பொது - திருப்பாசுரம்

                                                                                     ௨ 

ஞானசம்பந்த மூர்த்தி சுவாமிகள்  அருளிச்செய்த
மூன்றாம்  திருமுறை

தகவல் பலகை	விவரம்
தலம்	பொது
ஊர்/வேறு பெயர்
நாடு	பொது
ॐசுவாமி	சுந்தரேஸ்வரர்
ॐஅம்பிகை	அங்கயற்கண்ணி
பாடியவர்கள்	சம்பந்தர்  (1)         வாழ்க அந்தணர் (3-54)
ஸ்தல மரம்
தீர்த்தம்
பண்	கௌசிகம்
குறிப்புகள்	புனல் வாதத்தின் போது, நீரில் இட்ட திருப்பதிகம்  திருப்பாசுரம் என போற்றப் படுகிறது  தினசரி வழிபாட்டில் ஒத வேண்டிய பதிகம்  இந்த பதிகத்தில் வழக்கத்திற்கு மார்கா 12 பாடல்கள் அமைந்து இருக்கும்படி உள்ளது  இதற்கு சேக்கிழார் சுவாமிகள் 24 பாடல்களால் பாசுரக் கருத்து அருளிச் செய்து உள்ளார்கள்
பதிக பலன்	வான் உலகை ஆள்வார்கள்
வரிசை எண்.	54

திருச்சிற்றம்பலம்

வாழ்க அந்தணர்  வானவர் ஆனினம்
வீழ்க தண்புனல்  வேந்தனும் ஓங்குக
ஆழ்க தீயது எல்லாம்அரன் நாமமே
சூழ்க!  வையகமும் துயர் தீர்கவே.  1

அரிய காட்சியராய்த் தமது அங்கைசேர்
எரியர் ஏறு உகந்து ஏறுவர் கண்டமும்
கரியர் காடு உறை வாழ்க்கையர் ஆயினும்
பெரியர் ஆர் அறிவார் அவர் பெற்றியே.  2

வெந்த சாம்பல் விரை எனப் பூசியே
தந்தையாரொடு தாய் இலர் தம்மையே
சிந்தி யாஎழுவார்வினை தீர்ப்பர் ஆல்
எந்தை யார் அவர் எவ்வகை யார்கொலோ.  3

ஆட்பாலவர்க்கு அருளும் வண்ணமும் ஆதிமாண்பும்
கேட்பான் புகில்அளவில்லை கிளக்க வேண்டா
கோட்பா லனவும் வினையும் குறுகாமை எந்தை
தாள் பால் வணங்கித் தலைநின்று இவை கேட்க தக்கார்.  4

ஏதுக்க ளாலும் எடுத்த மொழியாலும் மிக்குச்
சோதிக்க வேண்டா சுடர்விட்டுளன் எங்கள்சோதி
மாதுக்கம் நீங்கல் உறுவீர் மனம்பற்றி வாழ்மின்
சாதுக்கள் மிக்கீர் இறையே வந்து சார்மின்களே.  5

ஆடும் எனவும் அரும் கூற்றம் உதைத்து வேதம்
பாடும் எனவும் புகழ் அல்லது பாவம் நீங்கக்
கேடும் பிறப்பும் அறுக்கும் எனக் கேட்டீர் ஆகில்
நாடும் திறத்தார்க்கு அருள் அல்லது நாட்ட லாமே.  6

கடிசேர்ந்த போது மலரான கைக்கொண்டு நல்ல
படிசேர்ந்த பால்கொண்டு அங்கு ஆட்டிடத் தாதை பண்டு
முடிசேர்ந்த காலை அற வெட்டிட முக்கண் மூர்த்தி
அடிசேர்ந்த வண்ணம் அறிவார் சொலக்கேட்டும் அன்றே.  7

வேத முதல்வன் முதலாக விளங்கி வையம்
ஏதப் படாமை உலகத்தவர் ஏத்தல் செய்யப்
பூத முதல்வன் முதலே முதலாப் பொலிந்த
சூதன் ஒலிமாலை என்றே கலிக்கோவை சொல்லே.  8

பார் ஆழி வட்டம் பகையால் நலிந்து ஆட்ட ஆடிப்
பேர் ஆழி யானது இடர் கண்டு அருள் செய்தல் பேணி
நீராழி விட்டேறி நெஞ்சு இடம் கொண்ட வர்க்குப்
போராழி ஈந்த புகழும் புகழ் உற்றது அன்றே.  9

மால் ஆயவனும் மறைவல்ல நான் முகனும்
பாலாய தேவர் பகரில் அமுது ஊட்டல் பேணிக்
காலாய முந்நீர் கடைந்தார்க்கு அரிதாய் எழுந்த
ஆலாலம் உண்டு அங்கு அமரர்க்கு அருள்  செய்த தாமே.  10

அற்று அன்றி அந்தண் மதுரைத் தொகை ஆக்கினானும்
தெற்று என்று தெய்வம் தெளியார் கரைக்கோலை தெண்ணீர்ப்
பற்று இன்றிப் பாங்கு எதிர்வில் ஊரவும் பண்பு நோக்கில்
பெற்று என்று உயர்த்த பெருமான் பெருமானும் அன்றே.  11

நல்லார்கள் சேர்புகலி ஞானசம்பந்தன் நல்ல
எல்லார்களும்பரவும் ஈசனை ஏத்து பாடல்
பல்லார்களும் மதிக்கப் பாசுரம் சொன்ன பத்தும்
வல்லார்கள் வானோர் உலகு ஆளவும் வல்லர் அன்றே.  12

திருச்சிற்றம்பலம்