3.7 தாரணை

                                    

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	7
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	7. தாரணை
பிற குறிப்புகள்	உள்ளுக்கு இழுத்த மனதை இருக்கச் செய்தல்

திருச்சிற்றம்பலம்

கோணா மனத்தைக் குறிக்கொண்டு கீழ்க்கட்டி

வீணாத்தண்டு ஊடே வெளியுறத் தான் நோக்கிக்

காணாக்கண் கேளாச் செவி என்று இருப்பார்க்கு

வாழ் நாள் அடைக்கும் வழி அதுவாமே  1

மலை ஆர் சிரத்து இடை வான் நீர் அருவி

நிலை ஆரப் பாயும் நெடுநாடி ஊடேபோய்ச்

சிலை ஆர் பொதுவில் திருநடம் ஆடும்

தொலையாத ஆனந்தச் சோதிகண் டேனே  2

மேலை நிலத்தினாள் வேதகப் பெண்பிள்ளை

மூல நிலத்தில் துயில்கின்ற மூர்த்தியை

ஏல எழுப்பி இவளுடன் சந்திக்கப்

பாலனும் ஆவான் 1பராநந்தி ஆணையே  3

கடைவாச லைக்கட்டிக் காலை எழுப்பி

இடைவாசல் நோக்கி இனிது உள் இருத்தி

மடைவாயில் கொக்குப்போல் வந்தித்து இருப்பார்க்கு

உடையாமல் ஊழி இருக்கலும் ஆமே  4

கலந்த உயிருடன் காலம் அறியில்

கலந்த உயிர் அது காலின் நெருக்கம்

கலந்த உயிர் அது கால் அது கட்டின்

கலந்த உயிருடல் காலமும் நிற்குமே  5

வாய் திற வாதார் மனத்தில் ஓர் மாடு உண்டு

வாய்திறப் பாரே வளியிட்டுப் பாய்ச்சுவர்

வாய்திற வாதார் மதியிட்டு மூட்டுவர்

கோய்திற வாவிடில் கோழையும் ஆமே  6

வாழலும் ஆம்பல காலும் மனத்திடைப்

போழ்கின்ற வாயு புறம்படாப் பாய்ச்சுறில்

ஏழுசா லேகம் இரண்டு பெருவாய்தல்

பாழி பெரியதோர் பள்ளி அறையே  7

நிரம்பிய ஈர் ஐந்தில் ஐந்தவை போனால்

இரங்கி விழித்திருந்து என்செய்வை பேதாய்

வரம்பினைக் கோலி வழிசெய்கு வார்க்குக்

குரங்கினைக் கொட்டை பொதியலு மாமே  8

முன்னம் வந்தனர் எல்லாம் முடிந்தனர்

பின்னை வந்தவர்க்கு என்ன பிரமாணம்

முன்னூறு கோடி உறுகதி பேசிடில்

என்ன மாயம் இடிகரை நிற்குமே  9

அரித்த உடலை ஐம்பூதத்தில் வைத்துப்

பொருத்த ஐம்பூதம் சத்தாதியில் போந்து

தெரித்த மனாதி சத்தாதியில் செல்லத்

தரித்தது தாரணை தற்பரத் தோடே  10

1. ஏழு சாலேகம்-ஏழு பலகணி-கண் 2; காது 2; நாசி 2; வாய் 1; 

2. இரண்டு பெருவாய் - எருவாய்; கருவாய்