திரு புன்கூர்

                                                                              ௨ 

சுந்தரமூர்த்தி   சுவாமிகள்  அருளிச்செய்த
ஏழாம் திருமுறை

தகவல் பலகை	விவரம்
தலம்	திரு புன்கூர்
ஊர்/வேறு பெயர்
நாடு	சோழ (காவிரி வட)
ॐசுவாமி	சிவலோக நாதர்
ॐஅம்பிகை	சொக்க நாயகி
பாடியவர்கள்	சம்பந்தர்   (1)        முந்தி நின்ற வினைகள் (1-27) அப்பர் (1)         பிறவாதே தோன்றிய (6-11) சுந்தரர்  (1)          அந்தணாளன் உன் (7-55)
ஸ்தல மரம்	புங்கன் மரம்
தீர்த்தம்	கணபதி தீர்த்தம்
பண்	தக்க ராகம்
குறிப்புகள்	இந்திரன், சூரியன், சந்திரன், அக்னி, பிரமன், அகத்தியர், பதஞ்சலி, சப்த கன்னியர் ஆகியோர் வழிபட்ட தலம்  திருநாளைப் போவார் (நந்தனார்) விண்ணப்பத்தை ஏற்று, ஈசன் ஆணையால் நந்தி விலகி உள்ள திருத்தலம்.  நந்தனார் இங்கு திருக்குளம் வெட்டினார்.  இந்த திருப்பதிகம் இறைவன் பலருக்கு பலவகையில் அருள்  செயல்களை எடுத்து ஓதி புகழ்ந்து அருளியது.
பதிக பலன்	வினைகளில் இருந்து விடுபடலாம்.
வரிசை எண்.	55                                                           20/63

திருச்சிற்றம்பலம்

அந்த ணாளன்உன் அடைக்கலம் புகுத
          அவனைக் காப்பது காரண மாக
வந்த காலன் தன் ஆருயிர் அதனை
          வவ்வி னாய்க்கு உன் தன் வன்மைகண்டு அடியேன்
எந்தை நீ எனை நமன் தமர் நலியின்
          இவன்மற் றென் அடி யானென விலக்குஞ்
சிந்தை யால்வந்து உன் திருவடி அடைந்தேன்
          செழும்பொ ழில் திருப் புன்கூர் உளானே.  1

வைய கமுற்றும் மாமழை மறந்து
          வயலில் நீரிலை மாநிலந் தருகோம்
உய்யக் கொள்கமற்று எங்களை என்ன
          ஒளிகொள் வெண்முகி லாய்ப்பரந்து எங்கும்
பெய்யும் மாமழைப் பெருவெள்ளம் தவிர்த்துப்
          பெயர்த்தும் பன்னிரு வேலிகொண்டு அருளும்
செய்கை கண்டு நின் திருவடி அடைந்தேன்
          செழும்பொ ழில் திருப் புன்கூர் உளானே.  2

ஏத நன்னிலம் ஈரறு வேலி
          ஏயர் கோன் உற்ற இரும்பிணி தவிர்த்துக்
கோத னங்களின் பால்கறந் தாட்டக்
          கோல வெண்மணற் சிவன்றன்மேற் சென்ற
தாதை தாள் அற எறிந்தசண் டிக்கு உன்
          சடைமி சைமலர் அருள்செயக் கண்டு
பூத ஆளிநின் பொன்னடி அடைந்தேன்
          பூம்பொ ழில் திருப் புன்கூர் உளானே.  3

நற்ற மிழ்வல்ல ஞானசம் பந்தன்
          நாவினுக்கு அரையன் நாளைப்போ வானும்
கற்ற சூதன்நற் சாக்கியன் சிலந்தி
          கண்ணப் பன்கணம் புல்லன் என்று இவர்கள்
குற்றம் செய்யினும் குணம் எனக் கருதும்
          கொள்கை கண்டுநின் குரைகழல் அடைந்தேன்
பொற்றி ரள்மணிக் கமலங்கள் மலரும்
          பொய்கை சூழ்திருப் புன்கூர் உளானே.  4

கோல மால்வரை மத்தென நாட்டிக்
          கோள் அரவுசுற் றிக் கடைந்து எழுந்த
ஆல நஞ்சுகண் டவர்மிக இரிய
          அமரர்கட்கு அருள் புரிவது கருதி
நீல மார்கடல் விடந்தனை உண்டு
          கண்டத் தேவைத்த பித்தநீ செய்த
சீலம் கண்டுநின் திருவடி அடைந்தேன்
          செழும்பொ ழில் திருப் புன்கூர் உளானே.  5

இயக்கர் கின்னரர் யமனொடு வருணர்
          இயங்கு தீவளி ஞாயிறு திங்கள்
மயக்கம் இல்புலி வானரம் நாகம்
          வசுக்கள் வானவர் தானவர் எல்லாம்
அயர்ப்பு ஒன்றி நின் திருவடி அதனை
          அர்ச்சித் தார்பெறும் ஆரருள் கண்டு
திகைப்பு ஒன்றின்றி நின் திருவடி அடைந்தேன்
          செழும்பொ ழில் திருப் புன்கூர் உளானே.  6

போர்த்த நீள்செவி யாளர்அந் தணர்க்குப்
          பொழில்கொள் ஆல்நிழற் கீழறம் புரிந்து
பார்த்த னுக்கு அன்று பாசுப தம் கொடுத்து 
          அருளி னாய்பண்டு பகீரதன் வேண்ட
ஆர்த்து வந்திழி யும்புனற் கங்கை
          நங்கை யாளைநின் சடைமிசைக் கரந்த
தீர்த்த னேநின் தன் திருவடி அடைந்தேன்
          செழும்பொ ழில் திருப் புன்கூர் உளானே.  7

மூவெ யில்செற்ற ஞான்று உய்ந்த மூவரில்
          இருவர் நின் திருக் கோயிலின் வாய்தல்
காவ லாளர் என்று ஏவிய பின்னை
          ஒருவ நீகரி காடரங் காக
மானை நோக்கியோர் மாநடம் மகிழ
          மணிமு ழா முழக்க அருள் செய்த
தேவ தேவ நின் திருவடி அடைந்தேன்
          செழும்பொ ழில் திருப் புன்கூர் உளானே.  8

அறிவி னால்மிக்க அறுவகைச் சமயம்
          அவ்வ வர்க்கு அங்கே ஆரருள் புரிந்து
எறியு மாகடல் இலங்கையர் கோனைத்
          துலங்க மால்வரைக் கீழ் அடர்த் திட்டுக்
குறிகொள் பாடலின் இன்னிசை கேட்டுக்
          கோல வாளொடு நாளது கொடுத்த
செறிவு கண்டுநின் திருவடி அடைந்தேன்
          செழும்பொ ழில் திருப் புன்கூர் உளானே.  9

கம்ப மால் களிற்று இன்னுரி யானைக்
          காமற் காய்ந்ததோர் கண்ணுடை யானைச்
செம்பொ னே ஒக்கும் திருவுரு வானைச்
          செழும்பொ ழில் திருப் புன்கூர் உளானை
உம்பர் ஆளியை உமையவள் கோனை
          ஊரன் வன்றொண்டன் உள்ளத்தால் உகந்து 
அன்பி னால் சொன்ன அருந்தமிழ் ஐந்தோடு
          ஐந்தும் வல்லவர் அருவினை இலரே.  10

திருச்சிற்றம்பலம்