திரு வாட்போக்கி

                                                                                            ௨ 

திருநாவுக்கரசர் சுவாமிகள் அருளிச்செய்த

ஐந்தாம் திருமுறை

தகவல் பலகை	விவரம்
தலம்	திரு வாட்போக்கி
ஊர்/வேறு பெயர்	அய்யர் மலை, ரத்தினகிரி, சிவாலயமலை  மாணிக்கமலை, அரதனசலம்
நாடு	சோழ (காவிரி வட)
ॐசுவாமி	இரத்தன கிரீஸ்வரர், அரதனாசலேஸ்வரர், மாணிக்க ஈசர், முடித்தழும்பர், ராஜாலிங்கமூர்த்தி
ॐஅம்பிகை	சுரும்பார் குழலி
பாடியவர்கள்	அப்பர் (1)     கால பாசம் பிடித்து எழு  (5-86)
ஸ்தல மரம்
தீர்த்தம்
பண்	திருக் குறுந்தொகை
குறிப்புகள்	இந்திரன், சயந்தன், வாயு, ஆதிசேடன் வழிபட்டது  கடம்பர் கோயிலை காலையிலும் வாட்போக்கியை  பகலிலும், ஈங்கோய் மலையிலும் ஒரே நாளில் தரிசிப்பது சிறப்பு என்பது மரபு
பதிக பலன்	வினை நீக்கம் பெறுவர்.
வரிசை எண்.	80                                                                   1/63

திருச்சிற்றம்பலம்

கால பாசம் பிடித்து எழு தூதுவர்

பால கர்விருத்தர் பழையார் எனார்

ஆல நீழல் அமர்ந்த வாட் போக்கியார்

சீலம் ஆர்ந்தவர்செம்மையுள் நிற்பரே.  1

விடுத்த தூதுவர்வந்து வினைக்குழிப்

படுத்த போதுபயனிலை பாவிகாள்

அடுத்த கின்னரம் கேட்கும் வாட்போக்கியை

எடுத்தும் ஏத்தியும் இன்புறு மின்களே.  2

வந்து இவ்வாறு வளைத்து எழு தூதுவர்

உந்தி யோடிநரகத்து இடாமுனம்

அந்தியின் ஒளி தாங்கும் வாட் போக்கியார்

சிந்தி யா எழுவார் வினை தீர்ப்பரே.  3

கூற்றம் வந்து குமைத்திடும் போதினால்

தேற்றம் வந்து தெளிவுறல் ஆகுமே

ஆற்றவும் அருள் செய்யும் வாட்போக்கிபால்

ஏற்று மின்விளக்கை இருள் நீங்கவே.  4

மாறு கொண்டு வளைத்தெழு தூதுவர்

வேறு வேறு படுப்பதன் முன்னமே

ஆறு செஞ்சடை வைத்த வாட் போக்கியார்க்கு

ஊறியூறி உருகும் என் உள்ளமே.  5

கானம் ஓடிக் கடிது எழு தூதுவர்

தானம் ஓடு தலைபிடி யாமுனம்

ஆனஞ்சு ஆடி உகந்த வாட் போக்கியார்

ஊனம் இல்லவர்க்கு உண்மையில் நிற்பரே.  6

பார்த்துப் பாசம் பிடித்தெழு தூதுவர்

கூர்த்த வேலாற் குமைப்பதன் முன்னமே

ஆர்த்த கங்கை அடக்கும் வாட் போக்கியார்

கீர்த்தி மைகள்கிளர்ந்து உரைமின்களே.  7

நாடி வந்து நமன் தமர் நல்லிருள்

கூடி வந்து குமைப்பதன் முன்னமே

ஆடல் பாடல்  உகந்த வாட் போக்கியை

வாடியேத்த நம்வாட்டம் தவிருமே.  8

கட்ட றுத்துக் கடிது எழு தூதுவர்

பொட்ட நூக்கிப்புறப்படா முன்னமே

அட்ட மாமலர் சூடும் வாட்போக்கியார்க்கு

இட்ட மாகி இணை அடி ஏத்துமே.  9

இரக்க முன்னறியாது எழு தூதுவர்

பரக்க ழித்தவர்பற்றுதன் முன்னமே

அரக்கனுக்கு அருள் செய்த வாட்போக்கியார்

கரப்ப துங்கரப் பார் அவர் தங்கட்கே.  10

திருச்சிற்றம்பலம்