திரு கஞ்சனூர்

                                                                              ௨ 

திருநாவுக்கரசு சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திரு கஞ்சனூர்
ஊர்/வேறு பெயர்	பலாசவனம், ப்ராசரபுரம், பிரமபுரி அக்கினிபுரம் , கம்சபுரம், முந்திரிபுரி
நாடு	சோழ (காவிரி வட)
ॐசுவாமி	அக்கினீஸ்வரர்
ॐஅம்பிகை	கற்பகாம்பிகை
பாடியவர்கள்	அப்பர் (1)          மூவிலை நற்சூலம் (6-90)
ஸ்தல மரம்	பலாச மரம்
தீர்த்தம்	அக்கினி தீர்த்தம்
பண்	திருத்தாண்டகம்
குறிப்புகள்	பஞ்சாட்சர மகிமையை வெளிப்படுத்திய திருத்தலம்  ஹரதத்தர் என்னும் சிவாச்சாரியாருக்கு அறல் புரிந்த தலம்  கலிக்காமர், மானக்கஞ்சறார் ஆகியோர் அவதார திருப்பதி.
பதிக பலன்	திருவருள் சித்திக்கும்.
வரிசை எண்.	90                                                               36/63

திருச்சிற்றம்பலம்

மூவிலைநற் சூலம் வலன் ஏந்தினானை
மூன்றுசுடர்க் கண்ணானை மூர்த்தி தன்னை
நாவலனை நரைவிடை ஒன்று ஏறுவானை
நால்வேதம் ஆறு அங்கம் ஆயி னானை
ஆவின் நிலைந்து உகந்தானை அமரர் கோவை
அயன் திருமா லானானை அனலோன் போற்றும்
காவலனைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந் தேனே.  1

தலையேந்து கையானை என்பார்த் தானைச்
சவந்தாங்கு தோளானைச் சாம்ப லானைக்
குலையேறு நறுங்கொன்றை முடிமேல் வைத்துக்
கோநாகம் அசைத்தானைக் குலமாங் கைலை
மலையானை மற்றொப்பார் இல்லா தானை
மதிகதிரும் வானவரும் மாலும் போற்றும் 
கலையானைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந்தேனே.  2

தொண்டர்குழாம் தொழுது ஏத்த அருள்செய் வானைச்
சுடர்மழுவாட் படையானைச் சுழிவான் கங்கைத்
தெண்டிரைகள் பொருதிழிசெஞ் சடையி னானைச்
செக்கர்வான் ஒளியானைச் சேராது எண்ணிப்
பண்டமரர் கொண்டுகந்த வேள்வி எல்லாம்
பாழ்படுத்துத் தலை அறுத்துப் பற்கண் கொண்ட
கண்டகனைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந் தேனே.  3

விண்ணவனை மேருவில்லா வுடையான் தன்னை
மெய்யாகிப் பொய்யாகி விதியா னானைப்
பெண்ணவனை ஆணவனைப் பித்தன் தன்னைப்
பிணம் இடுகாடு உடையானைப் பெருந்தக் கோனை
எண்ணவனை எண் திசையும் கீழு மேலும்
இருவிசும்பும் இருநிலமும் ஆகித் தோன்றும்
கண்ணவனைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந் தேனே.  4

உருத்திரனை உமாபதியை உலகு ஆனானை
உத்தமனை நித்திலத்தை ஒருவன் தன்னைப்
பருப்பதத்தைப் பஞ்சவடி மார்பி னானைப்
பகல் இரவாய் நீர்வெளியாய்ப் பரந்து நின்ற
நெருப்பு அதனை நித்திலத்தின் தொத்தொப் பானை
நீறணிந்த மேனியராய் நினைவார் சிந்தைக்
கருத்தவனைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந் தேனே.  5

ஏடேறு மலர்க்கொன்றை அரவு தும்பை
இளமதியம் எருக்கு வானிழிந்த கங்கைச்
சேடெறிந்த சடையானைத் தேவர் கோவைச்
செம்பொன்மால் வரையானைச் சேர்ந்தார் சிந்தைக்
கேடிலியைக் கீழ்வேளூர் ஆளும் கோவைக்
கிறிபேசி மடவார்பெய் வளைகள் கொள்ளும்
காடவனைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந்தேனே.  6

நாரணனும் நான்முகனும் அறியா தானை
நால்வேதத்து உருவானை நம்பி தன்னைப்
பாரிடங்கள் பணிசெய்யப் பலிகொண்டு உண்ணும்
பால்வணனைத் தீவணனைப் பகல் ஆனானை
வார்பொதியும் முலையாளோர் கூறன் தன்னை
மானிடங்கை உடையானை மலிவார் கண்டம்
கார்பொதியும் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந் தேனே.  7

வானவனை வலிவலமும் மறைக்காட் டானை
மதிசூடும் பெருமானை மறையோன் தன்னை
ஏனவனை இமவான் தன் பேதை யோடும்
இனிதிருந்த பெருமானை ஏத்து வார்க்குத்
தேனவனைத் தித்திக்கும் பெருமான் தன்னைத்
தீதிலா மறையவனைத் தேவர் போற்றும்
கானவனைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந்தேனே.  8

நெருப்பு உருவத் திருமேனி வெண்ணீற் றானை
நினைப்பார்தம் நெஞ்சானை நிறைவா னானைத்
தருக்கழிய முயலகன்மேல் தாள்வைத் தானைச்
சலந்தரனைத் தடிந்தோனைத் தக்கோர் சிந்தை
விருப்பவனை விதியானை வெண்ணீற் றானை
விளங்கொளியாய் மெய்யாகி மிக்கோர் போற்றும்
கருத்தவனைக் கஞ்சனூ ராண்ட கோவைக்
கற்பகத்தைக் கண்ணாரக் கண்டு உய்ந் தேனே.  9

மடலாழித் தாமரை ஆயிரத்தில் ஒன்று
மலர்க்கணிடந் திடுதலுமே மலிவான் கோலச்
சுடராழி நெடுமாலுக்கு அருள்செய் தானைத்
தும்பியுரி போர்த்தானைத் தோழன் விட்ட
அடலாழித் தேருடைய இலங்கைக் கோனை
அருவரைக்கீழ் அடர்த்தானை அருளார் கருணைக்
கடலானைக் கஞ்சனூர் ஆண்ட கோவைக்
கற்பகத்தைக் கண்ணாரக் கண்டு உய்ந் தேனே.  10

திருச்சிற்றம்பலம்