2:22 - குரு நிந்தை

                          

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	22
தந்திரம்	இரண்டாம்  தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	22.  குரு நிந்தை
பிற குறிப்புகள்	குருவை பழித்தவர் அடையும் துன்பம்

திருச்சிற்றம்பலம்

பெற்றிருந் தாரையும் பேணார் கயவர்கள்

உற்றிருந் தாரை உளைவன சொல்லுவர்

கற்றிருந் தார்வழி உற்றிருந் தாரவர்

பெற்றிருந் தார்அன்றி யார்பெறும் பேறே.  1

ஓரெழுத்து ஒருபொருள் உணரக் கூறிய

சீரெழுத் தாளரைச் சிதையச் செப்பினோர்

ஊரிடைச் சுணங்கனாய்ப் பிறந்து இங்குஓர்உகம்

பாரிடைக் கிருமியாய் பழகுவர் மண்ணிலே.2

பத்தினி பத்தர்கள் தத்துவ ஞானிகள்

சித்தங் கலங்கச் சிதைவுகள் செய்தவர்

அத்தமும் ஆவியும் ஆண்டு ஒன்றில் மாண்டிடும்

சத்தியம் ஈது சதாநந்தி ஆணையே  3

மந்திரம் ஓரெழுத்து உரைத்த மாதவர்

சிந்தையில் நொந்திடத் தீமைகள் செய்தவர்

நுந்திய சுணங்காய்ப் பிறந்து நூறுரு 

வந்திடும்  புலையராய் மாய்வர் மண்ணிலே.  4

ஈசன் அடியார் இதயம் கலங்கிடத்

தேசமும் நாடும் சிறப்பும் அழிந்திடும்

வாசவன் பீடமும் மாமன்னர் பீடமும்

நாசம் அது ஆகுமே நம்நந்தி ஆணையே.  5

சன்மார்க்க சற்குருச் சந்நிதி பொய்வரின்

நன்மார்க்கமும் குன்றி ஞானமும் தங்காது

தொன்மார்க்க மாய துறையும் மறந்திட்டுப்

பன்மார்க்க மும்கெட்டுப் பஞ்சமும் ஆமே.  6

கைப்பட்ட மாமணி தானிடை கைவிட்டு

மெய்ப்பட்ட கல்லைச் சுமப்போன் விதிபோன்றும்

கைப்பட்ட நெய்பால் தயிர்நிற்கத் தானறக்

கைப்பிட்டு உண்பான்போன்றும் கன்மி ஞானிக்கு ஒப்பே.  7