ஞகன் மேய இடம்
விண்ணமர் நெடுமாடம் ஓங்கி 
          விளங்கிய கச்சி தன்னுள்
திண்ணமாம் பொழில்சூழ்ந்த ஏகம்பம்
          சேர இடர்கெடுமே.  3  

தோலும் நூலும் துதைந்த வரைமார்பில்
          சுடலைவெண் நீறு அணிந்து
காலன்மாள் வுறக்காலாற் காய்ந்த 
          கடவுள் கருதுமிடம்
மாலைவெண் மதி தோயு மாமதிற் 
          கச்சி மாநகருள்
ஏலம்நாறிய சோலைசூழ் ஏகம்பம் 
          ஏத்த இடர்கெடுமே.  4  

தோடணிம் மலர்க் கொன்றை சேர்சடைத் 
          தூமதி யம்புனைந்து
பாடல் நான்மறையாகப் பல்கணப் 
          பேய்கள் அவை சூழ
வாடல் வெண் தலையோடு அனல் ஏந்தி 
          மகிழ்ந்து  உடன் ஆடல்புரி
சேடர்சேர் கலிக்கச்சி ஏகம்பம் 
          சேர இடர்கெடுமே.  5  

சாகம்பொன் வரையாகத் தான் அவர் 
          மும்மதில் சாய வெய்து
தாகம்பெண் ஒருபாக மாக 
          அரவொடு நூல் அணிந்து
மாகந்தோய் மணிமாட மாமதிற் 
          கச்சி மாநகருள்
ஏகம்பத்து உறை ஈசன் சேவடி 
          ஏத்த இடர்கெடுமே.  6  

வாணிலா மதிபுல்கு செஞ்சடை 
          வாள் அரவம் அணிந்து
நாணிடத்தினில் வாழ்க்கை பேணி 
          நகுதலையிற் பலிதேர்ந்து 
ஏணிலா அரக்கன் தன் நீள்முடி 
          பத்தும் இறுத்தவன் ஊர்
சேணுலாம் பொழிற்கச்சி ஏகம்பம்
          சேர இடர்கெடுமே.  8  

பிரமனும் திருமாலும் கைதொழப் 
          பேரழல் ஆய பெம்மான்
அரவம் சேர்சடை அந்தணன் 
          அணங்கினொடு அமரும் இடம்
கரவில்வண் கையினார்கள் வாழ் கலிக் 
          கச்சி மாநகருள்
மரவம்  சூழ் பொழில் ஏகம்பம் தொழ 
          வல்வினை மாய்ந்து அறுமே.  9  

குண்டுபட் ட அமணா யவரொடும்
          கூறைதம் மெய்போர்க்கும்
மிண்டர் கட்டிய கட்டுரை 
          அவைகொண்டு விரும்பேன்மின்
விண்டவர் புரமூன்றும் வெங்கணை 
          ஒன்றி னால் அவியக்
கண்டவன் கலிக்கச்சி ஏகம்பம்
          காண இடர்கெடுமே.  10  

ஏரினார் பொழில்சூழ்ந்த கச்சி 
          ஏகம்பம் மேயவனை
காரினார் மணிமாடம் ஓங்கு 
         கழுமல நன் நகருள்
பாரினார் தமிழ்ஞான சம்பந்தன் 
          பரவிய பத்தும்வல்லார்
சீரினார் புகழ் ஓங்கி 
          விண்ணவரோடும் சேர்பவரே.

திருச்சிற்றம்பலம்

இப்பதிகத்தில் 7-ம் பாடல் கிடைக்கப்பெறவில்லை.