3.20 - அமுரிதாரணை

                                            

௨ 

திருமூல தேவ நாயனார்  அருளிச்செய்த திருமந்திரம் 
பத்தாம் திருமுறை

தகவல் பலகை	விவரம்
அதிகாரம்	20
தந்திரம்	மூன்றாம் தந்திரம்
திருமுறை	திருமந்திரம்  - 10
ஆசிரியர்	திருமூலர்
அதிகார தலைப்பு	20. அமுரி தாரணை
பிற குறிப்புகள்	வீரியம் உடலில் தங்கும்படி செய்தல்

திருச்சிற்றம்பலம்

உடலில் கிடந்த உறுதிக் குடிநீர்க்

கடலில் சிறுகிணறு ஏற்றம் இட்டால் ஒக்கும்

உடலில் ஒருவழி ஒன்றுக்கு இறைக்கில்

நடலைப் படாது உயிர் நாடலும் ஆமே  1

தெளிதரும் இந்தச் சிவநீர் பருகில்

ஒளிதரும் ஓர் ஆண்டில் ஊனம் ஒன்று இல்லை

வளியுறும்  எட்டின் மனமும் ஒடுங்கும்

களிதரும் காயம் கனகம் அதாமே  2

நூறு மிளகு நுகரும் சிவத்தினீர்

மாறும் இதற்கு மருந்து இல்லை மாந்தர்கள்

தேறில் இதனைத் தெளி உச்சி கப்பிடின்

மாறும் இதற்கு மறுமயி ராமே  3

கரை அருகே நின்ற கானல் உவரி

வரைவரை என்பர் மதியிலா மாந்தர்

நுரைதிரை நீக்கி நுகரவல் லார்க்கு

நரைதிரை மாறு நமனும் அங்கில்லையே  4

அளக நன்னுத லாயோர் அதிசயம்

களவு காயம் கலந்த இந் நீரில்

மிளகு நெல்லியும் மஞ்சளும் வேம்பிடில்

இளகும் மேனி இருளும் கபாலமே  5

வீர மருந்து  என்றும் விண்ணோர் மருந்து என்றும்

நாரி மருந்து என்றும் நந்தி அருள்செய்தான்

ஆதி மருந்து என்று அறிவார் அகலிடம் 

சோதி மருந்து இது  சொல்ல ஒண் ணாதே  6