திரு ஊறல்

                             

௨ 

திருஞானசம்பந்தர் சுவாமிகள் அருளிச்செய்த
முதலாம்  திருமுறை

தகவல் பலகை	விவரம்
தலம்	திரு ஊறல்
ஊர்	தக்கோலம்
நாடு	தொண்டை நாடு
ॐசுவாமி	ஜலநாதேஸ்வரர்
ॐஅம்பிகை	உமையம்மை, மோகனவல்லி
பாடியவர்கள்	ஞானசம்பந்தர்  (1)        மாறில் அவுணர்  (1-106)
ஸ்தல மரம்	நெல்லி
தீர்த்தம்	நந்தி தீர்த்தம், கல்லாறு
பண்	வியாழக்குறிஞ்சி
குறிப்புகள்	கல்லாற்றின் கரையில் உள்ள தலம்  நந்தியின் வாயில் இருந்து நீர் விழுந்து செல்லும் தலம்
பதிக பலன்	பரலோகத்தில் வீற்றிருப்பார்
வரிசை எண்.	106                                                         12/32

திருச்சிற்றம்பலம்          

மாறில் அவுணர் அரணம் அவை மாய ஓர் 

          வெங்கணையால் அன்று

நீறு எழ எய்த எங்கள் 

          நிமலன் இடம் வினவில்

தேறல் இரும்பொழிலும் திகழ்செங்கயல் 

          பாய் வயலும் சூழ்ந்த

ஊறல் அமர்ந்த பிரான் 

          ஒலியார் கழல் உள்குதுமே.  1  

மத்த மதக் கரியை மலையான்மகள் 

          அஞ்ச அன்று கையால்

மெத்த உரித்த எங்கள் 

          விமலன் விரும்பும் இடம்

தொத்து அலரும் பொழில் சூழ் வயல் சேர்ந்து 

          ஒளிர் நீலம்நாளும் நயனம்

ஒத்தலரும் கழனித் 

          திருவூறலை உள்குதுமே.  2  

ஏன மருப்பினொடும் எழில் ஆமையும் 

          பூண்டு அழகார் நன்றும்

கானமர் மான்மறிக் 

          கைக்கடவுள் கருதும் இடம்

வான மதிதடவும் வளர்சோலைகள் 

          சூழ்ந்த அழகார் நம்மை

ஊனம் அறுத்தபிரான் 

          திருவூறலை உள்குதுமே.  3  

நெய்யணி மூவிலைவேல் நிறை

          வெண்மழுவும் அனலும் அன்று

கையணி கொள்கையினான் 

          கடவுளிடம் வினவில்

மையணி கண்மடவார் பலர்வந்து  

          இறைஞ்சமன்னி நம்மை

உய்யும் வகைபுரிந்தான் 

          திருவூறலை உள்குதுமே.  4  

எண் திசை யோர்மகிழ எழில்மாலையும் 

          போனகமும் பண்டு

சண்டி தொழ அளித்தான் 

          அவன் தாழும் இடம்வினவில்

கொண்டல்கள் தங்குபொழிற் குளிர்

          பொய்கைகள் சூழ்ந்து நஞ்சை

உண்டபி ரான் அமரும்

          திருவூறலை உள்குதுமே.  5  

 கறுத்த மனத்தினொடும்  கடுங்காலன்வந்து  

          எய்துதலும் கலங்கி

மறுக்குறும் மாணிக்கு அருள 

          மகிழ்ந்தான் இடம் வினவில்

செறுத்தெழு வாளரக்கன் சிரந்தோளும் 

          மெய்யும் நெரிய அன்று

ஒறுத்து அருள் செய்தபிரான் 

          திருவூறலை உள்குதுமே.  8  

நீரின் மிசைத் துயின்றோன் இறை

          நான்முகனும் அறியாது அன்று

தேரும் வகைநிமிர்ந்தான் 

          அவன்சேரும் இடம்வினவில்

பாரின் மிசை அடியார் பலர்வந்து  

          இறைஞ்ச மகிழ்ந்து ஆகம்

ஊரும் அரவசைத்தான் 

          திருவூறலை உள்குதுமே.  9  

பொன்னியல் சீவரத்தார் புளித்தட்டையர் 

          மோட்டு அமணர் குண்டர்

என்னும் இவர்க்குக் அருளா 

          ஈசன் இடம்வினவில்

தென் என வண்டு இனங்கள் செறியார்பொழில் 

          சூழ்ந்து அழகார் தன்னை

உன்னவினை கெடுப்பான் 

          திருவூறலை உள்குதுமே.  10  

கோடல் இரும்புறவிற் கொடிமாடக் 

          கொச்சையர்மன் மெச்ச

ஓடுபுனல் சடைமேற் 

          கரந்தான் திருவூறல்

நாடல் அரும்புகழான் மிகு ஞான

          சம்பந்தன்சொன்ன நல்ல

பாடல்கள் பத்தும்வல்லார் 

          பரலோகத்து இருப்பாரே.

திருச்சிற்றம்பலம்

இப்பதிகத்தில் 6 மற்றும் 7ம் பாடல் கிடைக்கப்பெறவில்லை.