3.13 - காய சித்தி உபாயம்

                                          

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	13
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	13. காய சித்தி உபாயம்
பிற குறிப்புகள்	உடலை அழியாமல், காத்தற்கு உரிய வழி

திருச்சிற்றம்பலம்

உடம்பார் அழியில் உயிரார் அழிவர்

திடம்பட மெய்ஞ்ஞானஞ் சேரவும் மாட்டார்

உடம்பை வளர்க்கும் உபாயம் அறிந்தே

உடம்பை வளர்த்தேன் உயிர்வளர்த் தேனே  1

உடம்பினை முன்னம் இழுக்கு என்று இருந்தேன்

உடம்பினுக்கு உள்ளே உறுபொருள் கண்டேன்

உடம்புளே உத்தமன் கோயில்கொண் டான் என்று

உடம்பினை யான் இருந்து ஓம்புகின் றேனே  2

சுழற்றிக் கொடுக்கவே சுத்திக் கழியும்

கழற்றி மலத்தைக் கமலத்துப் பூரித்து

உழற்றிக் கொடுக்கும் உபாயம் அறிவார்க்கு

அழற்றித் தவிர்ந்து உடல் அஞ்சனம் ஆமே  3

அஞ்சனம் போன்று உடல் ஐயறும் அந்தியில்

வஞ்சக வாத மறுமத்தி யானத்திற்

செஞ்சிறு காலையிற் செய்திடிற் பித்தறும்

நஞ்சறச் சொன்னோம் நரைதிரை நாசமே  4

மூன்று மடக்கு உடைப் பாம்பு இரண்டும் எட்டு உள

என்ற இயந்திரம் பன்னிரண்டு அங்குலம்

நான்ற இம் முட்டை யிரண்டையும் கட்டியிட்டு

ஊன்றி இருக்க உடம்பு அழியாதே  5

நூறும் அறுபதும் ஆறும் வலம்வர

நூறும் அறுபதும் ஆறும் இடம்வர

நூறும் அறுபதும் ஆறும் எதிரிட

நூறும் அறுபதும் ஆறும் புகுவரே  6

சத்தியார் கோயி லிடம்வலம் சாதித்தான்

மத்தியா னத்திலே வாத்தியங் கேட்கலாம்

தித்தித்த கூத்தும்  சிவனும் வெளிப்படும் 

சத்தியம் சொன்னோம் சதாநந்தி ஆணையே  7

திறத்திறம் விந்துத் திகழும் அகாரம்

உறப்பெற வேநினைந்து ஓதும் சகாரம்

மறிப்பது மந்திரம்  மன்னிய நாதம் 

அறப்பெற யோகிக்கு அறநெறி ஆமே  8

உந்திச் சுழியினுடனே பிராணனைச்

சிந்தித் தெழுப்பிச் சிவமந்திரத்தினால்

முந்தி முகட்டின் நிறுத்தி அபானனைச்

சிந்தித் தெழுப்பச் சிவன் அவன் ஆமே  9

மாறா மலக்கு தம் தன்மேல் இருவிரல்

கூறா இலிங்கத்தின் கீழே குறிக்கொண்மின்

ஆறா உடம்பிடை அண்ணலும் அங்கு உளன்

கூறா உபதேசம் கொண்டது காணுமே  10

நீல நிறனுடை நேரிழை யாளொடும்

சாலவும் புல்லிச் சதம் என்று இருப்பார்க்கு

ஞாலம் அறிய நரைதிரை மாறிடும்

பாலனும் ஆவர் பராநந்தி ஆணையே  11

அண்டஞ்சுருங்கில் அதற்கு ஓர் அழிவு இல்லை

பிண்டம் சுருங்கின் பிராணன் நிலைபெறும்

உண்டி சுருங்கில் உபாயம் பல உள

கண்டம் கறுத்த கபாலியும் ஆமே  12

பிண்டத்துள் உற்ற பிழக்கடை வாசலை

அண்டத்துள் உற்று அடுத்தடுத்து ஏகிடில்

வண்டிச் சிக்கு மலர்க்குழல் மாதரார்

கண்டிச் சிக்குநற் காயமும் ஆமே  13

சுழலும் பெருங்கூற்றுத் தொல்லைமுன் சீறி

அழலும் இரத்தத்துள் அங்கியுள் ஈசன்

கழல்கொள் திருவடி காண்குறில் ஆங்கே

நிழலுளுந் தெற்றுளும் நிற்றலும் ஆமே  14

நான்கண்ட வன்னியும் நாலு கலை ஏழும்

தான்கண்ட வாயுச் சரீரம்  முழுதொடும்

ஊன்கண்டு கொண்ட உணர்வும் மருந்தாக

மான்கன்று நின்று வளர்க்கின்ற வாறே 15

ஆகுஞ் சனவேத சத்தியை அன்புற

நீர் கொள்ளின் நெல்லின் வளர்கின்ற நேர்மையைப்

பாகு படுத்திப் பல்கோடி களத்தினால்

ஊழ்கொண்ட மந்திரத் தன்னால் ஒடுங்குமே