திருக்கானாட்டுமுள்ளூர்

                                                                                   ௨ 

சுந்தர மூர்த்தி  சுவாமிகள்  அருளிச்செய்த
ஏழாம் திருமுறை

தகவல் பலகை	விவரம்
தலம்	திருக்கானாட்டுமுள்ளூர்
ஊர்/வேறு பெயர்
நாடு	சோழ (காவிரி வட)
ॐசுவாமி	பதஞ்சலி ஈசுவரர்
ॐஅம்பிகை	கோல் வளைக்கை அம்மை
பாடியவர்கள்	சுந்தரர் (1)         வள்வாய மதி மிளிரும் (7-40)
ஸ்தல மரம்
தீர்த்தம்
பண்	கொல்லிக் கௌவாணம்
குறிப்புகள்	இந்த பதிக்கு சுந்தரர் வரும் போது பெருமான் காட்சி கொடுக்க கண்டு,  கண்டு தொழுதேன் என பாடி அருளியது.
பதிக பலன்	இம்மை மறுமை நலன் கிட்டும்.
வரிசை எண்.	40                                                            32/63

திருச்சிற்றம்பலம்

வள்வாய மதிமிளிரும் வளர்சடையி னானை
         மறையவனை வாய்மொழியை வானவர்தம்கோனைப்
புள்வாயைக் கீண்டுலகம் விழுங்கி உமிழ்ந் தானைப்
         பொன்னிறத்தின் முப்புரிநூல் நான்முகத்தி னானை
முள்வாய மடல்தழுவி முடத்தாழை ஈன்று
         மொட்டலர்ந்து விரைநாறும் முருகுவிரி பொழில்சூழ்
கள்வாய கருங்குவளை கண்வளருங் கழனிக்
         கானாட்டு முள்ளூரில் கண்டுதொழு தேனே.  1

ஒருமேக முகிலாகி ஒத்து உலகம் தானாய்
         ஊர்வனவும் நிற்பனவும் ஊழிகளுந் தானாய்ப்
பொருமேவு கடலாகிப் பூதங்கள் ஐந்தாய்ப்
         புனைந்தவனைப் புண்ணியனைப் புரிசடையி னானைத்
திருமேவு செல்வத்தார் தீமூன்றும் முத்தீ-ஆசுவனீயம், காருகபத்தியம், தக்கினாக்கினியம் வளர்த்த
         திருத்தக்க அந்தணர்கள் ஓதுநகர் எங்கும்
கருமேதி செந்தாம ரைமேயும் கழனிக்
         கானாட்டு முள்ளூரில் கண்டுதொழு தேனே.  2

இரும்புயர்ந்த மூவிலைய சூலத்தி னானை
         இறையவனை மறையவனை எண்குணத்தி னானைச்
சுரும்புயர்ந்த கொன்றையொடு தூமதியம் சூடும்
         சடையானை விடையானைச் சோதி எனும் சுடரை
அரும்பு உயர்ந்த அரவிந்தத்து அணிமலர்கள் ஏறி
         அன்னங்கள் விளையாடும் அகன்றுறையின் அருகே
கரும்புயர்ந்து பெருஞ்செந்நெல் நெருங்கிவிளை கழனிக்
         கானாட்டு முள்ளூரில் கண்டுதொழு தேனே.  3

பூளைபுனை கொன்றையொடு புரிசடையி னானைப்
         புனலாகி அனலாகிப் பூதங்கள் ஐந்தாய்
நாளைஇன்று நெருநலாய் ஆகாய மாகி
         ஞாயிறாய் மதியமாய் நின்றவெம் பரனைப்
பாளைபடு பைங் கமுகின் சூழல் இளம் தெங்கின்
         படுமதஞ்செய் கொழுந்தேறல் வாய்மடுத்துப் பருகிக்
காளைவண்டு பாடமயில் ஆலும்வளர் சோலைக்
         கானாட்டு முள்ளூரில் கண்டுதொழு தேனே.  4

செருக்குவாய்ப் பைங்கண்வெள் அரவு அரையி னானைத்
         தேவர்கள்சூ ளாமணியைச் செங்கண்விடை யானை
முருக்குவாய் மலர் ஒக்கும் திருமேனி யானை
         முன்னிலையாய் முழுது உலகமாய பெருமானை
இருக்குவாய் அந்தணர்கள் எழுபிறப்புள் எங்கும்
         வேள்வியிருந்து இருநிதியம் வழங்குநகர் எங்கும்
கருக்குவாய்ப் பெண்ணையொடு தெங்குமலி சோலைக்
         கானாட்டு முள்ளூரில் கண்டுதொழு தேனே.  5

விடையரவக் கொடி ஏந்தும் விண்ணவர் தம் கோனை
         வெள்ளத்து மால் அவனும் வேதமுத லானும்
அடியிணையும் திருமுடியும் காண அரி தாய
         சங்கரனைத் தத்துவனைத் தையல்மட வார்கள்
உடையவிழக் குழலவிழக் கோதைகுடைந் தாடக்
         குங்குமங்கள் உந்திவரு கொள்ளிடத்தின் கரைமேற்
கடைகள்விடு வார்குவளை களைவாரும் கழனிக்
         கானாட்டு முள்ளூரில் கண்டுதொழு தேனே.  6

அருமணியை முத்தினை ஆன் அஞ்சும் ஆடும்
         அமரர்கள்தம் பெருமானை அருமறையின் பொருளைத்
திருமணியைத் தீங்கரும்பின் ஊறலிருந் தேனைத்
         தெரிவரிய மாமணியைத் திகழ்தருசெம் பொன்னைக்
குருமணிகள் கொழித்து இழிந்து சுழித்து இழியும் திரைவாய்க்
         கோல்வளையார் குடைந்தாடும் கொள்ளிடத்தின் கரைமேற்
கருமணிகள் போல்நீலம் மலர்கின்ற கழனிக்
         கானாட்டு முள்ளூரில் கண்டுதொழு தேனே.  7

இழைதழுவு வெண்ணூலும் மேவுதிரு மார்பின்
         ஈசன் தன் எண் தோள்கள் வீசி எரி ஆடக்
குழைதழுவு திருக்காதில் கோள் அரவம் அசைத்துக்
         கோவணங்கொள் குழகனைக் குளிர்சடையி னானைத்
தழைதழுவு தண்ணிறத்த செந்நெல் அதன் அயலே
         தடந்தரள மென்கரும்பின் தாழ்கிடங்கின் அருகே
கழைதழுவித் தேன் தொடுக்கும் கழனிசூழ் பழனக்
         கானாட்டு முள்ளூரில் கண்டுதொழு தேனே.  8

குனிவினிய கதிர்மதியம் சூடுசடை யானைக்
         குண்டலம் சேர் காதவனை வண்டு இனங்கள் பாடப்
பனி உதிரும் சடையானைப் பால்வெண்ணீற் றானைப்
         பல உருவும் தன் உருவே ஆயபெரு மானைத்
துனிவினிய தூயமொழித் தொண்டைவாய் நல்லார்
         தூநீலங் கண்வளரும் சூழ்கிடங்கின் அருகே
கனிவினிய கதலிவனம் தழுவுபொழிற் சோலைக்
         கானாட்டு முள்ளூரில் கண்டுதொழு தேனே.  9

தேவியம்பொன் மலைக்கோமான் தன்பாவை ஆகத்
         தனது உருவம் ஒருபாகம் சேர்த்துவித்த பெருமான்
மேவியவெந் நரகத்தில் அழுந்தாமை நமக்கு
         மெய்ந்நெறியைத் தான்காட்டும் வேதமுத லானைத்
தூவிவாய் நாரையொடு குருகுபாய்ந் தார்ப்பத்
         துறைக்கெண்டை மிளிர்ந்துகயல் துள்ளிவிளை யாடக்
காவிவாய் வண்டுபல பண்செய்யுங் கழனிக்
         கானாட்டு முள்ளூரில் கண்டுதொழு தேனே.  10

திரையினார் கடல்சூழ்ந்த தென்னிலங்கைக் கோனைச்
         செற்றவனைச் செஞ்சடைமேல் வெண்மதியி னானைக்
கரையினார் புனல்தழுவு கொள்ளிடத்தின் கரைமேல்
         கானாட்டு முள்ளூரில் கண்டுகழல் தொழுது
உரையினார் மதயானை நாவல் ஆரூரன்
         உரிமையால் உரைசெய்த ஒண் தமிழ்கள் வல்லார்
வரையினார் வகைஞாலம் ஆண்டவர்க்கும் தாம்போய்
         வானவர்க்கும் தலைவராய் நிற்பரவர் தாமே.  11

திருச்சிற்றம்பலம்