திருக்கோகர்ணம்

                

௨ 

திருநாவுக்கரசு  சுவாமிகள் அருளிச்செய்த
ஆறாம்  திருமுறை

தகவல் பலகை	விவரம்
தலம்	திருகோகர்ணம்
ஊர்/வேறுபெயர்
நாடு	துளுவ நாடு
ॐசுவாமி	பிராண லிங்கேஸ்வரர், கோகர்னேஸ்வர்
ॐஅம்பிகை	கோகர்னேஸ்வரி
பாடியவர்கள்	திருஞானசம்பந்தர்(1)         என்றும் அரியான் (3:79) திருநாவுக்கரசர்(1)        சந்திரனும் தண்புனலும்  (6:49)
ஸ்தல மரம்
தீர்த்தம்	கோடிதீர்த்தம்
பண்	திருத்தாண்டகம்
குறிப்புகள்	இலங்கேஸ்வரன் தவம் பெற்று பெற்ற பிரானலிங்கம் என சொல்லப்படுகிறது.   இத் தலத்தை அப்பர் திருஅங்கமாலையில் போற்றி பாடி உள்ளார்.    சிவராத்திரி வழிபாடு சிறப்புடையது.  இறைவன் திருமேனியை தீண்டி வழிபாடு செய்யலாம்.
பதிக பலன்	இறையருள் பெற; மூத்தோர் வழிபாடு
வரிசை எண்.	49                                                                               1/1

திருச்சிற்றம்பலம்

சந்திரனும்  தண்புனலும் சந்தித் தான்காண்
தாழ்சடையான்காண் சார்ந்தார்க்கு அமுது ஆனான் காண்
அந்தரத்தில் அசுரர்புரம் மூன்று எட் டான்காண்
அவ் உருவில் அவ்வுருவம் ஆயி னான்காண்
பந்தரத்து நான்மறைகள் பாடி னான்காண்
பலபலவும் பாணி பயில்கின் றான்காண்
மந்திரத்து மறைப்பொருளும் ஆயி னான்காண்
மாகடல்சூழ் கோகரணம் மன்னி னானே.  1  

தந்தவத்தன் தந்தலையைத் தாங்கி னான்காண்
சாரணன்காண் சார்ந்தார்க்கு இன் அமுதா னான்காண்
கெந்தத்தன் காண்கெடில வீரட் டன்காண்
கேடிலிகாண் கெடுப்பார்மற் றில்லா தான்காண்
வெந்து ஒத்த நீறுமெய் பூசி னான்காண்
வீரன்காண் வியன்கயிலை மேவி னான்காண்
வந்து ஒத்த நெடுமாற்கும் அறிவொ ணான்காண்
மாகடல்சூழ் கோகரணம் மன்னி னானே.  2  

தன் உருவம் யாவருக்கும்  தாக்கா தான்காண்
தாழ்சடை எம்பெருமான் காண் தக்கார்க்கு உள்ள
பொன் உருவச் சோதி புனல் ஆடி னான்காண்
புராணன்காண் பூதங்கள் ஆயி னான்காண்
மின் உருவ நுண்ணிடையாள் பாகத் தான்காண்
வேழத்தின் உரிவெருவப் போர்த்தான் தான்காண்
மன் உருவாய் மாமறைகள் ஓதி னான்காண்
மாகடல்சூழ் கோகரணம் மன்னி னானே.  3  

ஆறு ஏறு செஞ்சடை எம் ஆரூ ரன்காண்
அன்பன்காண் அணிபழனம் மேயான் தான்காண்
நீறு ஏறி நிழல்திகழும் மேனி யான்காண்
நிருபன்காண் நிகர் ஒன்றும் இல்லா தான்காண்
கூறு ஏறு கொடுமழுவாட் படையி னான்காண்
கொக்கரையன் காண்குழுநற் பூதத் தான்காண்
மாறாய மதில்மூன்றும் மாய்வித் தான்காண்
மாகடல்சூழ் கோகரணம் மன்னி னானே.  4  

சென்றச் சிலைவாங்கிச் சேர்வித் தான்காண்
தீயம்பன் காண்திரி புரங்கள் மூன்றும்
பொன்றப் பொடியாக நோக்கி னான்காண்
பூதன்காண் பூதப் படையாளிகாண்
அன்றப் பொழுதே அருள்செய் தான்காண்
அனல் ஆடி காண்அடியார்க்கு அமுதா னான்காண்
மன்றல் மணங்கமழும் வார்சடை யான்காண்
மாகடல்சூழ் கோகரணம் மன்னி னானே.  5  

பிறையோடு பெண்ணொருபால் வைத்தான் தான்காண்
பேரவன்காண் பிறப்பு ஒன்றும் இல்லா தான்காண்
கறையோடு மணிமிடற்றுக் காபாலி காண்
கட்டங்கன் காண்கையிற் கபாலம் ஏந்திப்
பறையோடு பல்கீதம் பாடி னான்காண்
ஆடினான் காண்பாணி யாக நின்று
மறையோடு மாகீதம்  கேட்டான் தான்காண்
மாகடல்சூழ் கோகரணம் மன்னி னானே.  6  

மின் அளந்த மேல்முகட்டின் மேல் உற்றான் காண்
விண்ணவர்தம் பெருமான்காண் மேவி இங்கும்
முன் அளந்த மூவர்க்கும் முதலா னான்காண்
மூவிலைவேற் சூலத்து எம்  கோலத் தான்காண்
எண் அளந்து என் சிந்தையே மேவி னான்காண்
ஏவலன்காண் இமையோர்கள் ஏத்த நின்று
மண் அளந்த மால் அறியா மாயத் தான்காண்
மாகடல்சூழ் கோகரணம் மன்னி னானே.  7  

பின்னு சடைமேற்பிறை சூடி னான்காண்
பேரருளன் காண்பிறப்பொன்று இல்லா தான்காண்
முன்னி உலகுக்கு முன்னா னான்காண்
மூவெயிலுஞ் செற்று உகந்த முதல்வன் தான்காண்
இன்னவுரு வென்றறிவொண் ணாதான் தான்காண்
ஏழ்கடலும் ஏழ் உலகும் ஆயி னான்காண்
மன்னும் மடந்தையோர் பாகத் தான்காண்
மாகடல்சூழ் கோகரணம் மன்னி னானே.  8  

வெட்ட வெடித்தார்க்கோர் வெவ் அழலன் காண்
வீரன்காண் வீரட்டம் மேவி னான்காண்
பொட்ட அநங்கனையும் நோக்கி னான்காண்
பூதன்காண் பூதப் படையி னான்காண்
கட்டக் கடுவினைகள் காத்தாள் வான்காண்
கண்டன்காண் வண்டுண்ட கொன்றை யான்காண்
வட்ட மதிப்பாகஞ் சூடி னான்காண்
மாகடல்சூழ் கோகரணம் மன்னி னானே.  9  

கையாற் கயிலை யெடுத்தான் தன்னைக்
கால்விரலால் தோள்நெரிய ஊன்றி னான்காண்
மெய்யின் நரம்பிசையாற் கேட்பித் தாற்கு
மீண்டே அவற்கருள்கள் நல்கி னான்காண்
பொய்யர் மனத்துப் புறம்பா வான்காண்
போர்ப்படையான் காண்பொருவா ரில்லா தான்காண்
மைகொள் மணிமிடற்று வார்சடை யான்காண்
மாகடல்சூழ் கோகரணம் மன்னி னானே.

திருச்சிற்றம்பலம்