2:15 - மூவகை சீவ வர்க்கம்

     ௨

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	15
தந்திரம்	இரண்டாம்  தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	15.  மூவகை சீவ வர்க்கம்
பிற குறிப்புகள்	விஞ்ஞானகலர், பிரளாயகலர் சகலர்

திருச்சிற்றம்பலம்

                  

சத்தி சிவன் விளையாட்டால் உயிராக்கி 

ஒத்த இருமாயா கூட்டத் திடை ஊட்டிச்

சுத்தமா தாகுந்துரியம் புரிவித்துச் 

சித்தம் புகுந்து சிவமாயமாக்குமே   1

விஞ்ஞானர் நால்வரு மெய்ப்பிரள யாகலத்து

அஞ்ஞானர் மூவருந் தாங்கு சகலத்தின்

அஞ்ஞானர் மூவரு மாகும் பதின்மராம்

விஞ்ஞான ராதியர் வேற்றுமை தானே.  2

விஞ்ஞானர் கேவலத்து ஆராது விட்டவர்

அஞ்ஞானர் அட்டவித் தேசராம்  சார்ந்துளோர்

எஞ்ஞானர் ஏழ்கோடி மந்திர நாயகர்

மெய்ஞ் ஞானர் ஆணவம் விட்டுநின் றாரே.  3

இரண்டா வதில்முத்தி எய்துவர் அத்தனை

இரண்டாவது உள்ளே இருமல பெத்தர்

இரண்டு ஆகும்  நூற்றெட்டு உருத்திரர் என்பர்

முரண்சேர் சகலத்தர் மும்மலத் தாரே.  4

பெத்தத்த சித்தொடு பேண்முத்தச் சித்து அது 

ஒத்திட்டு இரண்டிடை யூடு உற்றார் சித்துமாய்

மத்தது மும்மலம் வாட்டுகை மாட்டாதார்

சத்தத்து அமிழ்ந்து சகலத்து ளாரே.  5

சிவம் ஆகி ஐவகைத் திண்மலஞ் செற்றோர்

அவம் ஆகார் சித்தர்முத் தாந்தத்து வாழ்வார்

பவம் ஆன தீர்வோர்; பசுபாசம் அற்றோர்

நவம் ஆன தத்துவம் நாடிக்கண் டோரே.  6

விஞ்ஞானர் ஆணவ கேவல மேவுவோர்

விஞ்ஞானம் மாயையில் தங்கும் இருமலர்

அஞ்ஞானர் அச்சக லத்தர் சகலராம்

விஞ்ஞானர் ஆதிகள் ஒன்பான் வேறு உயிர்களே.  7

விஞ்ஞான கன்மத்தால் மெய் அகம் கூடி

அஞ்ஞான கன்மத்தினால் சுவர் யோனிபுக்கு

எஞ்ஞான மெய்தீண்டியே இடை யிட்டுப்போய் 

மெய்ஞ்ஞானர் ஆகிச் சிவம் மேவல் உண்மையே.  8

ஆணவந் துற்ற அவித்தாம் நனவு அற்றோர்

காணிய விந்துவாம்,  நாத சகல ஆதி

ஆணவம் ஆதி அடைந்தோர் அவர் அன்றே

சேண் உயர் சத்தி சிவதத்துவம்  ஆமே.  9