3.10 - அட்டாங்க யோகப் பேறு

                                       

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	10
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	10. அட்டாங்க யோக பேறு
பிற குறிப்புகள்	அட்டாங்க யோகத்தினால் அடையும் நன்மை

திருச்சிற்றம்பலம்

இயமம் 

போதுகந் தேறும் புரிசடை யான் அடி

யாதுகந் தாரம ராபதிக் கேசெல்வர்

ஏது உகந்தான் இவன் என்று அருள் செய்திடு

மாது உகந்து ஆடிடு மால்விடை யோனே  1

நியமம்

பற்றிப் பதத்து அன்பு வைத்துப் பரன்புகழ்

கற்று இருந்து ஆங்கே கருதும் அவர்கட்கு

முற்றெழுந்து ஆங்கே முனிவர் எதிர்வரத்

தெற்றும் சிவபதம் சேரலும் ஆமே  2

ஆதனம்

வருந்தித் தவம் செய்து வானவர் கோவாய்த்

திருந்த அமராபதிச் செல்வன் இவன் எனத்

தருந்தண் முழவம் குழலும் இயம்ப

இருந்து இன்பம் எய்துவர் ஈசன் அருளே  3

பிராணாயாமம்

செம்பொற் சிவகதி சென்று எய்தும் காலத்துக்

கும்பத்து அமரர் குழாம்வந்து எதிர்கொள்ள

எம்பொன் தலைவன் இவனாம் எனச்சொல்ல

இன்பக் கலவி இருக்கலும் ஆமே  4

பிரத்தியாகாரம்

சேருறு காலம் திசைநின்ற தேவர்கள்

ஆர் இவன் என்ன அரனாம் இவன் என்ன

ஏருறு தேவர்கள் எல்லாம் எதிர்கொள்ளக்

காருறு கண்டனை மெய்கண்ட வாறே  5

தாரணை

நல்வழி நாடி நமன்வழி மாற்றிடும் 

சொல்வழி யாளர் சுருங்காப் பெருங்கொடை

இல்வழி யாளர் இமையவர் எண் திசைப்

பல்வழி எய்தினும் பார்வழி ஆகுமே  6

தியானம்

தூங்க வல் லார்க்கும் துணை ஏழ் புவனமும்

வாங்கவல் லார்க்கும் வலிசெய்து நின்றிடும்

தேங்க வல்லார்க்கும் திளைக்கும் அமுதமும்

தாங்கவல் லார்க்குந் தன்னிடம் ஆமே  7

சமாதி

காரிய மான உபாதியைத் தான் கடந்து

ஆரிய காரணம் ஏழும் தன் பாலுற

ஆரிய காரண மாய தவத்திடைத்

தாரியல் தற்பரம் சேர்தல் சமாதியே  8