3.3 - நியமம்

                                

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	3
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	3. நியமம்
பிற குறிப்புகள்	நல்லவற்றை செய்தல்

திருச்சிற்றம்பலம்

ஆதியை வேதத்தின் அப்பொரு ளானைச்

சோதியை ஆங்கே சுடுகின்ற அங்கியைப்

பாதியுள் மன்னும் பராசத்தி யோடு உடன்

நீதி உணர்ந்து நியமத்த னாமே.

தூய்மை அருள் ஊண் சுருக்கம் பொறைசெவ்வை

வாய்மை நிலைமை வளர்த்தலே மற்று இவை

காமம் களவு கொலை எனக் காண்பவை

நேமி ஈர் ஐந்து நியமத்த னாமே.

தவம் செபம் சந்தோடம் ஆத்திகம் தானம்

சிவன்தன் விரதமே சித்தாந்தக் கேள்வி

மகஞ்சிவ பூசை ஒண் மதிசொல்லீர் ஐந்து

நிவம்பல செய்யின் நியமத்த னாமே.  3