திரு பாச்சில்லாச்சிராமம்

௨ 

திருஞானசம்பந்தர்சுவாமிகள்   அருளிச்செய்த
முதலாம்  திருமுறை 

தகவல் பலகை	விவரம்
தலம்	திரு பாச்சிலாச்சிராமம்
பிற பெயர்கள்	திரு வாசி,
நாடு	சோழ நாடு (வ)
ॐசுவாமி	மாற்றறிவரதர், சமிவநேச்வரர், பிரமபுரீஸ்வரர்
ॐஅம்பிகை	பால சௌந்தரி
பாடியவர்கள்	சம்பந்தர் (1)         துணிவளர் திங்கள்  (1-70) சுந்தர்ர் (1)         வைத்தனன் தனக்கே (7-14)
ஸ்தல மரம்	வன்னி
தீர்த்தம்	சிலம்பாறு
பண்	தக்க ராகம்
குறிப்புகள்	கொல்லி மழவனின் புதல்வி, முயலகன் என்னும் நோயால் பீடிக்கப்பட்டு வருந்த ஞானசம்பந்த பெருமான் பதிகம் பாடி தீர்த்து அருளினார்.
பதிக பலன்	வினை சாராது.
வரிசை எண்.	44                                                      62/63

திருச்சிற்றம்பலம்          

துணிவளர் திங்கள் துளங்கி விளங்கச்
          சுடர்ச்சடை சுற்றிமு டித்துப்
பணிவளர் கொள்கையர் பாரிடம் சூழ
          ஆரிடமும்பலி தேர்வர்
அணிவளர் கோலம் எலாம் செய்து பாச்சில்
          ஆச்சிராமத்து உறை கின்ற
மணிவளர் கண்டரோ மங்கையை வாட
          மயல்செய்வ தோஇவர் மாண்பே.  1  

கலைபுனை மான் உரி தோல் உடை ஆடை
          கனல்சுட ரால் இவர் கண்கள்
தலை அணி சென்னியர் தார் அணி மார்பர்
          தம் அடிகள் இவர் என்ன
அலைபுனல் பூம்பொழில் சூழ்ந்து அமர் பாச்சில்
          ஆச்சிராமத்து உறைகின்ற
இலைபுனைவேலரோ ஏழையை வாட
          இடர்செய்வ தோஇவர் ஈடே.  2  

வெஞ்சுடர் ஆடுவர் துஞ்சு இருள் மாலை
          வேண்டுவர் பூண்பது வெண் நூல்
நஞ்சடை கண்டர் நெஞ்சு இடமாக
          நண்ணுவர் நம்மை நயந்து
மஞ்சு அடை மாளிகை சூழ்தரு பாச்சில்
          ஆச்சிராமத்து உறைகின்ற
செஞ்சுடர் வண்ணரோ பைந்தொடி வாடச்
          சிதைசெய்வ தோஇவர் சீரே.  3  

கனமலர்க் கொன்றை அலங்கல் இலங்கக்
          கனல்தரு தூமதிக் கண்ணி
புனமலர் மாலை அணிந்து அழகாய
          புனிதர் கொலாம் இவர் என்ன
வனமலி வண்பொழில் சூழ்தரு பாச்சில்
          ஆச்சிராமத்து உறை கின்ற
மனமலி மைந்தரோ மங்கையை வாட
          மயல்செய்வ தோஇவர் மாண்பே.  4  

மாந்தர்தம் பால்நறு நெய்மகிழ்ந்து ஆடி
          வளர்சடை மேல் புனல் வைத்து
மோந்தை முழாக்குழல் தாளம் ஓர் வீணை
          முதிர ஓர் வாய்மூரி பாடி
ஆந்தைவி ழிச்சிறு பூதத்தர் பாச்சில்
          ஆச்சிராமத்து உறை கின்ற
சாந்து அணி மார்பரோ தையலை வாடச்
          சதுர்செய்வ தோஇவர் சார்வே.  5  

நீறுமெய் பூசி நிறைசடை தாழ
          நெற்றிக்கண் ணால் உற்று நோக்கி
ஆறு அது சூடி ஆடரவு ஆட்டி
          ஐவிரல் கோவண ஆடை
பால் தரு மேனியர் பூதத்தர் பாச்சில்
          ஆச்சிரா மத்து உறை கின்ற
ஏறது ஏறியர் ஏழையை வாட
          இடர்செய்வ தோஇவர் ஈடே.  6  

பொங்கு இள நாகம் ஒரு ஏக வடத்தோடு
          ஆமை வெண் நூல் புனை கொன்றை
கொங்கு இள மாலை புனைந்து அழகாய
          குழகர்கொ லாம் இவர் என்ன
அங்கு இள மங்கை ஓர் பங்கினர் பாச்சில்
          ஆச்சிரா மத்து உறை கின்ற
சங்கு ஒளி வண்ணரோ தாழ்குழல் வாடச்
          சதிர்செய்வ தோஇவர் சார்வே.  7  

ஏவலத் தால் விசயற்கு அருள் செய்து
          இராவணனை ஈடு அழித்து
மூவரிலும் முதலாய் நடுவாய
          மூர்த்தியை அன்றி மொழியாள்
யாவர்க ளும் பர வும் எழில் பாச்சில்
          ஆச்சிரா மத்து உறை கின்ற
தேவர்கள் தேவரோ சேயிழை வாடச்
          சிதைசெய்வ தோஇவர் சேர்வே. 8  

மேலது நான்முகன் எய்தியது இல்லை
          கீழது சேவடி தன்னை
நீலது வண்ணனும் எய்தியது இல்லை
          என இவர் நின்றதும் அல்லால்
ஆலது மாமதி தோய்பொழில் பாச்சில்
          ஆச்சிரா மத்து உறை கின்ற
பாலது வண்ணரோ பைந்தொடி வாடப்
          பழிசெய்வ தோஇவர் பண்பே.  9  

நாணொடு கூடிய சாயின ரேனும்
          நகுவர் இவர் இரு போதும்
ஊணொடு கூடிய உள்கு நகையால்
          உரைகள் அவைகொள வேண்டா
ஆணொடு பெண்வடிவு ஆயினர் பாச்சில்
          ஆச்சிராமத்து உறை கின்ற
பூண்நெடு மார்பரோ பூங்கொடி வாடப்
          புனைசெய்வ தோஇவர் பொற்பே.  10  

அகமலி அன்பொடு தொண்டர் வணங்க
          ஆச்சிரா மத்து உறை கின்ற
புகைமலி மாலை புனைந்து அழகாய
          புனிதர் கொலாம் இவர் என்ன
நகைமலி தண்பொழில் சூழ்தரு காழி
          நற்றமிழ் ஞானசம் பந்தன்
தகைமலி தண் தமிழ் கொண்டு இவை ஏத்தச்
          சாரகிலா வினை தானே.

திருச்சிற்றம்பலம்