3.6 - பிரத்யாகாரம்

                                   

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	6
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	6. பிரத்தியாகாரம்
பிற குறிப்புகள்	வெளியே செல்லும் மனதை உள்ளே நிறுத்தி பழகுதல்

திருச்சிற்றம்பலம்

கண்டு கண்டு உள்ளே கருத்துற வாங்கிடில்

கொண்டு கொண்டு உள்ளே குணம்பல காணலாம்

பண்டு உகந்து எங்கும் பழமறை தேடியை

இன்று கண்டு இங்கே இருக்கலும் ஆமே  1

நாபிக்குக் கீழே பன்னிரெண்டு அங்குலம்

தாபிக்கும்  மந்திரம் தன்னை அறிகிலர்

தாபிக்கும்  மந்திரம் தன்னை அறிந்தபின்

கூவிக்கொண்டு ஈசன் குடியிருந் தானே 2

மூலத்து இருவிரல் மேலுக்கு முன்நின்ற

பாலித்த யோனிக்கு இருவிரல் கீழ்நின்ற

கோலித்த குண்டலி உள் எழும் செஞ்சுடர்

ஞாலத்து நாபிக்கு நால்விரல் கீழதே  3

நாசிக்கு அதோமுகம் பன்னிரண்டு அங்குலம்

நீ சித்தம் வைத்து நினையவும் வல்லையேல்

மாசித்த மாயோகம் வந்து தலைப்பெய்தும்

தேகத்துக்கு என்றும் சிதைவு இல்லை ஆகுமே 4

சோதி இரேகைச் சுடர் ஒளி தோன்றிடின்

கோது இல் பரானந்தம் என்றே குறிக்கொண்மின்

நேர்திகழ் கண்டத்தே நில ஒளி எய்தினால்

ஓதிய தன் உடல் உன்மத்தம் ஆமே  5

மூலத் துவாரத்தை முக்காரம் இட்டிரு

மேலைத் துவாரத்தின் மேல்மனம் வைத்திரு

வேல் ஒத்த கண்ணை வெளியில் விழித்திரு

காலத்தை வெல்லும் கருத்து இது  தானே  6

எருவிடும் வாசற்கு இருவிரல் மேலே

கருவிடும் வாசற்க்கு இருவிரல் கீழே

உரு இடும் சோதியை உள்கவல் லார்க்குக்

கரு இடும் சோதி கலந்துநின் றானே  7

ஒருக்கால் உபாதியை ஒண்சோதி தன்னைப்

பிரித்துணர் வந்த உபாதிப் பிரிவைக்

கரைத்து உணர்வு உன்னல் கரைதல்உள் நோக்கல்

பிரத்தியா காரப் பெருமையது ஆமே  8

புறப்பட்ட வாயுப் புகவிடா வண்ணம்

திறப்பட்டு நிச்சயம்  சேர்ந்து உடன் நின்றால்

உறப்பட்டு நின்றது உள்ளமும் அங்கே

புறப்பட்டுப் போகான் பெருந்தகை யோனே  9

குறிப்பினின் உள்ளே குவலயம் தோன்றும்

வெறுப்பு இருள் நீங்கி விகிர்தனை நாடும்

சிறப்பு உறு சிந்தையைச் சிக்கென்று உணரில்

அறிப்புறு காட்சி அமரரும் ஆமே  10