திருப்பனந்தாள்

       

௨ 

திருஞானசம்பந்தர் சுவாமிகள் அருளிச்செய்த
மூன்றாம் திருமுறை

தகவல் பலகை	விவரம்
தலம்	திருப் பனந்தாள்
ஊர்	தால வனம், தாடகேச்சரம்
நாடு	சோழ (காவிரி வட)
ॐசுவாமி	செஞ்சடையப்பர், தாலவனேஸ்வரர், ஜடாதரர், அருண ஜடேஸ்வரர்
ॐஅம்பிகை	பெரியநாயகி, பிரஹன்நாயகி, தாலவனேஸ்வரி
பாடியவர்கள்	சம்பந்தர் (1)         கண் போலி நெற்றியினான்  (3-62)
ஸ்தல மரம்	பனை மரம்
தீர்த்தம்	பிரம தீர்த்தம்
பண்	பஞ்சமம்
குறிப்புகள்	தாடகை வழிபட்ட தலம் (ராமாயணத்தில் வரும் தாடகை அல்ல) குங்குலிய கலய நாயனாரார் வளைவு நிமிர்த்தப்பட்டது பிரமன், திருமால், இந்திரன், ஐராவதம், அகத்தியர், சூரிய சந்திரர் ஆதிசேஷன் நாக கன்னிகை குங்கிலிய கலய நாயனார் வழிபட்ட தலம்
பதிக பலன்	வினை நீங்கப் பெறுவார்கள்
வரிசை எண்.	60                                                             39/63

திருச்சிற்றம்பலம்

கண்பொலி நெற்றியினான் திகழ்
          கையில் ஓர் வெண்மழுவான்    
பெண்புணர் கூறு உடையான் மிகு
          பீடுடை மால்விடையான்    
விண்பொலி மாமதிசேர் தரு
          செஞ்சடை வேதியனூர்    
தண்பொழில் சூழ்பனந்தாள் திருத்
          தாடகை ஈச்சரமே.  1

விரித்தவன் நான்மறையை மிக்க
          விண்ணவர் வந்து இறைஞ்ச    
எரித்தவன் முப்புரங்கள் இயல்
          ஏழுலகில் உயிரும்    
பிரித்தவன் செஞ்சடைமேல் நிறை
          பேரொலி வெள்ளந்தன்னைத்    
தரித்தவன் ஊர்பனந்தாள் திருத்
          தாடகை ஈச்சரமே.  2

உடுத்தவன் மான்உரிதோல் கழலுள்
          கவல்லார் வினைகள்    
கெடுத்தருள் செய்யவல்லான் கிளர்
          கீதம் ஓர் நான்மறையான்    
மடுத்தவன் நஞ்சு அமுதா மிக்க
          மாதவர் வேள்வியைமுன்    
தடுத்தவன் ஊர்பனந்தாள் திருத்
          தாடகை ஈச்சரமே.  3

சூழ்தரு வல்வினையும் உடல்
          தோன்றிய பல்பிணியும்    
பாழ்பட வேண்டுதிரேல் மிக
          ஏத்துமின் பாய்புனலும்    
போழிள வெண்மதியும் அனல்
          பொங்கர வும்புனைந்த    
தாழ்சடை யான்பனந்தாள் திருத்
          தாடகை ஈச்சரமே.  4

விடம்படு கண்டத்தினான் இருள்
          வெள்வளை மங்கையொடும்    
நடம்புரி கொள்கையினான் அவன்
          எம் இறை சேரும் இடம்    
படம்புரி நாகமொடு திரை
          பன்மணி யும் கொணரும்    
தடம்புனல் சூழ்பனந்தாள் திருத்
          தாடகை ஈச்சரமே.  5

விடை உயர் வெல்கொடியான் அடி
          விண்ணொடு மண்ணுமெல்லாம்    
புடைபட ஆடவல்லான் மிகு
          பூதமார் பல்படையான்    
தொடைநவில் கொன்றையொடு வன்னி
          துன்னெருக் கும் அணிந்த    
சடையவன் ஊர்பனந்தாள் திருத்
          தாடகை ஈச்சரமே.  6

மலையவன் முன்பயந்த மட
          மாதை ஓர் கூறு உடையான்    
சிலைமலி வெங்கணையால்
          புரம்மூன்று அவை செற்று உகந்தான்    
அலைமலி தண்புனலும் மதி
          ஆடரவும் அணிந்த    
தலையவன் ஊர்பனந்தாள் திருத்
          தாடகை ஈச்சரமே.  7

செற்றரக் கன்வலியைத் திரு
          மெல்விர லால் அடர்த்து    
முற்றும்வெண்ணீறு அணிந்த 
          திருமேனியன் மும்மையினான்    
புற்று அரவம் புலியின் உரி
          தோலொடு கோவணமும்    
தற்றவன் ஊர்பனந்தாள் திருத்
          தாடகை ஈச்சரமே.  8

வின்மலை நாண் அரவம் மிகு
          வெங்கனல் அம்பு அதனால்    
புன்மைசெய் தான் அவர்தம் புரம்
          பொன்றுவித் தான்புனிதன்    
நன்மலர் மேல் அயனும் நண்ணும்
          நாரணனும் அறியாத்    
தன்மையன் ஊர்பனந்தாள் திருத்
          தாடகை ஈச்சரமே.  9

ஆதர் சமணரொடும் மடை
          ஐந்துகில் போர்த்து உழலும்    
நீதர் உரைக்கு மொழி யவை
          கொள்ளன்மின் நின்மலனூர்    
போதவிழ் பொய்கை அதனுள் திகழ்
          புள்ளிரி யப்பொழில்வாய்த்    
தாதவிழும் பனந்தாள் திருத்
          தாடகை ஈச்சரமே.  10

தண்வயல் சூழ்பனந்தாள் திருத்
          தாடகை ஈச்சரத்துக்    
கண்ணய லேபிறையான் அவன்
          தன்னைமுன் காழியர்கோன்    
நண்ணிய செந்தமிழால் மிகு
          ஞானசம் பந்தன்நல்ல    
பண்ணியல் பாடல்வல்லார் அவர்
          தம்வினை பற்று அறுமே.  11

திருச்சிற்றம்பலம்