3.5 - பிராணாயமம்

                                  

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	5
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	5. பிராணாயமம்
பிற குறிப்புகள்	பிராணனை கட்டுப் படுத்துவது பிராணாயமம்

திருச்சிற்றம்பலம்

ஐவர்க்கு நாயகன் அவ்வூர்த் தலைமகன்

உய்யக்கொண்டு ஏறும் குதிரை மற்று ஒன்று உண்டு

மெய்யர்க்குப் பற்றுக்கொடுக்குங் கொடாதுபோய்ப்

பொய்யரைத் துள்ளி விழுத்திடும் தானே  1

ஆரியன் நல்ல குதிரை இரண்டு உள

வீசிப் பிடிக்கும் விரகு அறிவார் இல்லை

கூரிய நாதன் குருவின் அருள்பெற்றால்

வாரிப் பிடிக்க வசப்படும் தானே  2

புள்ளினும் மிக்க புரவியை மேற்கொண்டால்

கள்ளுண்ண வேண்டாம் தானே களிதரும்

துள்ளி நடப்பிக்குஞ் சோம்பு தவிர்ப்பிக்கும்

உள்ளது சொன்னோம் உணர்வுடை யோருக்கே  3

பிராணன் மனத்தொடும் பேராது அடங்கிப்

பிராணன் இருக்கின் பிறப்பு இறப்பு இல்லை

பிராணன் மடைமாறிப் பேச்சு அறிவித்துப்

பிராணன் அடைபேறு பெற்று உண்டீர் நீரே

ஏறுதல் பூரகம் ஈரெட்டு வாமத்தால்

ஆறுதல் கும்பம் அறுபத்து நாலதில்

ஊறுதல் முப்பத் திரண்டதி ரேசகம்

மாறுதல் ஒன்றின்கண் வஞ்சகம் ஆமே

வளியினை வாங்கி வயத்தில் அடக்கில்

பளிங்கொத்துக் காயம் பழுக்கினும் பிஞ்சாம்

தெளியக் குருவின் திருவருள் பெற்றால்

வளியினும் வேட்டு அளியனும் ஆமே

எங்கே இருக்கினும் பூரி இடத்திலே

அங்கே அதுசெய்ய ஆக்கைக்கு அழிவில்லை

அங்கே பிடித்தது விட்டு அளவும் செல்லச்

சங்கே குறிக்கத் தலைவனும் ஆமே  7

ஏற்றி இறக்கி இருகாலும் பூரிக்கும்

காற்றைப் பிடிக்கும் கணக்கு அறிவார் இல்லை

காற்றைப் பிடிக்கும்  கணக்கு அறிவாளர்க்குக்

கூற்றை உதைக்கும் குறியது வாமே  8

மேல்கீழ் நடுப்பக்கம்  மிக்கு உறப் பூரித்துப்

பாலாம் இரேசகத் தால் உட் பதிவித்து

மாலாகி உந்தியுள் கும்பித்து வாங்கவே

ஆலாலம் உண்டான் அருள்பெற லாமே  9

வாமத்தில் ஈரெட்டு மாத்திரை பூரித்தே

ஏமுற்ற முப்பத் திரண்டும் இரேசித்துக்

காமுற்ற பிங்கலைக் கண்ணாக இவ்விரண்டு

ஓமத்தால் எட்டெட்டுக் கும்பிக்க உண்மையே  10

இட்ட தவ்வீடூ இளகாது இரேசித்துப்

புட்டிப் படத்தச நாடியும் பூரித்துக்

கொட்டிப் பிராணன் அபானனும் கும்பித்து

நட்டம் இருக்க நமன் இல்லை தானே.

புறப்பட்டுப் புக்குத் திரிகின்ற வாயுவை

நெறிப்பட வுள்ளே நின்மல மாக்கில்

உறுப்புச் சிவக்கும் உரோமங் கறுக்கும்

புறப்பட்டுப் போகான் புரிசடை யோனே  12

கூடம் எடுத்துக் குடிபுக்க மங்கையர்

ஓடுவர் மீளுவர் பன்னிரண்டு அங்குலம்

நீடுவர் எண்விரல் கண்டிப்பர் நால்விரல்

கூடிக் கொளின் கோல அஞ்செழுத்து ஆமே  13

பன்னிரண் டானைக்குப்  பகல் இரவு உள்ளது

பன்னிரண் டானையைப் பாகன் அறிகிலன்

பன்னிரண் டானையைப் பாகன் அறிந்தபின்

பன்னிரண் டானைக்குப் பகல்இரவு இல்லையே