3. கோயில் உறவாகிய யோகம்

   

௨ 

திருமாளிகைத் தேவர்  அருளிச்செய்த திருவிசைப்பா 
ஒன்பதாம் திருமுறை

தகவல் பலகை	விவரம்
தலம்	கோவில்
ஊர்	சிதம்பரம்
நாடு	காவிரி வடகரை
ॐசுவாமி	நடராசர், கனகசபாபதி
ॐஅம்பிகை	சிவகாம சுந்தரி
பாடியவர்கள்	திருஞானசம்பந்தர்(2),         கற்று ஆங்கு ஏறி ஓம்பி (1:80)         ஆடினாய் நறு நெய்  (3:01) திருநாவுக்கரசர்(8),         செஞ்சடைக்கற்றை  (4:22)         பத்தனாய் பாடமாட்டேன் (4:23)         பாளை உடை (4:80)         கரு நட்ட கண்டனை (4:81)         அன்னம்பாலிக்கும் (5:01)         பனைக்கை மும்மத (5:02)         அரியானை அந்தணர் தம்  (6:01)         மங்குல் மதி தவழும்.(6:02) சுந்தரர்(1)         மடித்தாடும் அடிமைக்கண் (7:90) மாணிக்கவாசகர் (26)         கீர்த்தித் திரு அகவல்         திருஅண்டப் பகுதி         போற்றித் திரு அகவல்         திருப் பொற்சுண்ணம்         திருக்கோதும்பி         திருத் தெள்ளேணம்         திருச்சாழல்         திருப்பூவல்லி         திரு உந்தியார்             திருத்தோள் நோக்கம்             திருப் பொன்னூசல்         அன்னைப்பத்து         குயில்பத்து         திருத்தசாங்கம்          திருப்பள்ளியெழுச்சி         கோயில் மூத்த திருப்பதிகம்         கண்டபத்து         அச்சப்பத்து         குலாப்பத்து         எண்ணப்பத்து         யாத்திரைப் பத்து         திருப்படை எழுச்சி         திருப்படையாட்சி                 ஆனந்தமாலை         அச்சோப்பதிகம்
ஸ்தல மரம்	தில்லை, ஆல்
தீர்த்தம்	சிவகங்கை
பண்	பஞ்சமம்
குறிப்புகள்	இதில் ஒவ்வொரு பாட்டிலும், மகேந்திரமளையும், பல பாடல்களில் அருச்சுனனுக்காக பெருமான் வேதா வடிவம் கொண்டு சென்ற வரலாறும் குறிக்கப்பட்டுள்ளது.
பதிக பலன்	பயம் நீங்க.
வரிசை எண்.	3

திருச்சிற்றம்பலம்

உறவா கியயோ கமும்போ கமுமாய்
          உயிராளி என்னும்என் பொன் ஒரு நாள்
சிறவா தவர்புரஞ் செற்ற கொற்றச்
          சிலைகொண்டு பன்றிப்பின் சென்றுநின்ற
மறவா என்னும் மணிநீர் அருவி
          மகேந்திர மாமலைமேல் உறையும்
குறவா என்னும் குணக்குன்றே என்னும்
          குலாத்தில்லை அம்பலக் கூத்தனையே.  1  

காடாடு பல்கணம் சூழக் கேழற்
          கடும்பின் நெடும்பகற் கான்நடந்த
வேடா ! மகேந்திர வெற்பா ! என்னும்
          வினையேன் மடந்தைவிம் மாவெருவும்
சேடா என்னும் செல்வர் மூவாயிரம்
          செழுஞ்சோதி அந்தணர் செங்கைதொழும்
கோடா என்னும் குணக்குன்றே என்னும்
          குலாத் தில்லை அம்பலக் கூத்தனையே.  2  

கானே வருமுரண் ஏனம் எய்த
          களியார் புளினநற்கா ளாய்என்னும்
வானே தடவும் நெடுங் குடுமி
          மகேந்திர மாமலை மேலிருந்த
தேனே என்னும் தெய்வ வாய் மொழியார்
          திருவாளர் மூவாயிரவர் தெய்வக்
கோனே என்னும் குணக்குன்றே என்னும்
          குலாத்தில்லை அம்பலக் கூத்தனையே.  3  

வெறியேறு பன்றிப் பின்சென்று ஒருநாள்
          விசயற்கு அருள்செய்த வேந்தே என்னும்
மறியேறு சாரல் மகேந் திரமா
          மலைமேல் இருந்த மருந்தே ! என்னும்
நெறியே! என்னும் நெறிநின்ற வர்கள்
          நினைக்கின்ற நீதி வேதாந்த நிலைக்
குறியே !என்னும் குணக்குன்றே ! என்னும்
          குலாத்தில்லை அம்பலக் கூத்தனையே.  4  

செழுந்தென்றல் அன்றில்இத் திங்கள் கங்குல்
          திரைவீரை தீங்குழல் சேவின்மணி
எழுந்து இன்று என்மேல் பகையாட வாடும்
          எனைநீ நலிவது என்னே என்னும்
அழுந்தா மகேந்திரத்து அந்த ரப்புட்கு
          அரசுக்கு அரசே ! அமரர்தனிக்
கொழுந்தே என்னும் குணக்குன்றே என்னும்
          குலாத்தில்லை அம்பலக் கூத்தனையே.  5  

வண்டார் குழல் உமை நங்கை முன்னே
          மகேந்திரச் சாரல் வராகத் தின்பின்
கண்டார் கவல வில்லாடி வேடர்
          கடிநா யுடன்கை வளைந்தாய் ! என்னும்
பண்டாய மலரயன் தக்கன் எச்சன்
          பகலோன் தலை, பல், பசுங்கண்
கொண்டாய் என்னும் குணக்குன்றே ! என்னும்
          குலாத்தில்லை அம்பலக் கூத்தனையே.  6  

கடுப்பாய்ப் பறை கறங்கக் கடுவெஞ் சிலையும்
          கணையும் கவணும் கைக்கொண்டு
உடுப்பாய் தோல்செருப்புச் சுரிகை
          வராக முன்னோடி விளியுளைப்ப
நடப்பாய் ! மகேந்திர நாத ! நாதாந்தத்து
          அரையா என்பார்க்கு நாதாந்தபதம்
கொடுப்பாய் என்னும் குணக்குன்றே என்னும்
          குலாத்தில்லை அம்பலக் கூத்தனையே.  7  

சேவேந்து வெல்கொடி யானே ! என்னும்
          சிவனே ! என் சேமத்துணையே என்னும்
மாவேந்து சாரல் மகேந்தி ரத்தில்
          வளர்நா யகா ! இங்கே வாராய் என்னும்
பூவேந்தி மூவா யிரவர் தொழப்
          புகழேந்து மன்று பொலிய நின்ற
கோவே ! என்னும் குணக்குன்றே ! என்னும்
          குலாத்தில்லை அம்பலக் கூத்தனையே.  8  

தரவார் புனம்சுனை தாழ்அருவித்
          தடம்கல் லுறையும் மடங்கல் அமர்
மரவார் பொழில்எழில் வேங்கை எங்கும்
          மழைசூழ் மகேந்திர மாமலைமேல்
சுரவா ! என்னும் சுடர்நீள் முடி மால், அயன்,
          இந்திரன், முதல் தேவர்க்கு எல்லாம்
குரவா என்னும் குணக்குன்றே என்னும்
          குலாத்தில்லை அம்பலக் கூத்தனையே.  9  

திரு நீறு இடா உருத் தீண்டேன் என்னும்
          திருநீறு மெய்த் திருமுண்டத்து இட்டுப்
பெருநீல கண்டன் திறங்கொண்டு இவள்
          பிதற்றிப் பெருந்தெரு வேதிரியும்
வருநீர் அருவி மகேந்திரப்பொன்
          மலையின் மலைமக ளுக்கு அருளும்
குருநீ! என்னும் குணக்குன்றே ! என்னும்
          குலாத்தில்லை அம்பலக் கூத்தனையே.  10  

உற்றாய் என்னும் உன்னை அன்றி மற்றொன்று
          உணரேன் என்னும் உணர்வுகள் கலக்கப்
பெற்றாய ஐந்தெழுத்தும் பிதற்றிப்
          பிணிதீர வெண்நீறு இடப் பெற்றேன் என்னும்
சுற்றாய சோதி மகேந்திரம் சூழ
          மனத்து இருள் வாங்கிச் சூழாத நெஞ்சில்
குற்றாய் ! என்னும் குணக்குன்றே ! என்னும்
          குலாத்தில்லை அம்பலக் கூத்தனையே.  11  

வேறாக உள்ளத்து உவகை விளைத்து
          அவனிச் சிவலோக வேதவென்றி
மாறாத மூவாயிர வரையும் எனையும்
          மகிழ்ந்து ஆள வல்லாய் ! என்னும்
ஆறார் சிகர மகேந்திரத்து உன்
          அடியார் பிழைபொறுப்பாய் மாதோர்
கூறாய் என்னும் குணக்குன்றே என்னும்
          குலாத்தில்லை அம்பலக் கூத்தனையே.

திருச்சிற்றம்பலம்