திரு நாரையூர் இரட்டை மணி மாலை

                                                                                   ௨ 

நம்பியாண்டார் நம்பி   அருளிச்செய்த
பதினோறாம் திருமுறை

தகவல் பலகை	விவரம்
தலம்	திரு நாரையூர்
ஊர்/வேறு பெயர்
நாடு	சோழ (காவிரி வட)
ॐசுவாமி	சௌந்தரநாதர்
ॐஅம்பிகை	திரிபுரசுந்தரி
பாடியவர்கள்	சம்பந்தர் (3)         உரையினில் வந்த (2-86)         காம்பினை வென்ற (3-102)         கடலிடை வெங்கடு (3-107) அப்பர் (2)          வீறு தானுடை வெற்பன் (5-55)         சொல்லானை பொருளானை (6-74) நம்பியாண்டார் நம்பி  (1)         திருநாரையூர் திரு இரட்டை மணிமாலை (11-32)
ஸ்தல மரம்	புன்னாகம்
தீர்த்தம்	காருண்ய தீர்த்தம்
பண்
குறிப்புகள்	நாரை வழிபட்டது .  பொல்லாப் பிள்ளையார்  சிறப்புடையது  இவர் உணர்த்தியவாறு நம்பியாண்டார் நம்பிகள் தில்லையில் சேமித்து வைத்திருந்த தேவாரத் திருமுறைகளை உலகிற்கு வெளிப்படுத்தினார்  வெண்பா மற்றும் கட்டளைக் கலித்துறையில் அந்தாதி தொடை அமையப்பெற்றது. மாங்கனியை பிள்ளையார் அம்மையப்பரை வலம் வந்து பெற்ற செய்தி முதலியன இதில் கூறப் பெறும்.
பதிக பலன்	திருவருள் கிட்டும்
வரிசை எண்.	31                                                            33/63

திருச்சிற்றம்பலம்

என்னை நினைந்து அடிமை 
          கொண்டு என் இடர் கெடுத்துத்
தன்னை நினையத் 
          தருகின்றான் - புன்னை
விரசு மகிழ் சோலை 
          வியன் நாரையூர் முக்கண்
அரசு மகிழ் அத்திமுகத் தான்.  1

முகத்தாற் கரியன்என் றாலும் 
          தனையே முயன்றவர்க்கு
மிகத்தான் வெளியன்என் றே மெய்ம்மை
          உன்னும் விரும்படியார்
அகத்தான் திகழ்திரு நாரையூர் 
          அம்மான் பயந்தஎம்மான்
உகத்தானவன் தன் உடலம் 
          பிளந்த ஒருகொம்பனே.  2

கொம்பனைய வள்ளி 
          கொழுநன் குறுகாமே
வம்பனைய மாங்கனியை 
          நாரையூர் - நம்பனையே
தன்னவலம் செய்துகொளும் 
          தாழ்தடக்கை யாய்என்நோய்
பின்னவலம் செய்வதெனோ பேசு.  3

பேசத் தகாதெனப் பேய்  
          எருதும்பெருச் சாளியும்என்று
ஏசத் தகும்படி ஏறுவதே
          இமை யாதமுக்கட்
கூசத் தகும் தொழில் நுங்கையும் 
          நுந்தையும் நீயும்இந்தத்
தேசத் தவர்தொழு நாரைப் 
          பதியுள் சிவக் களிறே.  4

களிறு முகத்தவனாய்க் 
          காயம்செந் தீயின்
ஒளிறும் உருக்கொண்டது  
          என்னே - அளறுதொறும்
பின்நாரை யூர்ஆரல் 
          ஆரும் பெரும்படுகர்
மன்நாரை யூரான் மகன்.  5

மகத்தினில் வானவர் பல்கண் 
          சிரம்தோள் நெரித்து அருளும்
சுகத்தினில் நீள்பொழில் நாரைப் 
          பதியுள் சுரன்மகற்கு
முகத்தது கைஅந்தக் கையது 
          மூக்கந்த மூக்கு அதனின்
அகத்தது வாய்அந்த வாயது 
          போலும் அடுமருப்பே.  6

மருப்பைஒரு கைக்கொண்டு 
          நாரையூர் மன்னும்
பொருப்பைஅடி போற்றத் 
          துணிந்தால் - நெருப்பை
அருந்தஎண்ணு கின்றஎறும்பு 
          அன்றே அவரை
வருந்தஎண்ணு கின்ற மலம்.  7

மலஞ்செய்த வல்வினை நோக்கி 
          உலகை வலம்வரும் அப்
புலஞ்செய்த காட்சிக் குமரற்கு 
          முன்னே புரிசடைமேல்
சலஞ்செய்த நாரைப் பதி அரன் 
          தன்னைக் கனிதரவே
வலஞ்செய்து கொண்ட மதக்களிறே  
          உன்னை வாழ்த்துவனே.  8

வனஞ்சாய வல்வினைநோய் 
          நீக்கி வனசத்
தனஞ் சாயலைத் தருவான் 
          அன்றோ - இனஞ்சாயத்
தேரையூர் நம்பர்மகன் 
          திண்தோள் நெரித்து அருளும்
நாரையூர் நம்பர்மக னாம்.  9

நாரணன் முன்பணிந்து ஏத்த நின்று 
          எல்லை நடாவிய அத்
தேரணவும் திரு நாரையூர் 
          மன்னு சிவன்மகனே
காரணனே எம் கணபதியே 
          நற் கரிவதனா
ஆரண நுண்பொரு ளே  
          என்பவர்க்கு இல்லை அல்லல்களே.  10

அல்லல் களைந்தான்தன் 
          அம்பொன் உலகத்தின்
எல்லை புகுவிப்பான் 
          ஈண்டு உழவர் - நெல்லல்களை
செங்கழுநீர் கட்கும் 
          திருநாரை யூர்ச்சிவன்சேய்
கொங்கெழுதார் ஐங்கரத்த கோ.  11

கோவிற் கொடிய நமன்தமர் 
          கூடா வகைவிடுவன்
காவில் திகழ்தரு நாரைப் 
          பதியில் கரும்பனைக்கை
மேவற்கு அரிய இருமதத்து  
          ஒற்றை மருப்பின்முக்கண்
ஏவிற் புருவத்து இமையவள் 
          தான்பெற்ற யானையையே.  12

யானேத் தியவெண்பா 
          என்னை நினைந்தடிமை
தானே சனார்த்தனற்கு 
          நல்கினான் - தேனே
தொடுத்தபொழில் நாரையூர்ச் 
          சூலம் வலன்ஏந்தி
எடுத்த மதமுகத்த ஏறு.  13

ஏறிய சீர்வீ ரணக்குடி 
          ஏந்திழைக் கும்இருந்தேன்
நாறிய பூந்தார்க் குமரற்கும் 
          முன்னினை நண்ணலரைச்
சீறிய வெம்பணைச் சிங்கத்தினுக்கு  
          இளையானை விண்ணோர்
வேறியல் பால்தொழு நாரைப் 
          பதியுள் விநாயகனே.  14

கனமதில்சூழ் நாரையூர் 
          மேவிக் கசிந்தார்
மனமருவி னான்பயந்த 
          வாய்ந்த - சினமருவு
கூசாரம் பூண்டமுகக் 
          குஞ்சரக்கன்று என்றார்க்கு
மாசார மோசொல்லு வான்.  15

வானிற் பிறந்த மதி
          தவழும்பொழில் மாட்டளிசூழ்
தேனிற் பிறந்த மலர்த்
          திரு நாரைப் பதி திகழும்
கோனிற் பிறந்த கணபதி 
          தன்னைக் குலமலையின்
மானிற் பிறந்த களிறு என்று 
          உரைப்பர்இவ் வையகத்தே.  16

வையகத்தார் ஏத்த 
          மதில் நாரை யூர்மகிழ்ந்து
பொய் அகத்தார் உள்ளம் 
          புகலொழிந்து - கையகத்தோர்
மாங்கனிதன் கொம்பண்டம் 
          பாசமழு மல்குவித்தான்
ஆங்கனிநஞ் சிந்தைஅமர் வான்.  17

அமரா அமரர் தொழுஞ்சரண் 
          நாரைப் பதிஅமர்ந்த
குமரா குமரற்கு முன்னவனே 
          கொடித் தேர்அவுணர்
தமரா சறுத்தவன் தன்னுழைத் 
          தோன்றின னேஎனநின்று
அமரா மனத்தவர் ஆழ்
          நரகத்தில் அழுந்துவரே.  18

அவமதியாது உள்ளமே 
          அல்லல் அற நல்ல
தவமதியால் ஏத்திச் 
          சதுர்த்தோம் - நவமதியாம்
கொம்பன் விநாயகன்கொங்கார் 
          பொழில்சூழ் நாரையூர்
நம்பன் சிறுவன்சீர் நாம்.  19

நாந்தன மாமனம் ஏத்துகண்டாய்  
          என்றும் நாண்மலரால்
தாந்தன மாக இருந்தனன் 
          நாரைப் பதிதன்னுளே
சேர்ந்தன னேஐந்து செங்கையனே 
          நின் திரள்மருப்பை
ஏந்தின னேஎன்னை ஆண்டவனே 
         எனக்கு என் ஐயனே.  20

திருச்சிற்றம்பலம்