கோயில்

 

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	கோவில்
ஊர்	சிதம்பரம்
நாடு	காவிரி வடகரை
ॐசுவாமி	நடராசர், கனகசபாபதி
ॐஅம்பிகை	சிவகாம சுந்தரி
பாடியவர்கள்	திருஞானசம்பந்தர்(2),         கற்று ஆங்கு ஏறி ஓம்பி (1:80)         ஆடினாய் நறு நெய்  (3:01) திருநாவுக்கரசர்(8),         செஞ்சடைக்கற்றை  (4:22)         பத்தனாய் பாடமாட்டேன் (4:23)         பாளை உடை (4:80)         கரு நட்ட கண்டனை (4:81)         அன்னம்பாலிக்கும் (5:01)         பனைக்கை மும்மத (5:02)         அரியானை அந்தணர் தம்  (6:01)         மங்குல் மதி தவழும்.(6:02) சுந்தரர்(1)         மடித்தாடும் அடிமைக்கண் (7:90) மாணிக்கவாசகர் (26)         கீர்த்தித் திரு அகவல்         திருஅண்டப் பகுதி         போற்றித் திரு அகவல்         திருப் பொற்சுண்ணம்         திருக்கோதும்பி         திருத் தெள்ளேணம்         திருச்சாழல்         திருப்பூவல்லி         திரு உந்தியார்             திருத்தோள் நோக்கம்             திருப் பொன்னூசல்         அன்னைப்பத்து         குயில்பத்து         திருத்தசாங்கம்          திருப்பள்ளியெழுச்சி         கோயில் மூத்த திருப்பதிகம்         கண்டபத்து         அச்சப்பத்து         குலாப்பத்து         எண்ணப்பத்து         யாத்திரைப் பத்து         திருப்படை எழுச்சி         திருப்படையாட்சி                 ஆனந்தமாலை         அச்சோப்பதிகம்
ஸ்தல மரம்	தில்லை, ஆல்
தீர்த்தம்	சிவகங்கை
பண்	பெரிய திருத்தாண்டகம்
குறிப்புகள்	பஞ்ச பூத தலங்களுள் ஆகாய தலம். பஞ்ச சபைகளுள் இது கனக சபை
பதிக பலன்	பிறவி பேறு அடையலாம்
வரிசை எண்.	1                                                              காவிரி (வ) 1/63

திருச்சிற்றம்பலம்

அரியானை அந்தணர் தம் சிந்தையானை
     அருமறையின் அகத்தானை அணுவை யார்க்கும்
தெரியாத தத்துவனைத் தேனைப் பாலைத்
     திகழ் ஒளியைத் தேவர்கள் தங் கோனை மற்றைக்
கரியானை நான்முகனைக் கனலைக் காற்றைக்
     கனைகடலைக் குலவரையைக் கலந்து நின்ற
பெரியானைப் பெரும்பற்றப் புலியூ ரானைப்
     பேசாத நாளெல்லாம் பிறவா நாளே.  1 
 
கற்றானைக் கங்கைவார் சடையான் தன்னைக்
      காவிரிசூழ் வலஞ்சுழியுங் கருதி னானை
அற்றார்க்கும் அலந்தார்க்கும் அருள்செய் வானை
      ஆரூரும் புகுவானை அறிந்தோம் அன்றே
மற்றாருந் தன் ஒப்பாரில்லா தானை
      வானவர்கள் எப்பொழுதும் வணங்கி ஏத்தப்
பெற்றானைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  2 
 
கருமானின் உரியதளே உடையா வீக்கிக்
      கனைகழல்கள் கலந்து ஒலிப்ப அனல்கை யேந்தி
வருமானத் திரள்தோள்கள் மட்டித் தாட
      வளர்மதியஞ் சடைக்கு அணிந்து மானேர் நோக்கி
அருமான வாண்முகத்தாள் அமர்ந்து காண
      அமரர்கணம் முடிவணங்க ஆடு கின்ற
பெருமானைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  3 
 
அருந்தவர்கள் தொழுது ஏத்தும் அப்பன் தன்னை
      அமரர்கள்தம் பெருமானை அரனை மூவா
மருந்தமரர்க்கு  அருள்புரிந்த மைந்தன் தன்னை
      மறிகடலுங் குலவரையும் மண்ணும் விண்ணும்
திருந்தொளிய தாரகையுந் திசைகள் எட்டும்
      திரிசுடர்கள் ஓரிரண்டும் பிறவு மாய
பெருந்தகையைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  4 
 
அருந்துணையை அடியார்தம் அல்லல் தீர்க்கும்
      அருமருந்தை அகல்ஞாலத்து அகத்துள் தோன்றி
வருந்துணையுஞ் சுற்றமும் பற்றும் விட்டு
      வான்புலன்கள் அகத்தது அடக்கி மடவா ரோடும்
பொருந்தணைமேல் வரும்பயனைப் போக மாற்றிப்
      பொதுநீக்கித் தனைநினைய வல்லோர்க்கு என்றும்
பெருந்துணையைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  5 
 
கரும்பமரும் மொழிமடவாள் பங்கன் றன்னைக்
      கனவயிரக் குன்றனைய காட்சி யானை
அரும்பு அமரும் பூங்கொன்றைத் தாரான் தன்னை
      அருமறையோடு ஆறு அங்கம் ஆயி னானைச்
சுரும்பமரும் கடிபொழில்கள் சூழ்தென் ஆரூர்ச்
      சுடர்க்கொழுந்தைத் துளக்கில்லா விளக்கை மிக்க
பெரும்பொருளைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  6 
 
வரும்பயனை எழுநரம்பின் ஓசை யானை
      வரைசிலையா வானவர்கள் முயன்ற வாளி
அரும்பயஞ்செய் அவுணர் புரம் எரியக் கோத்த
      அம்மானை அலைகடல்நஞ் சயின்றான் தன்னைச்
சுரும்பமருங் குழல்மடவார் கடைக்கண் நோக்கிற்
      துளங்காத சிந்தையராய்த் துறந்தோர் உள்ளப்
பெரும்பயனைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  7 
 
காரானை ஈருரிவைப் போர்வை யானைக்
      காமருபூங் கச்சி ஏகம்பன் தன்னை
ஆரேனும் அடியவர்க்கு  அணியான் தன்னை
      அமரர்களுக்கு அறிவரிய அளவி லானைப்
பாரோரும் விண்ணோரும் பணிய நட்டம்
      பயில்கின்ற பரஞ்சுடரைப் பரனை எண்ணில்
பேரானைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  8 
 
முற்றாத பால் மதியஞ் சூடினானை
      மூவுலகும்  தானாய முதல்வன் தன்னைச்
செற்றார்கள் புரம் மூன்றும் செற்றான் தன்னைத்
      திகழ் ஒளியை மரகதத்தைத் தேனைப் பாலைக்
குற்றாலத்து அமர்ந்து உறையும் குழகன் தன்னைக்
      கூத்தாட வல்லானைக் கோனை ஞானம்
பெற்றானைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே.  9 
 
காரொளிய திருமேனிச் செங்கண் மாலுங்
      கடிக்கமலத் திருந்தயனுங் காணா வண்ணம்
சீர் ஒளிய தழற்பிழம்பாய் நின்ற தொல்லைத்
      திகழ் ஒளியைச் சிந்தை தனை மயக்கம் தீர்க்கும்
ஏரொளியை இருநிலனும் விசும்பும் விண்ணும்
      ஏழ் உலகும் கடந்த அண்டத்து அப்பால் நின்ற
பேரொளியைப் பெரும்பற்றப் புலியூ ரானைப்
      பேசாத நாளெல்லாம் பிறவா நாளே..

திருச்சிற்றம்பலம்