திரு மயிலாப்பூர்

                   

௨ 

திருஞானசம்பந்தர் சுவாமிகள் அருளிச்செய்த
இரண்டாம்   திருமுறை

தகவல் பலகை	விவரம்
தலம்	திரு மயிலாப்பூர்
ஊர்	மயிலை
நாடு	தொண்டை நாடு
ॐசுவாமி	கபாலீஸ்வரர்
ॐஅம்பிகை	கற்பகவல்லி அம்மை
பாடியவர்கள்	திருஞானசம்பந்தர் (1)          மட்டிட புன்னை (2-47)
ஸ்தல மரம்	புன்னை
தீர்த்தம்
பண்	சீகாமரம்
குறிப்புகள்	அம்பிகை மயில் வடிவத்தில் இறைவனை பூசித்த பதி  பூம்பாவையை மீண்டும் உயிர்பித்த வர செய்த திருத்தலம்.  ஒவ்வொரு மாதத்திற்கான திருவிழா நிகழ்ச்சிகளை வரிசைப்படுத்தி அமைந்த அற்புதமான பதிகம்
பதிக பலன்	முத்திப்பேறு கிட்டும்; இழந்த பதவிகளை பெற
வரிசை எண்.	47                                                         24/32

திருச்சிற்றம்பலம்

            

மட்டிட்ட புன்னை அம்

          கானல் மடமயிலைக்

கட்டிட்டம்  கொண்டான்

          கபாலீச் சரம்அமர்ந்தான்

ஒட்டிட்ட பண்பின்

          உருத்திர பல்கணத்தார்க்கு

அட்டிட்டல் காணாதே

          போதியோ பூம்பாவாய்.  1  

மைப்பயந்த ஒண்கண்

          மடநல்லார் மாமயிலைக்

கைப்பயந்த நீற்றான்

          கபாலீச் சரம்அமர்ந்தான்

ஐப்பசி ஓண

          விழாவும் அருந்தவர்கள்

துய்ப்பனவும் காணாதே

          போதியோ பூம்பாவாய்.  2  

வளைக்கை மடநல்லார்

          மாமயிலை வண்மறுகில்

துளக்கில் கபாலீச்சரத்தான் 

          தொல் கார்த்திகைநாள்

தளத்தேந்து இளமுலையார்

          தையலார் கொண்டாடும்

விளக்கீடு காணாதே

          போதியோ பூம்பாவாய்.  3  

ஊர்திரை வேலை

          உலாவும் உயர்மயிலைக்

கூர்தரு வேல்வல்லார்

          கொற்றம் கொள் சேரிதனில்

கார்தரு சோலைக்

          கபாலீச் சரம்அமர்ந்தான்

ஆதிரைநாள் காணாதே

          போதியோ பூம்பாவாய்.  4  

மைப்பூசும் ஒண்கண்

          மடநல்லார் மாமயிலைக்

கைப்பூசு நீற்றான்

          கபாலீச் சரம்அமர்ந்தான்

நெய்ப்பூசும் ஒண்புழுக்கல்

          நேரிழையார் கொண்டாடும்

தைப்பூசம்  காணாதே

          போதியோ பூம்பாவாய்.  5  

மடலார்ந்த தெங்கின்

          மயிலையார் மாசிக்

கடலாட்டுக் கண்டான்

          கபாலீச் சரம்அமர்ந்தான்

அடல் ஆன் ஏறு ஊரும்

          அடிகள் அடி பரவி

நடமாடல் காணாதே

          போதியோ பூம்பாவாய்.  6  

மலிவிழா வீதி

          மடநல்லார் மாமயிலைக்

கலிவிழாக் கண்டான்

          கபாலீச் சரம்அமர்ந்தான்

பலிவிழாப் பாடல்செய்

          பங்குனி உத்திரநாள்

ஒலிவிழாக் காணாதே

          போதியோ பூம்பாவாய்.  7  

தண்ணா அரக்கன்தோள்

          சாய்த்து உகந்த தாளினான்

கண்ணார் மயிலைக்

          கபாலீச் சரம்அமர்ந்தான்

பண்ணார் பதினெண்

          கணங்கள்தம் அட்டமிநாள்

கண்ணாரக் காணாதே

          போதியோ பூம்பாவாய்.  8  

நற்றா மரைமலர்மேல்

          நான்முகனும் நாரணனும்

உற்றாங் குணர்கிலா

          மூர்த்தி திருவடியைக்

கற்றார்கள் ஏத்தும்

          கபாலீச் சரம்அமர்ந்தான்

பொற்றாப்புக் காணாதே

          போதியோ பூம்பாவாய்.  9  

உரிஞ்சாய வாழ்க்கை

          அமணுடையைப் போர்க்கும்

இருஞ்சாக் கியர்கள்

          எடுத்துரைப்ப நாட்டில்

கருஞ்சோலை சூழ்ந்த

          கபாலீச் சரம்அமர்ந்தான்

பெருஞ் சாந்தி காணாதே

          போதியோ பூம்பாவாய்.  10  

கான் அமர் சோலைக்

          கபாலீச் சரம்அமர்ந்தான்

தேன் அமர் பூம்பாவைப்

          பாட்டாகச் செந்தமிழான்

ஞானசம் பந்தன்

          நலம்புகழ்ந்த பத்தும்வலார்

வானசம் பந்தத்து 

          அவரோடும் வாழ்வாரே.

திருச்சிற்றம்பலம்