3.14- கால சக்கரம்

                                           

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	14
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	14. கால சக்கரம்
பிற குறிப்புகள்	முடிவில்லாமல் வரும் இந்த கால சக்கரம்  கடக்க வேண்டிய உபாயமும்

திருச்சிற்றம்பலம்

மதிவட்டம் ஆக வரை ஐந்து நாடி

இது விட்டு அங்கு ஈரா று அமர்ந்த அதனால்

பதிவட்டத் துள்நின்று பாலிக்கு மாறும்

அதுவிட்டுப் போமாறும் ஆயலுற் றேனே  1

உற்றறிவு ஐந்தும் உணர்ந்து அறிவு ஆறு ஏழும்

கற்றறி வெட்டுங் கலந்தறி ஒன்பதும்

பற்றிய பத்தும் பலவகை நாழிகை 

அற்றறியாது அழிகின்ற வாறே  2

அழிகின்ற ஆண்டு அவை ஐயைஞ்சு மூன்றும்

மொழிகின்ற முப்பத்து மூன்று என்பது ஆகும்

கழிகின்ற கால் அறுபத்திரண்டு என்பது 

எழுகின்றது  ஈரைம்பது எண் அற்று இருந்தே  3

திருந்து தினம் அத் தினத்தினொடு நின்று 

இருந்து அறி நாள் ஒன்று; இரண்டு எட்டு  மூன்று

பொருந்திய நாளொடு புக்கு அறிந்து ஓங்கி

வருந்துதல் இன்றி மனை புக லாமே  4

மனைபுகு வீரும் அகத்திடை நாடி

என இரு பத்து அஞ்சும் ஈராறு அதனால்

தனை அறிந்து ஏறட்டுத் தற்குறி ஆறு

வினை அறி ஆறும் விளங்கிய நாலே  5

நாலும் கடந்தது நால்வரும் நால் அஞ்சு 

பாலம் கடந்தது பத்துப் பதினைந்து

கோலம் கடந்த குணத்து ஆண்டு மூவிரண்டு

ஆலம் கடந்து ஒன்று ஆர் அறி வாரே  6

ஆறும் இருபதுக்கு ஐயஞ்சு மூன்றுக்கும்

தேறும் இரண்டு இருபத்தோடு ஆறு இவை

கூறும்  மதி ஒன்றினுக்கு இருபத்தேழு

வேறு பதியங்கள் நாள் விதித் தானே  7

விதித்த இருபத்தெட் டொடு மூன்று அறையாக

தொகுத்து அறி முப்பத்து மூன்று தொகுமின்

பதித்து அறி பத்தெட்டுப் பார் ஆதிகள் நால் 

உதித்து அறி மூன்று இரண்டு ஒன்றின் முறையே  8

முறைமுறை ஆய்ந்து முயன்றிலர் ஆகில்

இறை இறை யார்க்கும் இருக்க அரிது

மறையது காரண மற்றொன்றும் இல்லை

பறை அறை யாது பணிந்து முடியே  9

முடிந்தது அறியார் முயல்கின்ற மூர்க்கர்

இடிஞ்சில் இருக்க விளக்கு எரி கொண்டு

கடிந்து அனல் மூளக் கதுவ வல்லார்க்கு

நடந்திடும் பாரினில் நண்ணலும் ஆமே  10

நண்ணும்  சிறுவிரல் நாண் ஆக மூன்றுக்கும்

பின்னிய மார்பு இடைப் பேராமல் ஒத்திடும்

சென்னியில்  மூன்றுக்கும்  சேரவே 1நின்றிடும்

உன்னி உணர்ந்திடும் ஓவியம் தானே  11

ஓவியமான உணர்வை அறிமின்கள்;

பாவிகள் இத்தின் பயன் அறிவார் இல்லை

தீவினையாம் உடல் மண்டலம் மூன்றுக்கும்

பூவில் இருந்திடும் புண்ணியத் தண்டே  12

தண்டுடன் ஓடித் தலைப்பெய்த யோகிக்கு

மண்டலம்  மூன்று மகிழ்ந்து உடல் ஒத்திடும்

கண்டவர் கண்டனர் காணார் வினைப்பயன்

பிண்டம் பிரியப் பிணங்குகின் றாரே  13

பிணங்கி அழிந்திடும் பேறு அது கேள்நீ

அணங்குடன் ஆதித்தன் ஆறு விரியின்

வணங்குடனே வந்த வாழ்வு குலைந்து

சுணங்கனுக் காகச் சுழல்கின்ற வாறே  14

சுழல்கின்ற வாறின் துணைமலர் காணான்

தழலிடைப் புக்கிடும் தன்னுள் இல்லாமல்

கழல்கண்ட போம்வழி காணவல் லார்க்குக்கு

குழல்வழி நின்றிடும் கூத்தனும் ஆமே  15

கூத்தன் குறியில் குணம்பல கண்டவர்

சாத்திரந் தன்னைத் தலைப்பெய்து நிற்பர்கள்

பார்த்திருந்து உள்ளே அனுபோக நோக்கிடில்

ஆத்தனும் ஆகி அமர்ந்திடும் ஒன்றே  16

ஒன்றில் வளர்ச்சி உலப்பிலி கேள் இனி

நன்று என்று மூன்றுக்கு நாள் அது சென்றிடும்

சென்றிடும்  முப்பதும்  சேர இருந்திடில்

குன்றிடைப் பொன்திகழ் கூத்தனும் ஆமே  17

கூத்று அவன் ஒன்றிடும் கூர்மை அறிந்து அங்கே

ஏத்துவர் பத்தினில் எண்திசை தோன்றிடப்

பார்த்து மகிழ்ந்து பதுமரை நோக்கிடில்

சாத்திடும் நூறு தலைப்பெய்ய லாமே  18

சாத்திடு நூறு தலைப்பெய்து நின்றவர்

காத்து உடல் ஆயிரங் கட்டு உறக் காண்பர்கள்

சேர்த்து உடல் ஆயிரம் சேர இருந்தவர்

மூத்து உடன் கோடி யுகம் அது ஆமே  19

உகம் கோடி கண்டும் ஒசிவு அற நின்று

அகம் கோடி கண்டு உள் அயல் அறக் காண்பர்கள்

சிவம் கோடி விட்டுச் செறிய இருந்து அங்கு

உகம் கோடி கண்டு அங்கு உயார் உறு வாரே  20

உயர் உறுவார் உலகத் தொடும் கூடிப்

பயன் உறுவார்பலர் தாம் அறி யாமல்

செயல் உறுவார்சிலர் சிந்தை இலாமல்

கயல் உறு கண்ணியைக் காணகி லாரே  21

காணகி லாதார் கழிந்து ஓடிப் போவர்கள்

நாணகி லாதார் நயம்பேசி விடுவர்கள்

காணகி லாதார் கழிந்த பொருள் எலாம்

காணகி லாமற் கழிகின்ற வாறே  22

கழிகின்ற அப்பொருள் காணகி லாதார்

கழிகின்ற அப்பொருள் காணலும் ஆகும்

கழிகின்ற உள்ளே கருத்துற நோக்கில்

கழியாத அப்பொருள் காணலும் ஆமே  23

கண்ணன் பிறப்பு இலி காண் நந்தியாய் உள்ளே

எண்ணும் திசையுடன் ஏகாந்தன் ஆயிடும்

திண் என்று இருக்கும் சிவகதியாய் நிற்கும்

நண்ணும் பதம் இது நாடவல் லார்கட்கே  24

நாடவல் லார்க்கு நமன் இல்லை கேடு இல்லை

நாடவல் லார்கள் நரபதி யாய்நிற்பர்

தேடவல் லார்கள் தெரிந்த பொருள் இது

கூடவல் லார்கட்குக் கூறலும் ஆமே  25

கூறும் பொருள் இது அகார உகாரங்கள்

தேறும் பொருள் இது சிந்தையுள் நின்றிடக்

கூறும்  மகாரம் குழல்வழி ஓடிட

ஆறும் அமர்ந்திடும் அண்ணலும் ஆமே  26

அண்ணல் இருப்பிடம் ஆரும் அறிகிலர்

அண்ணல் இருப்பிடம் ஆய்ந்துகொள் வார்களுக்கு

அண்ணல் அழிவு இன்றி உள்ளே அமர்ந்திடும்

அண்ணலைக் காணில் அவன் இவன் ஆகுமே  27

அவன் இவன் ஆகும் பரிசு அறிவார் இல்லை

அவன் இவன் ஆகும் பரிசு அது கேள்நீ

அவன் இவன் ஓசை ஒளியினுள் ஒன்றிடும்

அவன் இவன் வட்டம் அது  ஆகி நின் றானே  28

வட்டங்கள் ஏழும்  மலர்ந்திடும் உம்முளே

சிட்டன் இருப்பிடம்  சேர அறிகிலீர்

ஒட்டி இருந்து உள் உபாயம் உணர்ந்திடக்

கட்டி இருப்பிடம் காணலும் ஆகுமே  29

காணலும் ஆகும் பிரமன் அரி என்று

காணலும் ஆகும் கறைக்கண்டன் ஈசனைக்

காணலும் ஆகும் சதாசிவ சத்தியும்

காணலும் ஆகும் கலந்து உடன் வைத்ததே  30