திருமந்திரம் 1-3. செல்வம் நிலையாமை

      

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	செல்வம்  நிலையாமை
தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	செல்வம் நிலையாமை
பிற குறிப்புகள்

திருச்சிற்றம்பலம்

அருளும் அரசனும் ஆனையும் தேரும்

பொருளும் பிறர்கொள்ளப் போவதன் முன்னம்

தெருளும் உயிரொடும் செல்வனைச் சேரில்

மருளும் பினை அவன் மாதவம் அன்றே.  1  

இயக்கு உறு திங்கள் இருட்பிழம்பு ஒக்கும்

துயக்கு உறு செல்வத்தைச் சொல்லவும் வேண்டா

மயக்கு அற நாடுமின் வானவர் கோனைப்

பெயல் கொண்டல் போலப் பெரும் செல்வம் ஆமே.  2  

தன்னது சாயை தனக்கு உதவாதுகண்டு

என்னது மாடு என்று இருப்பர்கள் ஏழைகள்

உன் உயிர் போம்உடல் ஒக்கப் பிறந்தது

கண்ணது காண் ஒளி கண்டுகொள்ளீரே.  3  

ஈட்டிய தேன்பூ மணம் கண்டு இரதமும்

கூட்டிக் கொணர்ந்து ஒரு கொம்பிடை வைத்திடும்

ஓட்டித் துரந்திட்டு அதுவலி யார்கொளக்

காட்டிக் கொடுத்தது கைவிட்ட வாறே.  4  

தேற்றத் தெளிமின் தெளிந்தீர் கலங்கன்மின்

ஆற்றுப் பெருக்கில் கலக்கி மலக்காதே

மாற்றிக் களைவீர் மறுத்துங்கள் செல்வத்தைக்

கூற்றன் வருங்கால் குதிக்கலும் ஆமே.  5  

மகிழ்கின்ற செல்வமும் மாடும் உடனே

கவிழ்கின்ற நீர்மிசைச் செல்லும் கலம்போல்

அவிழ்கின்ற ஆக்கைக்கு ஓர் வீடு பேறு ஆகச்

சிமிழ் ஒன்று வைத்தமை தேர்ந்தறி யாரே.  6  

வாழ்வும் மனைவியும் மக்கள் உடன்பிறந்

தாரும் அளவு ஏது எமக்கு என்பர் ஒண்பொருள்

மேவும் அதனை விரிவுசெய் வார்கட்குக்

கூவும் துணை ஒன்று கூடலும் ஆமே.  7  

வேட்கை மிகுத்தது மெய்கொள்வார் இங்கு இல்லை

பூட்டும் தறி ஒன்று போம்வழி ஒன்பது

நாட்டிய தாய்தமர் வந்து வணங்கிப்பின்

காட்டிக் கொடுத்தவர் கைவிட்ட வாறே.  8  

உடம்போடு உயிரிடை விட்டு ஓடும் போது

அடும்பரிசு ஒன்று இல்லை அண்ணலை எண்ணும்

விடும் பரிசாய் நின்ற மெய்ந்நமன் தூதர்

சுடும்பரி சத்தையும் சூழகி லாரே.  9 

திருச்சிற்றம்பலம்