திரு ஈங்கோய் மலை

 

௨ 

திருஞானசம்பந்தர்சுவாமிகள்   அருளிச்செய்த
முதலாம்  திருமுறை 

தகவல் பலகை	விவரம்
தலம்	திரு ஈங்கோய் மலை
பிற பெயர்கள்	திருவிங்கனாதமலை, சிவ சக்தி மலை
நாடு	சோழ நாடு (வ)
ॐசுவாமி	மரகதாசலேஸ்வரர்
ॐஅம்பிகை	மரகதவல்லி
பாடியவர்கள்	சம்பந்தர் (4)         வானத்து உயர் தண் மதி (1-70)
ஸ்தல மரம்
தீர்த்தம்	அமிர்த தீர்த்தம்
பண்	தக்கேசி
குறிப்புகள்	அகத்தியர் ஈ வடிவத்தில் இறைவனை தரிசித்த தலம்  காலையில் குளித்தலை, திருவாட் போக்கியில் நண்பகலில், மாலையில் ஈங்கோய் மலை என வழிபடுதல் சிறப்பு
பதிக பலன்	கவலைகள் நீங்கப் பெறுவர்
வரிசை எண்.	70                                                      63/63

திருச்சிற்றம்பலம்          

வானத்து உயர்தண் மதிதோய்சடைமேல் 
          மத்த மலர்சூடித்
தேன் ஒத்தன மென்மொழி மான்விழியாள் 
          தேவி பாகமாக்
கானத்து இரவில் எரிகொண்டு ஆடும்  
          கடவுள் உலகேத்த
ஏனத்திரள் வந்து இழியும் சாரல் 
          ஈங்கோய் மலையாரே.  1  

சூலப்படை ஒன்று ஏந்தி இரவில் 
          சுடுகாடு இடமாகக்
கோலச்சடைகள் தாழக்குழல்யாழ் 
          மொந்தை கொட்டவே
பாலொத்தனைய மொழியாள்காண 
          ஆடும் பரமனார்
ஏலத்தொடுநல் இலவங்கமழும் 
          ஈங்கோய் மலையாரே.  2  

கண்கொள்நுதலார் கறைகொள்மிடற்றார் 
          கரியின் உரிதோலார்
விண்கொள்மதிசேர் சடையார்விடையார் 
          கொடியார் வெண்ணீறு
பெண்கொள்திருமார்பு அதனில் பூசும் 
          பெம்மான் எமை ஆள்வார்
எண்கும்அரியுந் திரியுஞ்சாரல் 
          ஈங்கோய் மலையாரே.  3  

மறையின் இசையார் நெறிமென்கூந்தல் 
          மலையான் மகளோடும்
குறைவெண்பிறையும் புனலும் நிலவும் 
          குளிர்புன் சடைதாழப்
பறையும் குழலும் கழலும்ஆர்ப்பப் 
          படுகாட்டு எரி ஆடும்
இறைவர் சிறை வண் டறைபூஞ்சாரல் 
          ஈங்கோய் மலையாரே.  4  

நொந்தசுடலைப் பொடிநீறு அணிவார் 
          நுதல்சேர் கண்ணினார்
கந்தமலர்கள் பலவும் நிலவு 
          கமழ்புன் சடைதாழப்
பந்தண்விரலாள் பாகமாகப் 
          படுகாட்டு எரி ஆடும்
எம் தம் அடிகள் கடிகொள்சாரல் 
          ஈங்கோய் மலையாரே.  5  

நீறு ஆர் அகலம் உடையார்நிரையார் 
          கொன்றை அரவோடும்
ஆறார்சடையார் அயில்வெங்கணையால் 
          அவுணர் புரம்மூன்றும்
சீறாஎரிசெய் தேவர்பெருமான் 
          செங்கண் அடல்வெள்ளை
ஏறார்கொடியார் உமையாளோடும் 
          ஈங்கோய் மலையாரே.  6  

வினை ஆயின தீர்த்து அருளேபுரியும் 
          விகிர்தன் விரிகொன்றை
நனையார்முடிமேல் மதியம் சூடும் 
          நம்பான் நலமல்கு
தனையார்கமல மலர்மேல் உறைவான் 
          தலையோடு அனல் ஏந்தும்
எனை ஆளுடையான் உமையாளோடும் 
        ஈங்கோய் மலையாரே.  7  

பரக்கும்பெருமை இலங்கை என்னும் 
          பதியிற் பொலிவாய
அரக்கர்க்கு இறைவன் முடியும் தோளும் 
          அணியார் விரல்தன்னால்
நெருக்கி அடர்த்து நிமலாபோற்றி 
          என்று நின்று ஏத்த
இரக்கம்புரிந்தார் உமையாளோடும் 
          ஈங்கோய் மலையாரே.  8  

வரியார்புலியின் உரிதோல் உடையான் 
          மலையான் மகளோடும்
பிரியாது உடனாய் ஆடல்பேணும் 
          பெம்மான் திருமேனி
அரியோடு அயனும் அறியாவண்ணம் 
          அளவில் பெருமையோடு 
எரியாய்நிமிர்ந்த எங்கள் பெருமான் 
          ஈங்கோய் மலையாரே.  9  

பிண்டி ஏன்று பெயராநிற்கும் 
          பிணங்கு சமணரும்
மண்டைகலனாக் கொண்டுதிரியும் 
          மதியில் தேரரும்
உண்டிவயிறார் உரைகள்கொள்ளாது  
          உமையோடு உடனாகி
இண்டைச்சடையான் இமையோர்பெருமான் 
          ஈங்கோய் மலையாரே.  10  

விழவார் ஒலியும் முழவும்ஓவா 
          வேணு புரம் தன்னுள்
அழலார்வண்ணத்து அடிகள் அருள்சேர் 
          அணிகொள் சம்பந்தன்
எழிலார்சுனையும் பொழிலும்புடைசூழ் 
          ஈங்கோய்மலை ஈசன்
கழல்சேர்பாடல் பத்தும்வல்லார் 
          கவலை களைவாரே.

திருச்சிற்றம்பலம்