திரு ஆக்கூர்

                

௨ 

திருஞானசம்பந்தர்  சுவாமிகள் அருளிச்செய்த
இரண்டாம்  திருமுறை

தகவல் பலகை	விவரம்
தலம்	திருஆக்கூர்
ஊர்/வேறுபெயர்	தான் தோன்றிமாடம்
நாடு	காவிரி தென்கரை
ॐசுவாமி	தான்தோன்றி ஈசர், சுயம்பு நாதர்
ॐஅம்பிகை	வாள் நெடுங்கண்ணி
பாடியவர்கள்	திருஞானசம்பந்தர்(1)         அக்கிருந்த ஆரமும் (2:42) திருநாவுக்கரசர்(1)         முடித்தாமரை அணிந்த (6:21)
ஸ்தல மரம்
தீர்த்தம்	குமுத தீர்த்தம்
பண்	சீகாமரம்
குறிப்புகள்	கோட்செங்க சோழ நாயனார் திருப்பணி செய்த மாடக் கோயில்  சிறப்புலி நாயனார் அவதாரம் செய்த ஸ்தலம்   மாடம் என்னும் பெயர் கொண்ட திருக்கோயில் 2 காணப்படுகிறது. மற்றொன்று தூங்கானை மாடம். அகத்திய முனிவருக்கு ஈசன் திருக் கோலக் காட்சி நல்கிய தலம்
	வினை தீரும்.
வரிசை எண்.	21                                    காவிரி (தெ) -46/127

திருச்சிற்றம்பலம்

அக்கிருந்த ஆரமும் ஆடரவும் ஆமையும்
தொக்கிருந்த மார்பினான் தோலுடையான் வெண்ணீற்றான்
புக்கிருந்த தொல்கோயில் பொய்யிலா மெய்ந்நெறிக்கே
தக்கிருந்தார் ஆக்கூரில் தான்தோன்றி மாடமே.  1  

நீரார வார்சடையான் நீறுடையான் ஏறுடையான்
காரார்பூங் கொன்றையினான் காதலித்த தொல்கோயில்
கூராரல் வாய்நிறையக் கொண்டயலே கோட்டகத்தில்
தாராமல் ஆக்கூரில் தான்தோன்றி மாடமே.  2  

வாளார்கண் செந்துவர்வாய் மாமலையான் தன்மடந்தை
தோளாகம் பாகமாப் புல்கினான் தொல்கோயில்
வேளாளர் என்று அவர்கள் வள்ளன்மையான் மிக்கு இருக்கும்
தாளாளர் ஆக்கூரில் தான்தோன்றி மாடமே.  3  

கொங்குசேர் தண்கொன்றை மாலையினான் கூற்றடரப்
பொங்கினான் பொங்கொளிசேர் வெண்ணீற்றான் பூங்கோயில்
அங்கம்ஆ றோடும்அருமறைகள் ஐவேள்வி
தங்கினார் ஆக்கூரில் தான்தோன்றி மாடமே.  4  

வீக்கினான் ஆடரவம் வீந்தழிந்தார் வெண்தலையென்
பாக்கினான் பலகலன்கள்ஆதரித்துப் பாகம்பெண்
ஆக்கினான், தொல்கோயில் ஆம்பலம்பூம் பொய்கைபுடை
தாக்கினார் ஆக்கூரில் தான்தோன்றி மாடமே.  5  

பண்ணொளிசேர் நான்மறையான் பாடலினோடு ஆடலினான்
கண்ணொளிசேர் நெற்றியினான் காதலித்த தொல்கோயில்
விண்ணொளிசேர் மாமதியந் தீண்டியக்கால் வெண்மாடம்
தண்ணொளிசேர் ஆக்கூரில் தான்தோன்றி மாடமே.  6  

வீங்கினார் மும்மதிளும் வில்வரையால் வெந்து அவிய
வாங்கினார் வானவர்கள் வந்து இறைஞ்சுந் தொல்கோயில்
பாங்கினார் நான்மறையோடு ஆறு அங்கம் பலகலைகள்
தாங்கினார் ஆக்கூரில் தான்தோன்றி மாடமே.  7  

கன்னெடிய குன்றெடுத்தான் தோள் அடரக் கால் ஊன்றி
இன்னருளால் ஆட்கொண்ட எம்பெருமான் தொல்கோயில்
பொன்னடிக்கே நாடோ றும் பூவோடு நீர்சுமக்கும்
தன்னடியார் ஆக்கூரில் தான்தோன்றி மாடமே.  8  

நன்மையான் நாரணனும் நான்முகனும் காண்பரிய
தொன்மையான் தோற்றங்கேடில்லாதான் தொல்கோயில்
இன்மையாற் சென்று இரந்தார்க்குக் இல்லை என்னா தீந்துவக்கும்
தன்மையார் ஆக்கூரில் தான்தோன்றி மாடமே.  9  

நாமருவு புன்மை நவிற்றச் சமண்தேரர்
பூமருவு கொன்றையினான் புக்கமருந் தொல்கோயில்
சேல்மருவு பைங்கயத்துச் செங்கழுநீர் பைங்குவளை
தாமருவும் ஆக்கூரில் தான்தோன்றி மாடமே.  10  

ஆடல் அமர்ந்தானை ஆக்கூரில் தான்தோன்றி
மாடம் அமர்ந்தானை மாடஞ்சேர் தண்காழி
நாடற் கரியசீர் ஞானசம் பந்தன்சொல்
பாடல் இவைவல்லார்க்கு இல்லையாம் பாவமே.

திருச்சிற்றம்பலம்