திருமந்திரம் 2:05 - பிரளயம்

                          

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	5
தந்திரம்	இரண்டாம்  தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	5.  பிரளயம்
பிற குறிப்புகள்	இறைவன் அழித்து பின் அருள்வான்.

திருச்சிற்றம்பலம்

                  

கருவரை மூடிக் கலந்து எழும் வெள்ளத்து

இருவரும்  கோ என்று இகல இறைவன்

ஒருவனும் நீர் உற ஓங்கொளி ஆகி

அருவரை யாய் நின்று அருள் புரிந் தானே.  1

அலைகடல் ஊடு அறுத்து அண்டத்து வானோர்

தலைவன் எனும்பெயர் தான் தலைமேற் கொண்டு

உலகார் அழற்கண் டுள்விழாது ஓடி

அலைவாயில் வீழாமல் அஞ்சல் என்றானே.  2

தண்கடல் விட்டது அமரரும் தேவரும்

எண்கடல் சூழ் எம்பிரான் என்று இறைஞ்சுவர்

விண்கடல் செய்தவர் மேல் எழுந்து அப்புறம்

கண்கடல் செய்யுங் கருத்து அறியாரே.  3

சமைக்க வல்லானைச் சயம்பு என்று ஏத்தி

அமைக்கவல் லார் இவ்வுலகத்து உளாரே

திகைத்த தெண்ணீரில்  கடல் ஒலி ஓசை

மிகைக்கொள அங்கி மிகாமைவைத் தானே.  4

பண்பழி செய்வழி பாடுசென்று அறப்புறம்

கண்பழி யாத கமலத்து இருக்கின்ற

நண்பழி யாளனை நாடிச்சென்று அச்சிரம்

விண்பழி யாத விருத்திகொண் டானே.  5