3.8 - தியானம்

                                     

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	8
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	8. தியானம்
பிற குறிப்புகள்	இடைவிடாமல் நினைத்த வண்ணம் இருத்தல்

திருச்சிற்றம்பலம்

வருமாதி ஈரெட்டுள் வந்த தியானம்

பொருவாத புந்தி புலன்போக மேவல்

உருவாய சத்தி பரத்தியான முன்னும்

குருவார் சிவத்தியானம் யோகத்தின் கூறே  1

கண் நாக்கு மூக்குச் செவிஞானக் கூட்டத்துள்

பண்ணாக்கி நின்ற பழம்பொருள் ஒன்று உண்டு

அண்ணாக்கின் உள்ளே அகண்ட ஒளிகாட்டிப்

புண்ணாக்கி நம்மைப் பிழைப்பித்த வாறே

ஒண்ணா நயனத்தில் உற்ற ஒளிதன்னைக்

கண்ணாரப் பார்த்துக் கலந்து அங்கு இருந்திடில்

விண்ணாறு வந்து வெளிகண்டிட ஓடிப்

பண்ணாமல் நின்றது பார்க்கலும் ஆமே  3

ஒருபொழுது உன்னார் உடலோடு உயிரை

ஒருபொழு துன்னார் உயிருட் சிவனை

ஒருபொழு துன்னார் சிவனுறை சிந்தையை

ஒருபொழு துன்னார் சந்திரப் பூவே 4

மனத்து விளக்கினை மாண்பட ஏற்றிச்

சினத்து விளக்கினைச் செல்ல நெருக்கி

அனைத்து விளக்கும் திரியொக்கத் தூண்ட

மனத்து விளக்கது மாயா விளக்கே  5

எண்ணா யிரத்து ஆண்டு யோகம் இருக்கினும்

கண்ணார் அமுதினைக் கண்டறிவார் இல்லை

உள் நாடிக்கு உள்ளே ஒளியுற நோக்கினால்

கண்ணாடி போலக் கலந்துநின் றானே  6

நாட்டமும் இரண்டும் நடுமூக்கில் வைத்திடில்

வாட்டமும் இல்லை மனைக்கும் அழிவில்லை

ஓட்டமும் இல்லை உணர்வில்லை தானில்லை

தேட்டமும் இல்லை சிவன் அவன் ஆமே  7

நயனம் இரண்டும் நாசிமேல் வைத்திட்டு 

உயர்வெழா வாயுவை உள்ளே அடக்கித்

துயரற நாடியே தூங்கவல் லார்க்குப்

பயன் இது காயம் பயம் இல்லை தானே  8

மணிகடல் யானை வார்குழல் மேகம்

அணிவண்டு தும்பி வளைபேரி கையாழ்

தணிந்து எழு நாதங்கள் தாமிவை பத்தும்

பணிந்தவர்க்கு அல்லது பார்க்கஒண் ணாதே  9

கடலொடு மேகங் களிறொடும் ஓசை

அடவெழும் வீணை அண்டரண் டத்துச்

சுடர்மன்னு வேணுச் சுரிசங்கின் ஓசை

திடமறி யோகிக்கு அல்லாற் தெரியாதே 10

ஈசன் இயல்பும் இமையவர் ஈட்டமும்

பாசம் இயங்கும் பரிந்துய ராய்நிற்கும்

ஓசை அதன்மணம் போல விடுவதோர்

ஓசையாம் ஈசன் உணரவல் லார்க்கே  11

நாத முடிவிலே நல்லாள் இருப்பது

நாத முடிவிலே நல்யோகம் இருப்பது

நாத முடிவிலே நாட்டம் இருப்பது

நாத முடிவிலே நஞ்சு உண்ட கண்டனே  12

உதிக்கின்ற ஆறினும் உள் அங்கி ஐந்தும்

துதிக்கின்ற தேசுடைத் தூங்கு இருள் நீங்கி

அதிக்கின்ற ஐவருள் நாதம் ஒடுங்கக்

கதிக்கொன்றை ஈசன் கழல்சேர லாமே  13

பள்ளி அறையில் பகலே இருளில்லை

கொள்ளி அறையில் கொளுந்தாமற் காக்கலாம்

ஒள்ளிது அறியில் ஓர் ஓசனை நீளிது

வெள்ளி அறையில் விடிவு இல்லை தானே  14

கொண்ட விரதம் குறையாமல்தான் ஒன்றித்

தண்டுடன் ஓடித் தலைப்பட்ட யோகிக்கு

மண்டல மூன்றினும் ஒக்க வளர்ந்தபின்

பிண்டமும் ஊழி பிரியாது இருக்குமே  15

அவ்வவர் மண்டலம் ஆம்பரிசு ஒன்று உண்டு

அவ்வவர் மண்டலத்து அவ்வவர் தேவராம்

அவ்வவர் மண்டலம் அவ்வவர்க் கேவரில்

அவ்வவர் மண்டலம் ஆயம் மற்றோர்க்கே  16

இளைக்கின்ற நெஞ்சத்து இருட்டு அறை உள்ளே

முளைக்கின்ற மண்டலம் மூன்றினும் ஒன்றித்

துளைப்பெரும் பாசம் துருவிடும் ஆகில்

இளைப்பின்றி மார்கழி ஏற்றம் அது ஆமே  17

முக்குண மூடற வாயுவை மூலத்தே

சிக்கென மூடித் திரித்துப் பிடித்திட்டுத்

தக்க வலமிடம் நாழிகை சாதிக்க

வைக்கும் உயர்நிலை வானவர் கோனே  18

நடலித்த நாபிக்கு நால்விரன் மேலே

மடலித்த வாணிக்கு இருவிரல் உள்ளே

கடலித்து இருந்து கருதவல் லார்கள்

சடலத் தலைவனைத் தாம் அறிந் தாரே  19

அறிவாய் அசத்து என்னும் ஆறாறு அகன்று

செறிவான மாயை சிதைத்து அரு ளாலே

பிறியாத பேரரு ளாயிடும் பெற்றி

நெறியான அன்பர் நிலை அறிந் தாரே